संगमनेर पुढारी वृत्तसेवा : पुणे-नाशिक राष्ट्रीय महामार्गावरील पोखरी बाळेश्वरच्या तळेवाडीच रस्त्यावर सुरू असणाऱ्या एका हायप्रोफाईल वेश्या व्यवसायावर श्रीरामपूरचे पोलीस उपाधीक्षक संदीप मिटके यांच्या पथकाने छापा टाकून सदरचा कुंटणखाना चालविण्यास प्रोत्साहन देणार्‍या एका महिलेवर गुन्हा दाखल केला. याशिवाय दोन बंगाली तरुणींची वेश्या व्यवसायातून सुटका केली आहे. त्यामुळे पठार भागात एकच खळबळ उडाली आहे.  याबाबत घारगाव पोलिसांकडून पुणे-नाशिक महामार्गावरील चंदनापुरी घाटाच्या माथ्यावरील पोखरी बाळेश्वरच्या तळेवाडीच्या शिवारात हॉर्टल साईकृपाच्या पाठीमागील रस्त्यावर हायप्रोफाईल वेश्याव्यवसाय सुरु असल्याची गुप्त माहिती श्रीरामपूरचे पोलीस उपअधीक्षक संदीप मिटके यांना मिळाली.

घारगाव पोलिसांना माहिती होण्यापूर्वी  स्वतः पोलीस उपाधीक्षक संदीप मिटके यांनी संगमनेर तालुका पो नि अरुण आव्हाड सहाय्यक पो नि ज्ञाने श्वर थोरात, चालक पो. ना. मनोज पाटील ,पोलीस शिपाई नितीन शिरसाठ, महिला पोलीस मंगल जाधव यांच्या पथकासह मिळालेल्या माहितीच्या ठिकाणी बुधवारी सायंकाळी बनावट ग्राहकांकडे निशाणी केलेल्या पाचशे रुपयांचा नोटा देवून सदरच्या कुंटणखाण्यात पाठवले. त्यावरुन मिळालेली माहिती सत्य असल्याचे स्पष्ट झाले. पोखरी बाळेश्वरच्या शिवारातील एका शेतात उभारलेल्या पत्र्याच्या शेडवर डोंगराच्या कडेला दबा धरुन बसलेल्या पोलीस पथकाने छापा टाकून त्या शेतमालकाच्या चाळीस वर्षीय पत्नीला ताब्यात घेत त्या ठिकाणाहून पोलिसानी तीस व सव्वीस वर्षीय बंगाली तरुणींची  सुटका केली.

याप्रकरणी घारगाव पोलिसात महिला पोलीस शिपाई मंगल जाधव यांनी दिलेल्या फिर्यादीवरुन वेश्या व्यवसाय चालविण्यासाठी जागा उपलब्ध करुन देणाऱ्यासह त्याला प्रोत्साहन देणार्‍या एका चाळीस वर्षीय महिलेच्या विरोधात महिला आणि मुलींचे अनैतिक देह व्यापारास प्रतिबंध करणार्‍या कलमाखाली गुन्हा दाखल करण्यात आला आहे. यावेळी या हायप्रोफाईल वेश्या व्यवसायातून सुटका केलेल्या त्या दोन्ही परप्रांतीय मुलींची पोलिसांनी नगरच्या महिला सुधारगृहामध्ये रवानगी केली आहे.

The post संगमनेर तालुका पोलिसांचा हायप्रोफाईल वेश्या व्यवसायावर छापा , दोन परप्रांतीय मुलींची सुटका appeared first on पुढारी.

वाळकी : पुढारी वृत्तसेवा :  नगर तालुक्यात वाळकीच्या सरपंच पदाच्या तिरंगी लढत होणार असल्याने निवडणुकीत मोठी चुरस निर्माण होणार आहे. सदस्य पदासाठीच्या 17 जागांसाठी 36 उमेदवार रिंगणात उतरले आहेत. थेट जनतेतून निवड होणार्‍या वाळकीच्या सरपंचपदासाठी माजी उपसभापती रंगनाथ निमसे, विद्यमान ग्रामपंचायत सदस्य शरद बोठे, राम भालसिंग एकमेकांसमोर उभे ठाकले आहेत . वाळकी ग्रामपंचायतीवर दहा वर्षांपासून माजी आमदार शिवाजी कर्डिले यांचे कट्टर समर्थक ज्येष्ठ नेते भाऊसाहेब बोठे यांचे वर्चस्व आहे.बोठे यांच्या वर्चस्वाला शह देऊन दहा वर्षांची सत्ता उलथून टाकण्यासाठी सर्वपक्षीय विरोधक एकवटले आहेत.

माजी उपसभापती रंगनाथ निमसे, धर्मराज शैक्षाणिक संस्थेचे संस्थापक एन. डी. कासार, भाजपचे जिल्हा सरचिटणीस दिलीप भालसिंग, पंचायत समितीचे माजी सदस्य संभाजी कासार, ज्येेष्ठ नेते महादेव कासार, शिवसेनेचे अप्पासाहेब भालसिंग, राष्ट्रवादीचे सरचिटणीस सुहास कासार आदींनी बोठेंच्या विरोधात वज्रमूठ आवळली आहे. वाळकीत सरपंच पदासाठी रंगनाथ निमसे आणि शरद बोठे यांच्यात सरळ सरळ लढत होण्याची शक्यता असतानाच राम भालसिंग यांनी सरपंच पदासाठी उमेदवारी करीत निवडणूकीत चुरस निर्माण केली आहे. राम भालसिंग यांच्या उमेदवाराने दोन्ही उमेदवारांची मात्र डोकेदुखी वाढणार आहे.

ग्रामपंचायत सदस्य पदासाठी मात्र भाऊसाहेब बोठे यांच्या पॅनल विरोधात रंगनाथ निमसे यांचा सर्वपक्षीय पॅनलमध्ये समोरासमोर लढत रंगणार आहे. प्रभाग 4 मध्ये राम भालसिंग यांनी सदस्य पदासाठीही उमेदवारी केली असून प्रभाग क्रमांक 5 मधून त्यांच्या पत्नी सुधाराणी भालसिंग निवडणूक रणांगणात उतरल्या आहेत. त्यामुळे सदस्य पदाच्या 17 जागांसाठी 36 उमेदवार एकमेकांविरोधात उभे ठाकले आहेत. वाळकीत सरपंच पदासाठी रंगणारा तिरंगी सामना तालुक्यात लक्षवेधी ठरणार आहे .

तिरंगी लढतीचा फायदा कोणाला?

मागील वेळी सरपंच पदाच्या निवडणुकीत पंचरंगी लढत झाली होती. पंचरंगी लढतीचा फायदा बोठे गटाला होऊन स्वाती बोठे जनतेतून पहिल्या सरपंच ठरल्या होत्या. यावेळी मात्र बोठेंच्या विरोधात विरोधक एकवटले आहेत. बोठे गटाच्या वतीने सरपंच पदासाठी शरद बोठे उमेदवारी करत असून, त्यांच्या विरोधात सर्वपक्षीय उमेदवार म्हणून रंगनाथ निमसे रंगणात उतरले आहेत . राम भालसिंग यांनीही सरपंच पदासाठी उमेदवारी केली आहे.

The post वाळकीच्या सरपंचपदासाठी चुरस ! appeared first on पुढारी.

मावळ: तालुक्यातील तळेगाव स्टेशन ते आंबी रोडवरील आंबी येथील पुलाचे काम पूर्ण न झाल्यास सोमवार १२ डिसेंबर रोजी जलसमाधी घेणार, असा इशारा माजी जिल्हा परिषद सदस्य नितीन मराठे यांनी दिला आहे. या बाबतचे निवदेन त्यांनी पालकमंत्री चंद्रकांत पाटील आणि जिल्हाधिकारी राजेश देशमुख यांना सोमवारी दिले आहे.

