हातात तलवार घेऊन फेसबुकवर टाकली स्टोरी आणि पोलिसांनी दिला चांगलाच दणका!

July 25, 2021 Marathi 0 Comments

: शहरातील काही युवक हातात तलवारी घेऊन फेसबुक स्टोरी टाकत दहशत निर्माण करत असल्याचे लक्षात येताच पोलिसांनी त्यांच्यावर कारवाई केली आहे. घटनास्थळावरून सहा जांबिया चाकू, दोन कट्यार, दोन लहान जंबिया चाकू असा साठा जप्त करण्यात आला असून एकूण २१ हजार ३०० रुपये किमतीचा माल जप्त करण्यात आला आहे. अंजनगाव सुर्जी पोलिस स्टेशन अंतर्गत येणाऱ्या वानखडे पेठ इथं ही घटना घडली आहे. याप्रकरणी आरोपींविरुद्ध गुन्हे दाखल करण्यात आले आहे. या कारवाईमुळे हातात तलवार घेऊन केक कापणे आणि समाज माध्यमांवर स्टोरी अपलोड करणाऱ्यांमध्ये भीतीचं वातावरण निर्माण झालं आहे. अंजनगाव वानखडे पेठ येथील विकी उर्फ जबेरा साहेबराव वानखडे याने त्याच्या मोबाईलवर हातात लोखंडी तलवार घेऊन स्टोरी अपलोड केल्याची माहिती मिळाल्यानंतर पोलिसांकडून ही कारवाई करण्यात आली. पोलिसांनी विकी याला आवाज दिला व त्याचा मोबाईल चेक केला असता त्यांना फेसबुकवर स्टोरी अपलोड असल्याचे दिसले. विचारपूस केली असता त्याने कसबेगव्हाण येथे अजय अशोक आसलकर याची तलवार घेऊन हा फोटो काढल्याचे सांगितले. यावरून अजय असलकर याला नवीन बस स्टॅन्डवरून लोखंडी तलवार, धारदार पितळ असलेली टोकदार तलवार पंचम जप्त करण्यात आली. त्याला विश्वासात घेऊन विचारपूस केली असता त्याने सदर तलवार काटपुरा येथील चेतन चंदनपत्री यांच्याकडून घेतल्याचे सांगितले. चेतन चंदनपत्री यांच्या घराची झडती घेतल्यावर पोलिसांना त्याच्या घरातील सज्जावरून चार लोखंडी तलवारी व दहा लोखंडी चाकू मिळाले. ही कारवाई शनिवार दिनांक २४ जुलै रोजी करण्यात आली. या कारवाईत आरोपी चेतन चंदू चंदनपत्री (२१) विकी उर्फ जबेरा साहेबराव वानखडे( २२ ), अजय अशोक आसोलकर (२४) यांनी बेकायदेशीररित्या घातक शस्त्र बाळगल्याप्रकरणी शस्त्र अधिनियम अन्वये गुन्हा दाखल करण्यात आला असून २१ हजार ३०० रुपयांचा मुद्देमाल जप्त करण्यात आला आहे.