वराळे-आंबी आणि तळेगाव एमआयडीसीच्या वाहतुकीच्या दृष्टीने अत्यंत महत्वाचा असणारा जुना पुल हा अवजड वाहनांमुळे ढासळला. त्यानंतर नवीन पुलाचे काम सुरु करण्यात आले. नवीन पुलाचे काम गेली तीन वर्षापासून सुरु आहे. जवळजवळ ८० टक्के काम पहिल्या टप्यातील पुर्ण झाले. उरलेले २० टक्के काम गेल्या २वर्षांपासून थांबलेले आहे. आठ ते नऊ गावांचा मुख्य रस्ता असणारा हा पुल बंद असल्यामुळे नागरीकांना, एमआयडीसी कामगार आणि शेतकऱ्यांना मनस्ताप सहन करावा लागत आहे.

तसेच सर्वसामान्य नागरिकांबरोबर एमआयडीसीतील सर्व कंपन्यांना ९ ते १० किलोमिटर अंतराचा वळसा घालुन वाहतुक करावी लागत आहे. संबधित पुलाचे काम सुरु करण्यासाठी संबधित खात्याच्या अधिकाऱ्यांना निवेदन देऊनही त्यामध्ये कोणत्याही प्रकारची प्रगती झालेली नाही. योग्य ती कार्यवाही करुन पुलाचे काम सुरु करावे आणि लवकरात लवकर पुल नागरीकांसाठी खुला करावा, असे या निवेदनात नमूद केले आहे.

The post मावळ: आंबी पुलाचे काम पूर्ण न झाल्यास नितीन मराठे घेणार जलसमाधी appeared first on पुढारी.

अकोले, पुढारी वृत्तसेवा : शिरपुंजे शासकीय आश्रम शाळेचे अधीक्षक अश्विनकुमार पाईकराव यांनी जळत्या लाकडाने पाच विद्यार्थ्यांना मारहाण केल्या प्रकरणी त्यांच्या विरोधात जखमी मुलांच्या पालकांनी दिलेल्या फिर्यादीवरून राजूर पोलिसांत गुन्हा दाखल करण्यात आला आहे. तसेच त्यांच्यावर आदिवासी विभागाकडून निलंबनाची कारवाई करण्यात आली आहे.

अकोले तालुक्यातील शिरपुजे शासकीय आश्रम शाळेत ३ डिसेंबर रोजी सहा विद्यार्थ्यांनी लाकडे पेटवून शेकोटी केली होती. हा प्रकार अधिक्षक अश्विन पाईकराव यांनी पहताच जळती लाकडे हातात घेऊन सहावी ते नववीच्या मुलांना मारहाण केली. त्यात काही मुलांच्या पायावर, पाठीवर आणि अन्य ठिकाणी जखमा झाल्या होत्या.

या नंतर पालकांनी मुलांना राजूर ग्रामीण रुग्णालयात उपचारासाठी दाखल केले होते. सदर घटनेची माहिती आमदार डॉ. किरण लहामटे यांना समजताच त्यांनी राजुर ग्रामीण रुग्णालयात जाऊन माराहाण झालेल्या विद्यार्थ्यांची चौकशी केली. तसेच अधीक्षक अश्विन पाईकराव यांना निलंबित करण्याची मागणी आदिवासी विकास मंत्री विजयकुमार गावित यांच्याकडे केली होती.

दरम्यान राजूर पोलिस ठाण्यात पालक भाऊ शिवराम धादवड (वय-३२ वर्ष, रा,शिसवद) यांनी दिलेल्या फिर्यादीत म्हटले आहे की, अधीक्षक अश्विन पाईकराव यांच्या ताब्यातील मुलांनी मुख्याध्यापक यांच्या सांगण्यावरून शाळेच्या आवारातील जुन्या गाद्या पेटवल्याचा राग आरोपी पाईकराव यांना आला. त्यानंतर त्यांनी युवराज भाऊ धादवड, अशोक संतू धादवाड, ओमकार भीमा बांबळे, गणेश लक्ष्मण भांगरे, बाबू संतू धादवड या पाच मुलास शिवीगाळ करत काठीने मारहाण केली. या फिर्यादीवरून अश्विनीकुमार अर्जुनराव पाईकराव (रा. शासकीय आश्रम शाळा, शिरपुंजे) यांच्या विरोधात भा.द.वि.कलम ३२४,५०४ व बाल अधिनियम २००० चे कलम ७५ प्रमाणे गुन्हा दाखल करण्यात आला आहे. पुढील तपास सहाय्यक पोलीस निरीक्षक गणेश इंगळे यांच्या मार्गदर्शनाखाली पो.ना.मुढे करीत आहे.

आश्विनकुमार अर्जुनराव पाईकराव यांनी सरनामा क्रमांक ६ च्या अहवालानुसार म.ना.से. वर्तणुक १९७९ मधील नियम ३ चा भंग करत कर्तव्यात कसूर केल्याने प्रथमदर्शनी जबाबदार धरून त्यांच्या विरुद्ध शिस्तभंगाची कारवाई करण्यात आली आहे. तसेच नियम १९७९ मधील नियम ४ चा पोटनियम (१) अन्वये प्रदान केलेल्या अधिकाराचा वापर करुन आश्विनकुमार पाईकराव यांना पुढील आदेश होईपर्यंत निलंबित करीत आहे.

– संदिप गोलाईत, अपर आयुक्त, आदिवासी विकास, नाशिक

The post अकोले: शासकीय आश्रम शाळेतील मुलांना मारहाण करणारा अधीक्षक निलंबित, राजुर पोलीस ठाण्यात गुन्हा दाखल appeared first on पुढारी.

शशिकांत पवार

नगर तालुका : नगर तालुक्यात ज्वारी व गव्हाच्या क्षेत्रात मोठी वाढ झाली असून, कांद्याच्या क्षेत्रात घट झाल्याचे चित्र पाहावयास मिळते. अतिवृष्टीमुळे कांद्याची रोपे वाया गेल्याने कांद्याचे क्षेत्र घटले असून, गहू व ज्वारीच्या क्षेत्रात वाढ झाली. तालुक्यात रब्बी हंगामासाठी 59 हजार 323 हेक्टर क्षेत्र लागवडीखाली आलेले आहे. आजपर्यंत सुमारे 68 टक्के क्षेत्र लागवडीखाली आले असून, त्यामध्ये ज्वारीच्या पिकांमध्ये मोठ्या प्रमाणात वाढ झाल्याचे दिसून येते. नगर तालुका ज्वारीचे पठार म्हणून ओळखला जायचा; परंतु गेल्या दशकापासून तालुक्यात मोठ्या प्रमाणात कांदा लागवड होत असून, तालुका कांद्याचे पठार म्हणून उदयास येत आहे.

चालू वर्षी अतिवृष्टीने कांद्याच्या रोपांची वाताहात झाली. त्यामुळे कांद्याच्या क्षेत्रात मोठ्या प्रमाणात घट झाली. पावसाच्या सुरुवातीपासून पावसाने जोरदार एन्ट्री करत अखेरपर्यंत संततधार पाऊस सुरूच होता. त्यामुळे शेतकर्‍यांच्या खरीप हंगामातील सर्वच पिकांना मोठा फटका बसला. कांद्याचे रोपे वाया गेल्याने शेतकर्‍यांनी गहू, हरभरा, ज्वारी पिकांची पेरणी मोठ्या प्रमाणात केली. रब्बी हंगामातील एकूण क्षेत्रापैकी 68 टक्के क्षेत्र लागवडीखाली आले. काही भागात कांद्याची लागवड, तसेच गव्हाची पेरणी सुरू आहे. अतिवृष्टीमुळे शेतात पाणी उपळल्यामुळे मशागतीसाठी विलंब झाल्याचे चित्र आहे.

तालुक्यात ज्वारीची पेर 23 हजार 117 हेक्टर क्षेत्रावर करण्यात आली. तर, गहू दोन हजार 759 हेक्टर, कांद्याची लागवड 13 हजार हेक्टर, तर हरभरा नऊ हजार 617 हेक्टर क्षेत्रावर पेरण्यात आला. चारा पिकाच्या प्रमाणातही वाढ झाल्याचे दिसून येते. नगर तालुक्यात जेऊर पट्ट्याला कांद्याचे पठार म्हणून ओळखले जाते. जेऊर मंडळात सर्वाधिक चार हजार 231 हेक्टर क्षेत्रावर कांद्याची लागवड करण्यात आली आहे.

सद्यस्थितीत कांदा, गहू, हरभरा पिके जोमात असले, तरी काही प्रमाणात पिकांवर रोगांचा प्रादुर्भाव आढळून येतो. कांदा पिकावर मावा, तुडतुडे, थ्रिप्स तसेच काही प्रमाणात जांभळा करपा, डाऊनी रोगांचा प्रादुर्भाव आढळून येतो. थंडीचे प्रमाण कमी असल्याने गहू व हरभरा पिकांच्या उगवणीवर देखील परिणाम झाल्याचे दिसून येत आहे. गव्हाच्या पिकावर थोड्या प्रमाणात मावा, तुडतुडे, तांबेरा रोगांचा प्रादुर्भाव आढळतो, तर हरभरा पिकावर मर रोग आढळून येत आहे. शेतकर्‍यांनी कीटकनाशके व बुरशीनाशक औषधांची खरेदी करताना बनावट औषधांबबाबत दक्षता घ्यावी. अनुभवी, कृषी तज्ज्ञांचा सल्ला घेणे गरजेचे आहे. औषध फवारणी शक्यतो सकाळी किंवा दुपारनंतर करावी.
-संदीप काळे, कृषी तज्ज्ञ साईनाथ कृषी उद्योग, जेऊर

ढगाळ वातावरणामुळे कांदा व गव्हाच्या पिकांवर मावा, तुडतुडे रोगांचा प्रादुर्भाव होऊ शकतो. अशावेळी कृषी तज्ज्ञांच्या सल्ल्याने औषध फवारणी करावी. पाण्याचे व्यवस्थापन नियोजनबद्ध करावे. शक्यतो ठिबक सिंचनाचा वापर करावा. अतिरिक्त पाण्याचा वापर करू नये.
– पोपटराव नवले, तालुका कृषी अधिकारी

The post नगर: रब्बी हंगामात ज्वारी, गव्हाच्या क्षेत्रात वाढ! appeared first on पुढारी.

श्रीरामपूर : पुढारी वृत्तसेवा :  स्वातंत्र्योत्तर काळात देशात अवघे 50 दशलक्ष टन धान्याचे उत्पादन होत असे. लोकसंख्येला पुरेसे उत्पादन होत नसल्याने अन्नधान्य आयात करण्याशिवाय पर्याय नव्हता, असे सांगत 1972 च्या दुष्काळात पाणी होते, पण धान्य नसल्याने गोरगरीबांवर उपासमारीची वेळ आली. ही सल मनात ठेवून तत्कालीन राज्याचे मुख्यमंत्री व केंद्रीय मंत्री शरद पवार यांनी सत्तासुत्रे हाती येताच दूरदृष्टीचे नियोजन करून, अन्नधान्य आयात करणार्‍या भारत देशाला धान्य निर्यातदारांचा देश बनविण्याची किमया करून दाखविली, असे सांगत चिकित्सक अभ्यास व धोरणांच्या नियोजनबद्ध मांडणीमुळे शरद पवार दुसर्‍या हरित क्रांतीचे जनक ठरले, असे प्रतिपादन प्रसिद्ध जलतज्ज्ञ, लेखक व व्याख्याते डॉ. सुधीर भोंगळे यांनी केले.

येथील रयत शैक्षणिक संकुल महाविद्यालय विकास समिती आयोजित पद्मविभूषण, माजी केंद्रीय मंत्री शरद यांच्या 82 व्या वाढदिवसानिमित्त ‘मा. खा. शरदचंद्र पवार जीवन व कार्य’ या विषयावर अभ्यासपूर्ण व्याख्यानात डॉ. भोंगळे यांनी शरद पवार यांच्या बहुआयामी व्यक्तिमत्वासह त्यांचे राजकारण, शेती, शिक्षण आदी आकाशाला गवसणी घालणार्‍या व्यापक कार्याचा आढावा मांडला.
अध्यक्षस्थान रयत शिक्षण संस्थेच्या मॅनेजिंग कौन्सिल सदस्या व रयत शैक्षणिक संकुल श्रीरामपुरच्या चेअरमन मीनाताई जगधने यांनी भूषविले. अध्यक्षस्थानावरून मीनाताई जगधने यांनी माजी केंद्रीय मंत्री शरद पवार यांच्या व्यापक कार्याचा संक्षिप्त व मार्मिक शब्दांत गौरव केला. आई, वडिलाचे सुसंस्कार व पवार घराण्याच्या उदात्त विचारांच्या वारस्याचा एकेक पदर त्यांनी हळूवारपणे उलगडत चिंतणीय विचार मांडले. शरद पवार यांच्या बहुआयामी व्यक्तीमत्वाबद्दलच्या निवडक पैलुंवर विचार मांडताना त्या म्हणाल्या, ‘भर पावसात भाषण करणारे शरद पवार यांचे कार्य अतुलनिय आहे.

रयत शिक्षण संस्थेच्या उत्तर विभागीय सल्लागार समितीचे अध्यक्ष आ. आशुतोष काळे प्रमुख पाहुणे होते.  व्याख्याते डॉ. सुधीर भोंगळे म्हणाले,  खरेतर जगाच्या अन्नधान्याची काळजी वाहणारे शरद पवार हे शेतकर्‍यांचे मसिहा होत. आपल्या दिशादायी कर्तृत्वाने त्यांनी महाराष्ट्रावर अनंत उपकार करून ठेवले आहेत. देशातील लोकशाही धोक्यात येताना सत्याची बाजू घेणारी त्यांची भूमिकादेखील महत्त्वाची ठरली आहे. देशावर नैतिक दडपण असलेले पवार हे जुन्या- नव्याचा संगम असलेला पूल आहे. हा पूल देशाला खूप महत्त्वाचा आहे, असे ते म्हणाले.

पंतप्रधान मनमोहन सिंग यांच्या सत्ताकाळात विद्यमान पंतप्रधान नरेंद्र मोदी यांना मोठा विरोध सहन करावा लागला, मात्र तेव्हा एकमेव शरद पवार यांनी आपल्याला साथ दिल्याचे दस्तुरखुद्द मोदी सांगतात, याचा डॉ. भोंगळे यांनी आवर्जून उल्लेख केला.
प्रास्तविक प्र. प्राचार्य डॉ. प्रवीण बडदे यांनी केले. यावेळी डॉ. रविंद्र जगधने, डॉ. राजीव शिंदे,जनरल बॉडी सदस्य बाप्पुसाहेेब पटारे, प्राचार्य मुकूंद पोंधे, मॅनेजिंग कौन्सिल सदस्य डॉ. एन. सी. पवार, उपप्राचार्य डॉ. सुनील चोळके, ज्युनिअर कॉलेज उपप्राचार्या सुजाता पोखरकर, डी.डी. काचोळे विद्यालय मुख्याध्यापक सुनील साळवे, एस. के. सोमय्या विद्यालय मुख्याध्यापिका सोनाली पैठणे रजिस्ट्रार एस.के.राऊत, अधीक्षक के. एम. जाधव आदींसह प्राध्यापक व रयत सेवक उपस्थित होते.फफ

पवार साहब करेंगे, तो सब हो सकता है !

माजी केंद्रीय मंत्री शरद पवार यांच्याएवढा मोठा माणूस महाराष्ट्रात नाही, असे सांगत डॉ. सुधीर भोंगळे म्हणाले, ‘आम्ही दिल्लीत जातो, तेव्हा प्रादेशिक असो वा देश पातळीवरील प्रत्येक राज्यातील महान हस्ती समस्या सोडविण्यास मोठ्या आशेने, अपेक्षनेे पाहते अन् ती सुटताच म्हणते, ‘पवार साहब हैं तो सब कुछ हो सकता हैं!

रयत शिक्षण संस्थेत माजी केंद्रीय मंत्री शरद पवार यांचे प्रदीर्घ 50 वर्षे योगदान आहे. त्यांचा केवळ 82 वा नव्हे तर आपण 100 वा वाढदिवस साजरा करू. राजकारणासह त्यांचे कृषी, सांस्कृतिक आदी क्षेत्रातील कार्याचा मोठा अवाका आहे. 2019 मध्ये पावसात सभा घेत त्यांनी विधान सभेचे रणांगण जिकंले. त्यांच्यामुळे मी निवडून आलो, आमदार झालो. कामावरील प्रचंड श्रद्धा व जनमानसांप्रती सतत प्रेम बाळगणारे पवार यांचे व्यक्तिमत्व अवघ्या महाराष्ट्राला ऊर्जा देते.
                           – आ. आशुतोष काळे, ‘रयत’ उत्तर नगर अध्यक्ष

आयुष्याच्या उत्तरार्धातही शरद एक्स्प्रेस सुसाट वेगाने पुढे जात आहे. त्यांचे मन अजूनही तरुण असून, माणसांचा सहवास हेच त्यांच्या जिवनाचे टॉनिक आहे. शरदरावांचे व्यक्तित्व अष्टपैलू आहे. व्यापक दूरदृष्टी, कार्यकुशलता, धडपडी वृती, संघटन कौशल्य, नियोजनबद्धता व सामाजिक बांधिलकी या गुणांच्या जोरावर त्यांनी राजकारणातून समाजकारण केले.
          – मीनाताई जगधने, ‘रयत’ मॅनेजिंग कौन्सिल सदस्या, रयत शैक्षणिक संकुल चेअरमन

The post शरद पवार यांच्यामुळे भारत अन्नधान्य निर्यातदार : जलतज्ज्ञ डॉ. सुधीर भोंगळे appeared first on पुढारी.

नगर : पुढारी वृत्तसेवा :  मुलांना दिल्या जाणार्‍या शालेय पोषण आहारातील ‘पूरक’ आहार हा गायब झाल्याचे दै. पुढारीतील वृत्तानंतर शिक्षणाधिकारी भास्कर पाटील यांनी याबाबत गंभीर दखल घेतली आहे. शाळेत विद्याथ्यार्ंना पूरक आहार मिळतो की नाही, याबाबत विद्यार्थी आणि पालक यांचे लेखी म्हणणे घेवून तीन दिवसांत अहवाल सादर करण्याच्या सूचना पाटील यांनी गटशिक्षणाधिकारी तसेच पोषण आहार अधिक्षक यांना केल्या आहेत. त्यामुळे आता या अहवालाकडे जिल्ह्याच्या नजरा असणार आहेत.

प्रधानमंत्री पोषण शक्ती निर्माण योजनेतून इयत्ता पहिली ते आठवीच्या मुलांना पोषण आहार दिला जातो. आठवड्यातून सहा दिवस हा आहार दिला जातो. मात्र, यामध्ये एक दिवस गूळ शेंगदाण्याचा लाडू, खारीक खोबरे, राजगिरा लाडू, केळी, सफरचंद इ. पूरक आहार देण्याच्या शासनाच्या सूचना आहेत. गॅस, भाजीपाला खरेदीबरोबरच त्यात पूरक आहारासाठीही निधी सामाविष्ट आहे. असे असताना काही शाळांमध्ये मुलांना पूरक आहार दिलाच जात नसल्याचे चित्र आहे. त्यामुळे याप्रकरणी दै. पुढारीने जिल्हा परिषदेचे मुख्य कार्यकारी अधिकारी आशिष येरेकर, शिक्षणाधिकारी भास्कर पाटील यांचे लक्ष वेधले होते. या वृत्तानंतर सीईओ येरेकर यांच्या मार्गदर्शनात शिक्षणाधिकारी पाटील यांनी सर्वच तालुक्यातील क्षेत्रीय अधिकार्‍यांना लेखी सूचना काढल्या आहेत.

काय सूचना आहेत

तालुका, योजनेस पात्र शाळांची संख्या, पूरक आहार न दिलेल्या शाळाची संख्या, पूरक आहार न दिल्याची कारणे, पूरक आहार न दिलेबाबत कारवाई इत्यादी माहितीचा तपशील शिक्षणाधिकारी पाटील यांनी मागितला आहे. शाळांची प्रत्यक्ष तपासणी करून त्या ठिकाणी विद्यार्थी आणि पालक यांना पूरक आहार दिला जातो किंवा कसे, याबाबत लेखी म्हणणे घेवून संबंधित अहवाल दि. 9 डिसेंबर पर्यंत सादर करावा. संबंधित अहवाल सीईओ येरेकर यांना सादर करण्यात येणार आहे.

पालक मेळाव्यातून म्हणणे घेण्याच्या हालचाली!

पूरक आहार वाटपाची तपासणी करण्यासाठी तालुक्यातील अधिकार्‍यांना सूचना दिल्या आहेत. या तपासणीत विद्यार्थी आणि पालकांचे लेखी म्हणणे घेतले जाणार आहे. एकाचवेळी सर्व पालक तपासणी अधिकार्‍यांना भेटणार नाही, मात्र त्यासाठी गुरुवार, शुक्रवारी या दोन दिवस बहुतांशी ठिकाणी पालक मेळावा बोलावून त्यात याबाबत म्हणणे घेतले जाणार असल्याचेही समजले.

सीईओंकडेही पालकांच्या थेट तक्र ारी?

काही पालकांनी मुलांच्या जबाबासह यापूर्वीच पूरक आहार मिळत नसल्याच्या तक्रारी सीईओ, अतिरीक्त सीईओ यांच्याकडे केल्याचीही चर्चा आहे. त्यामुळे शिक्षण विभागाकडून प्रत्यक्षात आता केली जाणारी तपासणी, त्याचा झेडपीत पाठविला जाणारा अहवाल आणि सीईओ व अतिरीक्त सीईओंकडे आलेल्या तक्रारी, यामधील बनवाबनवी पुढे येण्याची शक्यता आहे. या प्रकरणात मदतनिसांवर कोणतेही आक्षेप नाहीत.

The post नगर : पूरक पोषण आहार चौकशीचे आदेश, गटशिक्षणाधिकार्‍यांना तीन दिवसांचा अल्टिमेटम appeared first on पुढारी.

संगमनेर; पुढारी वृत्तसेवा : पुण्यावरुन- नाशिकला जात असलेल्या कारवरील चालकाचे नियंत्रण सुटून कार थेट घाटातील दरीत कोसळून झालेल्या अपघातात नाशिक येथील रहिवासी असणार्‍या राजश्री विजय पाटील या महिलेचा मृत्यू झाला असून चार जण जखमी झाले आहेत. याबाबत समजलेली माहिती अशी की, विजय नारायण पाटील, राजश्री विजय पाटील, चिन्मयी विजय पाटील, वनिता राजेश कुलकर्णी, आदिती राजेश कुलकर्णी (नाशिक) हे आपल्या वॅगनआर कारमधून पुण्याहून नाशिकच्या दिशेने जात असताना कार चालकाचे कारवरील नियंत्रण सुटले आणि कार थेट दरीत कोसळली.

झालेल्या भीषण अपघातात, कारमधील राजश्री विजय पाटील (वय 46) यांचा जागीच मृत्यू झाला तर इतर चौघेजण गंभीर जखमी झाले. अपघाताची माहिती मिळताच संगमनेर तालुका पोलिस स्टेशनचे पो. नि. अरुण आव्हाड, सहा. फौजदार एस. एस. पाटोळे यांनी अपघातस्थळी भेट देऊन पंचनामा केला. अपघातातील जखमींना संगमनेर येथील मेडिकव्हर रुग्णालयात दाखल करण्यात आले असून त्यांच्यावर उपचार सुरु आहेत. घटनेचा तपास पोलिस करीत आहेत.

The post कर्‍हे घाटाच्या दरीत कार कोसळून महिला ठार appeared first on पुढारी.

नगर तालुका; पुढारी वृत्तसेवा : नगर- औरंगाबाद रस्त्यावरील इंद्रायणी हॉटेल समोरील चौकात गतिरोधक बसवण्याची मागणी तपोवन रस्ता परिसरातील नागरिकांनी नगरच्या जागतिक बँक प्रकल्प विभागाचे कार्यकारी अभियंता व विभाग क्रमांक दोन उपअभियंता यांच्याकडे निवेदनाद्वारे केली आहे. त्याची प्रत माजी आमदार शिवाजीराव कर्डिले यांनाही देण्यात आली.

कर्डिले यांना वारंवार घडणारे अपघात व वाढती वर्दळ पाहता गतिरोधक बसविण्याची गरज असल्याचे नागरिकांनी सांगितले. इंद्रायणी चौकातील हॉटेल समोर तपोवन परिसरातून येणार्‍या जाणार्‍या नागरिकांची संख्या दिवसेंदिवस वाढत आहे. अल्पावधीतच इंद्रायणी बस स्टाप निर्माण झाला असून, तपोवन वासियांना नगरमध्ये जाण्या- येण्यासाठी हा रस्ता सोईस्कर आहे. तसेच, या चौकात हॉटेल व्यवसाय जोरात असून याच चौकात तीन मंगल कार्यालय, मार्बल स्टाईलचे व्यवसायीक असल्याने गर्दी मोठ्या प्रमाणात होत असते.

तपोवन परिसर मोठ्या प्रमाणात विकसीत होत असूनल, अपघाताचे प्रमाण वाढले आहे. शाळकरी मुले, भाजीपाला व्यवसायिक, बांधकाम व्यवसायिक जेष्ठ नागरिक, महिला मोठ्या प्रमाणावर या चौकाचा वापर करत आहेत. याच रस्त्यावर नको त्या ठिकाणी गतिरोधक आहेत पाहिजे, त्या ठिकाणी गतिरोधक नाहीत,असा आरोप येथील नागरिकांकडून करण्यात येत आहे.

इंद्रायणी चौकात गतिरोधक बसवावेत, या आशयाचे निवेदन परिसरातील नागरिकांनी संबंधित विभागाला दिले. निवेदनावर संदीप पालवे, दत्तू शिरसाठ, अशोक काळे, लक्ष्मण काळे, स्वप्निल कासवा, एस. रहेमान खान, संदीप किनगे, विक्रम आव्हाड, संतोष लोंढे, सोमनाथ नजन, गोरक्षनाथ दरवडे, रवींद्र कैदके, आसाराम लाहोटी, भगवान आव्हाड आदींसह परिसरातील नागरिकांच्या सह्या आहेत.

The post अपघातांची वाढती संख्या डोकेदुखी; नगर-औरंगाबाद महामार्ग appeared first on पुढारी.

नेवासा; पुढारी वृत्तसेवा : नेवासा तालुक्यातील भू-लोकीचा स्वर्ग अशी ओळख असलेल्या देवगड दत्तजयंती उत्सवातील बंदोबस्तासाठी नेवासा होमगार्डची 50 वर्षे निष्काम सेवेची परंपरा आजतागायत सुरूच आहे. बुधवारी होणार्‍या उत्सवासाठी नेवासा होमगार्ड जवान सेवेसाठी सज्ज झाले आहेत. नेवासा होमगार्डची स्थापना सन 1952 साली झाली. श्री क्षेत्र देवगडचे मंदिर बांधकाम 1957 साली सुरू होते. मंदिर बांधून पूर्ण झाल्यानंतर दत्तजयंती उत्सवाला श्री समर्थ सदगुरु किसनगिरी बाबांनी सुरुवात केली.

त्यावेळी ज्येेष्ठ स्वातंत्र्यसैनिक स्व.गोपाळराव थावरे हे होमगार्ड समादेशक म्हणून काम पाहत होते. तेव्हापासून दत्तजयंती उत्सवात निशुल्क भक्तांसाठी बंदोबस्त देऊन सेवा देण्यासाठी नेवासा होमगार्डने संकल्प केला होता. त्यानंतर स्वर्गीय विठ्ठलराव जंगले पाटील हे समादेशक झाले. त्यांनी देखील त्यावेळी पंधरा ते वीस होमगार्डला बरोबर दत्तजयंती उत्सवासाठी बंदोबस्त दिला. त्यानंतर ही परंपरा सुरूच राहिली.

भास्करगिरी बाबा देवगडचे उत्तराधिकारी झाल्यानंतर दिवसेंदिवस देवगडच्या दत्तजयंतीचा उत्सव हा पुढे बहरतच गेला. त्यात स्व. भाऊसाहेब पाठक यांनी सेवेची परंपरा पुढे सुरू ठेवली. आज होमगार्ड जवानांची संख्या दीडशेच्या वर जाऊन पोहचली आहे. त्यात कायदा व सुव्यवस्था अबाधित रहाण्यासाठी नेवासा तालुक्यात पोलिसांच्या खांद्याला खांदा लावून बंदोबस्त देण्याचे काम होमगार्ड समादेशक बाळासाहेब देवखिळे यांच्या अधिपत्याखाली सुरू आहे.

दर रविवारी न चुकता होमगार्ड कार्यालयाच्या प्रांगणात परेड घेणे, होमगार्ड सुरक्षेच्या बाबतीत शिस्तीचे धडे देणे, हे काम सुरू आहे. जिल्ह्यात देखील प्रशिक्षण शिबिरे घेऊन होमगार्ड दलात प्रबोधन करणे, असे अनेक उपक्रम सुरू असल्याने जिल्ह्यात चांगल्या सेवेच्या बाबतीत पारितोषिके पटकावून होमगार्डने नेवासा तालुक्याचे नाव उंचावले आहे.

देवगड दत्तजयंती सोहळयात नेवाशाचे पोलिस निरीक्षक विजय करे यांच्या मार्गदर्शनाखाली बंदोबस्त देण्यासाठी होमगार्ड समादेशक बाळासाहेब देवखिळे व जनसंपर्क अधिकारी सुधीर चव्हाण, पलटणनायक अशोक टेमकर, पोलिस पाटील दिलीप गायकवाड, श्रीकांत ससे, पलटणनायक दादासाहेब कणगरे, अल्ताफ शेख, राजेंद्र बोरुडे, अरुण देवढे, गफार शेख, उमेश इंगळे, होमगार्ड विकास बोर्डे, अशोक चव्हाण, मोहन गायकवाड, शकील शेख यांच्यासह 50 होमगार्ड व सहा महिला होमगार्ड सज्ज झाले आहेत.

The post नेवासा होमगार्डची 50 वर्षे निष्काम सेवा appeared first on पुढारी.

कोपरगाव; पुढारी वृत्तसेवा : संजीवनी उद्योग समुहाचे अध्यक्ष, साईबाबा संस्थानचे माजी विश्वस्त बिपीनराव कोल्हे यांना साखर उद्योगातील भरीव योगदानाबद्दल देशपातळीवर कार्यरत असलेल्या शुगरकेन ब्रिडींग इन्स्टिट्युट कोईमतूर अंतर्गत सोसायटी फॉर शुगरकेन रिसर्च अँड डेव्हलपमेंट संस्थेने प्रतिष्ठेचा जीवन गौरव पुरस्कार शुगरकेन ब्रिडींग इन्स्टिट्युट संस्थेचे माजी संचालक व कार्यक्रमाचे अध्यक्ष डॉ. एन.विजयन नायर यांच्या हस्ते देऊन सन्मान केला आहे. सदरचा पुरस्कार कोल्हे यांनी स्व. शंकरराव कोल्हे व सभासद शेतकर्‍यांच्या चरणी समर्पित केला आहे.

या संस्थेच्या संचालिका डॉ. जी. हेमप्रभा याप्रसंगी बोलताना म्हणाल्या की, पुढच्या वर्षापासून सहकारी साखर उद्योगात माजी मंत्री स्व. शंकरराव कोल्हे यांनी दिलेल्या भरीव योगदानाबद्दल त्यांच्या नावे प्रतिष्ठेचा देश पातळीवर पुरस्कार या संस्थेचेवतीने दिला जाणार आहे.
सहकारमहर्षी शंकरराव कोल्हे सहकारी साखर कारखान्याने साखर उत्पादनाबरोबरच आसवनी त्यावरील विविध रासायनीक उपपदार्थांची निर्मीती करून सहवीज निर्मीती, बायोगॅस, उसाच्या रसापासून थेट इथेनॉल निर्मीती करून देशपातळीवर नावलौकीक मिळविला आहे.

माजीमंत्री स्व. शंकरराव कोल्हे यांच्या मार्गदर्शनाखाली बिपीनराव कोल्हे यांनी कार्यक्षेत्रातील सभासद शेतकर्‍यांचे उसाचे प्रति हेक्टरी उत्पादन वाढविण्यासाठी थेट शेतकर्‍यांच्या बांधावर जाऊन त्याबाबत धडक कृती विकास कार्यक्रम राबविले. ऊस संशोधनातील शिखर संस्था असलेल्या शुगरकेन ब्रिडींग इन्स्टिट्यूट सोसायटी, कोईमतूर अंतर्गत उसाच्या विविध विकसीत जातीचे ऊस बेणे सभासदांसह शेतकर्‍यांना उपलब्ध करून कमी पाण्यात, कमी श्रमात अधिक ऊस उत्पादन कसे मिळेल, यावर सातत्यांने भर दिला आहे.

सत्कारास उत्तर देतांना बिपीनराव कोल्हे म्हणाले की, सध्या ऊस उतारा आधारीत दर दिले जात असल्याने प्रती हेक्टरी ऊस व साखर उतारा देणार्‍या ऊस जातींची गरज आहे आणि त्यासाठी ऊस संशोधन केंद्र कोईमतूर संस्थेने को- 7219, को- 86032 सारख्या ऊस जाती विकसीत करून शेतकर्‍यांना मोठा दिलासा दिला आहे. जगात ब्राझील मध्ये 15 टक्के साखर उतारा देणार्‍या ऊस जाती विकसीत झाल्या आहेत. त्या भारतात विकसीत झाल्या तर साखर उद्योगाचे भवितव्य अधिक उज्वल होईल.

ऊस संशोधनात कोईमतूर संस्थेने मोठ्या प्रमाणात सहकार्य देऊन शेतकर्‍यांचे प्रति हेक्टरी ऊस उत्पादन वाढवण्यासाठी मौलिक मार्गदर्शन केले आहे. साखर उद्योगातील भरीव योगदान बद्दल शुगरकेन ब्रीडिंग इन्स्टिट्यूट कोईमतुर यांनी आपला जो सन्मान केला आहे. तो व्यक्तिगत माझा नसून सहकारमहर्षी शंकरराव कोल्हे सहकारी साखर कारखान्याच्या सर्व सभासदांचा असल्याचे ते म्हणाले. या पुरस्काराबद्दल बिपिनराव कोल्हे यांचे सर्वत्र अभिनंदन होत आहे.

.. तर साखर उद्योगाचे भवितव्य उज्ज्वल
जगात ब्राझील मध्ये 15 टक्के साखर उतारा देणार्‍या ऊस जाती विकसीत झाल्या आहेत. त्या भारतात विकसीत झाल्या तर साखर उद्योगाचे भवितव्य अधिक उज्वल होईल. ऊस संशोधनात कोईमतूर संस्थेने मोठ्या प्रमाणात सहकार्य देऊन शेतकर्‍यांचे प्रति हेक्टरी ऊस उत्पादन वाढवण्यासाठी मौलिक मार्गदर्शन केले असल्याचे बिपीनराव कोल्हे यांनी सांगितले.

The post कोपरगाव : बिपीनराव कोल्हे यांना जीवन गौरव पुरस्कार appeared first on पुढारी.

नगर; पुढारी वृत्तसेवा : ग्रामपंचायतीच्या सरपंच व सदस्यपदाची निवडणूक लढविण्यासाठी राज्य निवडणूक आयोगाने खर्चाची मर्यादा घातली आहे. सरपंचपदासाठी कमीत कमी 50 ते जास्तीत जास्त पावणेदोन लाख रुपये तर सदस्यपदासाठी कमीत कमी 25 हजार ते जास्तीत जास्त 50 हजार रुपये उमेदवारांना खर्च करण्याची मुभा आहे. मात्र, गावचा कारभारी होण्यासाठी सरपंचपदाच्या निवडणुकीसाठी तब्बल 25 लाख रुपयांचा चुराडा होतो. मोठ्या ग्रामपंचायतींत हा आकडा मात्र, 50 लाखांच्या घरात जात आहे. सदस्यपदाची निवडणूक अटीतटीची असल्यास दोन -अडीच लाख रुपये खर्च केला जात आहे.

जिल्ह्यातील 203 ग्रामपंचायतींच्या सदस्य व थेट सरपंचपदासाठी सार्वत्रिक निवडणुका 18 डिसेंबर रोजी होत आहेत. त्यासाठी उमेदवारी अर्ज भरण्याची प्रक्रिया नुकतीच संपली आहे. सदस्य व सरपंचपदाची निवडणूक लढविण्यासाठी सातवी पास ही शैक्षणिक पात्रता ठेवण्यात आली आहे. तसेच निवडणूक लढविणार्‍या सर्वसाधारण प्रवर्गातील उमेदवारांना पाचशे तर मागासवर्गीय उमेदवारांना शंभर रुपये अनामत रक्कम जमा करावी लागत आहे.

विधानसभा व लोकसभा निवडणूक लढविणार्‍या उमेदवारांना खर्च किती करावा याची मर्यादा घालून दिली आहे. त्याप्रमाणे ग्रामपंचायत सदस्य व सरपंचपदाच्या निवडणुकीसाठी देखील उमेदवारांना खर्चाची मर्यादा घालून दिली आहे. ग्रामपंचायतीच्या निवडणुकीत झालेला एकूण खर्च निकाल लागण्यानंतर 30 दिवसांत सादर करणे बंधनकारक आहे. खर्च जमा न करणार्‍या उमेदवारांना अपात्र ठरविण्यात येत आहे.त्यामुळे निवडणूक खर्चाला अधिक महत्त्व आले.

ग्रामपंचायतींच्या निवडणुकीत मोठ्या प्रमाणात खर्च केला जात आहे. हा खर्च आटोक्यात आणण्यासाठी राज्य निवडणूक आयोगाने आता उमेदवारांना खर्चाची मर्यादा घालून दिली आहे. सदस्यसंख्येनुसार सदस्य आणि सरपंचपदाच्या निवडणुकीसाठी खर्चाची मर्यादा निश्चित केली आहे.

छोट्या ग्रामपंचायतीच्या सदस्यपदाच्या निवडणुकीसाठी 25 हजार तर मोठ्या ग्रामपंचायतीच्या सदस्यपदासाठी जास्तीत जास्त 50 हजार रुपये खर्च करता येणार आहे. सरपंचपदासाठी निवडणुकीसाठी छोटी ग्रामपंचायत असल्यास 50 हजार ते मोठी ग्रामपंचायत असल्यास 1 लाख 75 हजार रुपयांपर्यंत खर्च करण्यास आयोगाने उमेदवारांना संमती दिली आहे.उमेदवारी अर्ज दाखल करण्यापासून ते मतदानाच्या दिवसांपर्यंतचा खर्च उमेदवारांना सादर करणे बंधनकारक आहे.

गेल्या काही वर्षांपासून ग्रामपंचायतींना विकासकामांसाठी केंद्र व राज्य सरकारकडून मोठया प्रमाणात निधी उपलब्ध होत आहे.त्यामुळे ग्रामपंचायती मालामाल झाल्या आहेत.मोठ्या ग्रामपंचायतीची बजेट देखील मोठेच असते. त्यामुळे अशा ग्रामपंचायतीचे सरपंच व सदस्य होण्यासाठी प्रत्येक राजकीय कार्यकर्ता इच्छुक असतात. त्यामुळे सरपंच व सदस्य होण्यासाठी लाखो रुपये खर्च केले जात आहेत.

भावकीची जिरविण्यासाठी अधिक खर्च
गावचा सरपंच थेट जनतेतून निवडला जाणार आहे. त्यामुळे उमेदवारांना संपूर्ण गावातील मतदार सांभाळावे लागणार आहे. त्यासाठी खर्च देखील भरमसाठ होणार आहे. त्यामुळे आर्थिकदृष्ट्या मातब्बर व्यक्तींनाच उमेदवारी दिली जात आहे. शक्यतो सदस्य व सरपंचपदाच्या निवडणुकीत भावबंदकीलाच एकमेकांशी झुंजावे लागत आहे. त्यामुळे भावबंदांची जिरवण्यासाठी निवडणुकीत मोठा खर्च होत आहे.

The post नगर : खर्चमर्यादा हजारांत, प्रत्यक्षात 25 लाखांच्या घरात! appeared first on पुढारी.

नगर; पुढारी वृत्तसेवा : नगर तालुक्यात सरपंचपदाचे 7 तर सदस्यपदांचे 14 असे एकूण 21 अर्ज अवैध ठरविण्यात आले आहेत. सरपंचपदाचे साकत येथील 2, वाळकी येथील 1 व राळेगण येथील दोन अर्ज बाद झाले आहेत. उमेदवारी अर्ज मागे घेण्यास प्रारंभ झाला असून, बुधवारी निवडणूक रिंगणातीलउमेदवारांचे चित्र स्पष्ट होणार आहे. वाळकी, नेप्ती, सारोळा कासार यासह तालुक्यातील 27 ग्रामपंचायतींसाठी 18 डिसेंबर रोजी मतदान होणार आहे.

या निवडणुकीसाठी 28 नोव्हेंबरपासून उमेदवारी अर्ज दाखल करण्यास प्रारंभ झाला. 2 डिसेंबर या शेवटच्या दिवशी मोठ्या संख्येने अर्ज दाखल झाले.तालुक्यात सरपंचपदासाठी एकूण 180 तर सदस्यपदासाठी 862 उमेदवारी अर्ज दाखल झाले होते. सोमवारी नगर तहसील कार्यालयात ग्रामपंचायतीनिहाय अर्जांची छाननी करण्यात आली. सरपंचपदासाठी दाखल झालेल्या एकूण अर्जांपैकी 173 अर्ज वैध ठरले असून, 7 अर्ज बाद ठरले आहेत. यामध्ये वाळकी येथील 1, राळेगण 2, खातगाव टाकळी 1, साकत 2, कौंडगाव जांब येथील 1 अर्जाचा समावेश आहे.

ग्रामपंचायतींच्या सदस्यपदासाठी दाखल झालेल्या 862 पैकी 848 अर्ज वैध ठरविण्यात आले आहेत. 14 अर्ज मात्र बाद झाले आहेत. यामध्ये वाळी ग्रामपंचायतीमधील 2, नेप्ती 1, राणेगण 1, सारोळा कासार 1, टाकळी खातगाव 1, वडगाव तांदळी 1, आठवड 1, खातगाव टाकळी 1, साकत 3 व कौंडगाव जाँब येथील 2 अर्जाचा समावेश आहे.

नगर तहसील कार्यालयात तहसीलदार उमेश पाटील यांच्या नेतृत्वाखाली छाननी करण्यात आली. यावेळी निवासी नायब तहसीलदार बारवकर व इतर अधिकारी व कर्मचारी यांची उपस्थिती होती.

वैध अर्ज कंसात सरपंचपदाची संख्या
वाळकी 64 (5), नेप्ती 56 (10), कापूरवाडी 40 (9), नांदगाव 25 (8), राळेगण 41 (6), सारोळा कासार 41 (6), शेंडी 51 (10), जखणगाव 22 (9), नारायणडोहो 55 (12), सोनेवाडी चास 25 (3), टाकळी खातगाव 40 (5), वडगाव तांदळी 20 (6), आठवड 29 (5), आगडगाव 27 (4), खातगाव टाकळी 41 (6), कौडगाव जांब 35 (7), बाबुर्डी बेंद 21 (3), मदडगाव 14 (5), पांगरमल 15 (7), पिंपळगाव कौंडा 20 (6), पिंपळगाव लांडगा 20 (5), राजणी 37 (7), साकत 26 (6), सारोळा बध्दी 12 (6), सोनवाडी पिला 17 (5), उक्कडगाव 28 (5), दहिगाव 26 (7).

सात तालुक्यांतील बाद अर्जांची संख्या
अकोले तालुक्यातील सदस्यपदाचे 5, श्रीरामपूर तालुक्यातील सरपंचपदाचे 1, पारनेर तालुक्यातील 9 सदस्य व 2 सरपंचपदाचे, पाथर्डी तालुक्यातील 1 सरपंच व 8 सदस्यपदाचे, राहुरी तालुक्यातील 9 सदस्य व 2 सरपंचपदाचे अर्ज बाद झाले. संगमनेर तालुक्यातील 33 सदस्य व 4 सरपंचपदाचे तर श्रीगोंदा तालुक्यातील 6 सदस्यपदाचे अर्ज बाद ठरविण्यात आले आहेत.

The post नगर तालुक्यातील 21 अर्ज झाले बाद; सरपंचपदाचे 7 व सदस्यपदांच्या 14 अर्जांचा समावेश appeared first on पुढारी.

पिंपरी : पुढारी वृत्तसेवा :  पिंपरी-चिंचवड महापालिकेच्या अतिरिक्त आयुक्तपदी स्मिता झगडे यांना डावलून प्रदीप जांभळे यांची नियुक्ती झाली आहे. असे असताना जाणीवपूर्वक जांभळे यांच्या नियंत्रणाखाली झगडे यांचा स्थानिक संस्था कर (एलबीटी) विभाग देण्यात आला. या दोन अधिकार्‍यांत झालेले वाद चव्हाटावर आल्याने अखेर झगडे यांचा विभाग अतिरिक्त आयुक्त उल्हास जगताप यांच्या नियंत्रणात देण्यात आला आहे. राज्य शासनाने अतिरिक्त आयुक्तपदी पालिकेच्याच उपायुक्त असलेल्या झगडे यांची नियुक्ती केली होती. मात्र, आयुक्त तथा प्रशासक शेखर सिंह यांनी त्यांना रूजू करून घेतले नाही.

अखेर ती नियुक्ती रद्द होऊन त्या जागी प्रदीप जांभळे यांची नियुक्ती करण्यात आली. ते रूजू झाल्यानंतर सर्व तीन अतिरिक्त आयुक्तांच्या विभागांच्या जबाबदारीत बदल करण्यात आला. मात्र, उपायुक्त झगडे यांच्याकडील एलबीटी विभाग जाणीवपूर्वक जांभळे यांच्या नियंत्रणाखाली देण्यात आला. दरम्यान, पदोन्नतीपासून वंचित ठेवण्यात आल्याबद्दल झगडे यांनी मॅटमध्ये दाद मागितली. त्यात त्यांनी राज्य शासन, पालिका आयुक्त सिंह व अतिरिक्त आयुक्त जांभळे यांना प्रतिवादी केले आहे.

दुसरीकडे, नियमित बैठका व सभेला उपस्थित राहत नसल्याने जांभळे यांनी झगडे यांच्यावर कारवाई करावी, अशी शिफारस आयुक्तांकडे केली होती. त्यानुसार आयुक्तांनी त्यांना नोटीस बजावली आहे. त्यावरून नवीन वाद सुरू झाला आहे. त्यासंदर्भात पालिका वर्तुळात उलटसुलट चर्चा रंगली आहे. ते वाद वाढत जाऊ नये म्हणून आयुक्तांनी झगडे यांचा एलबीटी विभाग अतिरिक्त आयुक्त जांभळे यांच्याकडून काढून घेतला आहे. तो विभाग अतिरिक्त आयुक्त उल्हास जगताप यांच्याकडे सोपविला आहे.

The post पिंपरी : एलबीटी विभाग अतिरिक्त आयुक्त जगतापांकडे appeared first on पुढारी.

अमोल कांकरिया : 

पाथर्डी तालुका : ’कानून के हात बहुत लंबे होते है’ हा डायलॉग आपल्याला अनेकदा हिंदी सिनेमातून ऐकायला मिळतो. तसाच काहीसा प्रकार या डायलॉगप्रमाणे खर्‍या आयुष्यात घडला आहे. ते म्हणजे असं की, तब्बल एकोणपन्नास वर्षांनंतर खुनाच्या गुन्ह्यातील फरार आरोपीला पाथर्डी पोलिसांनी शोधून ताब्यात घेतले आहे. पाथर्डी तालुक्यातील रांजणी येथील शिवराम उर्फ सीताराम तात्याबा भताने (वय 77) असे अटक केलेल्या आरोपीचे नाव आहे.

गुजरातमधील अहमदाबाद शहरातील सरदार पोलिस ठाण्याच्या हद्दीत सन 1973 साली भादंवि कलम 302, 382 अन्वये चोरी करून खून केल्याचा गुन्हा दाखल झाला होता. त्यानंतर गुजरात पोलिसांना यातील आरोपीचे नाव सीताराम तात्याबा भताने (रा. रांजणी, ता.पाथर्डी, जि. नगर) असे असल्याचे निष्पन्न झाले होते.

गुन्हा घडल्यापासून तो गुजरात पोलिसांच्या हाती आला नव्हता. आरोपी भताने याने आपल्या मूळ गावी रांजणी येथे येऊन आपले मूळ नाव सिताराम हे बदलून शिवराम केले. गुजरात पोलिसांकडून आरोपीचा शोध सुरूच होता. वेळोवेळी गुजरात पोलिसांनी महाराष्ट्र पोलिसांकडे यासंदर्भात माहिती घेतली. पण, हा आरोपी मिळून येत नव्हता.

मात्र, ’कानून के हात बहुत लंबे होते है’ या वाक्याप्रमाणे पोलिसांनी अखेर 49 वर्षांपूर्वी गुन्हा घडलेल्या आरोपीला शनिवारी शोधून काढत जेरबंद केले. पाथर्डी पोलिस ठाण्याचे निरीक्षक सुहास चव्हाण यांच्या मार्गदर्शनाखाली सहाय्यक पोलिस निरीक्षक प्रवीण पाटील, पोलिस नाईक राम सोनवणे, अतुल शेळके, भारत अंगरखे यांनी ही कारवाई केली.

नाव बदलून राहत होता भताने

आरोपी भताने हा वेगवेगळी नावे बदलून राहत होता. विधानसभा निवडणुकीच्या पार्श्वभूमीवर गुजरात पोलिसांनी अहमदनगर पोलिसांना भताने याचा शोध घेऊन ताब्यात देण्याची मागणी केली होती. पाथर्डी पोलिसांनी भताने याचा आठ दिवस कसून शोध घेत, त्याला ताब्यात घेतले. अखेर एकोणपन्नास वर्षांनंतर आरोपी जेरबंद झाला.

गुजरात पोलिसांच्या ताब्यात देणार

आरोपी भताने हा लाकडी काठीचा आधार घेऊन चालत होता. तसेच, तो हा गुन्हा लपविण्यासाठी कीर्तन, भजन अशा कार्यक्रमात सहभागी होत असे. वेगवेगळ्या धार्मिक ठिकाणी त्याने वास्तव्य केले. पाथर्डी पोलिस आरोपी भताने याला गुजरात पोलिसांच्या स्वाधीन करणार असून, पुढील कायदेशीर प्रक्रिया पार पाडली जाणार आहे.

The post कानून के हात बहुत लंबे होते हैं..! एकोणपन्नास वर्षांपासून फरार असलेला आरोपी जेरबंद appeared first on पुढारी.

बोधेगाव : पुढारी वृत्तसेवा :  शेवगाव तालुक्याच्या पूर्व भागातील अतिवृष्टीग्रस्त बोधेगाव महसूल मंडळातील 22 गावे आणि चापडगाव महसूल मंडळातील 16 गावातील शेतकर्‍यांच्या नजरा आता मायबाप सरकारच्या मदतीकडे लागल्या आहेत. आज येईल, उद्या येईल, या आशेवर शेतकरी तग धरुन आहेत. नुकसान भरपाईचे अर्ज भरून दिले, पंचनामे होऊनही दीड महिना झाला. मग, मदतीचे अनुदान मिळणार तरी कधी, असा सवाल अतिवृष्टीग्रस्त शेतकरी विचारताना दिसत आहेत.

तालुक्याच्या पूर्व भागात 17 आणि 18 ऑक्टोबरला मध्यरात्रीनंतर सलग दोन तास मेघगर्जनेसह मुसळधार पाऊस झाला. त्यानंतर पहाटे थांबून थांबून कमी-अधिक प्रमाणात पावसाच्या सरी कोसळत होत्या. त्या अगोदरच आठवडाभरापासून या भागात दररोज पावसाच्या सरी कोसळत होत्या. सततधार पावसाने खरीप पिके धोक्यात आली असतानाच अतिवृष्टी झाली. त्यामुळे संपूर्ण खरीप हंगाम पाण्यात गेला होता. वेचणीस आलेल्या कपाशी, फुलोर्‍यात आलेल्या तुरी, काढणीसाठी आलेले सोयाबीन, मूग , बाजरी, उडीद आदी पिकांना जलसमाधी मिळाली होती. हजारो हेक्टर पिकांत गुडघाभर पाणी साचले होते. फुटलेल्या कापसाच्या वाती झाल्या होत्या. कोणतेच पीक एक टक्कासुध्दा शेतकर्‍यांच्या हातात आले नाही. हातातोंडाशी आलेला घास निसर्गाने एका रात्रीत हिरावून घेतला होता. काही तासात होत्याचे नव्हते झाले होते.

चापडगाव, राक्षी, गदेवाडी, सोनविहीर, मुंगी, कांबी, हातगाव, बोधेगाव, शेकटे, बालमटाकळी, मुरमी, गायकवाड जळगाव, सुकळी, लाडजळगाव, दिवटे, अंतरवली, अधोडी या गावांतील पिके आधीच्या पावसाने 70 टक्के गेली होती. त्यात अतिवृष्टीने सगळेच पाण्यात गेले होते. जवळपास 38 गावात खरीप पिकांना जलसमाधी मिळाली होती. उंच बांधावरून कोणत्याही दिशेने पाहिले तर नजर पुरेपर्यंत पिकात पाणीच पाणी दिसत होते. समुद्रात जलपर्णी असल्या सारखे दृश्य सगळीकडे दिसत होते.

संपूर्ण खरीप हंगाम पाण्यात गेल्याने शेतकर्‍यांना सरसकट नुकसान भरपाई द्यावी, अशी मागणी विरोधक आणि सत्ताधार्‍यांनी केली. मोर्चे, आंदोलने झाली. त्यानंतर 25 ऑक्टेबरला राज्याचे महसूलमंत्री तथा जिल्ह्याचे पालकमंत्री राधाकृष्ण विखे यांनी या भागात बोधेगाव, बालमटाकळी, लाडजळगाव शिवारात शेतात जाऊन अतिवृष्टीने नुकसान झालेल्या पिकांची पाहणी करून शेतकर्‍यांना आधार दिला. शेवगाव तालुक्यातील जवळपास 62 हजार हेक्टर क्षेत्र शंभर टक्के बाधित झाल्याचे त्यांनी कबूल केले आणि आठ दिवसात पंचनामे पूर्ण करण्याचे प्रशासनाला आदेश देऊन लवकरात लवकर शेतकर्‍यांना भरीव मदत देण्याची घोषणा बांधावरच केली होती.

त्याला आता दीड महिना होत आला आहे. मदतीची दमडीसुद्धा अजूनपर्यंत शेतकर्‍यांच्या बँक खात्यावर आलेली नाही. मोठ्या आशेने शेतकरी पासबुक घेऊन बँकेत जातात आणि ’साहेब काही खात्यावर आलयं का बघा ’, अशी केविलवाणी विचारणा बँक कर्मचार्‍यांना करताना दिसत आहेत. पालकमंत्र्यांनी केलेली घोषणा हवेत विरली की काय? अशी कुजबुज बँकेच्या परिसरात शेतकरी करताना दिसत आहेत.

खरे तर खरिपासोबत रब्बीचा हंगाम सुद्धा शेतकर्‍यांच्या हातातून गेला आहे. कारण अजूनही या भागात जमिनीतून पाणी वाहत आहे. वापसा होत नसल्याने गहू, हरबरा, ज्वारी, भाजीपाला, इत्यादी पिकांसाठी रान तयार करता येत नाही. वापसा होणार कधी आणि रब्बी पिकांची लागवड करणार कधी, या विवंचनेत शेतकरी आहेत.

सरकार शेतकर्‍याच्या पाठिशी आहे, लवकरात लवकर भरीव मदत देण्याची घोषण पालकमंत्री विखे यांनी केली खरी. पण आता शेतकर्‍यांचे कंबरडे मोडले आहे. सरकार शेतकर्‍यांच्या पाठीशी कधी उभे राहणार आणि मदत कधी देणार ? याकडेच आता शेतकर्‍यांच्या नजरा लागल्या आहेत.

The post बोधेगाव : अतिवृष्टीचे अनुदान कधी मिळणार? appeared first on पुढारी.