सोलापुरात युवा सेनेचे दोन गट आमने-सामने; बैठक रद्द करण्याची नामुष्की!

July 25, 2021 Marathi 0 Comments

: युवासेनेचे जिल्हाप्रमुख मनीष काळजे यांची पदावरून हकालपट्टी करण्याच्या मागणीसाठी सोलापुरात युवासेनेचे शहर युवा अधिकारी विठ्ठल वानकर आणि मनीष काळजे यांचे गट शनिवारी आमने-सामने आले. एकमेकांच्या विरोधात निषेधाच्या घोषणा देण्यात आल्या. या संपूर्ण प्रकारामुळे सोलापुरातील शासकीय विश्रामगृहामध्ये आयोजित करण्यात आलेली पदाधिकाऱ्यांची बैठक रद्द करण्यात आली. विश्रामगृहावरील बैठकीपूर्वी गोंधळाची परिस्थिती निर्माण झाल्यामुळे तातडीने पोलिस घटनास्थळी दाखल झाले. तिन्ही कार्यकर्त्यांच्या हातातील निषेधाचे फलक पोलिसांनी जप्त केले. तसंच पोलिसांची परवानगी न घेता बैठक आयोजित केलीच कशी? असा सवाल करत पोलिसांनी युवा सैनिकांना गर्दी कमी करण्याच्या सूचना दिल्या. युवासेनेचे राज्य विस्तारक विपुल पिंगळे हे बैठकीसाठी विश्रामगृहात बसलेले असताना आणि सर्वजण बैठकीला जात असताना अचानक काळजे आणि वानकर यांचे कार्यकर्ते एकमेकांना भिडले आणि एकच गोंधळ उडाला. आगामी महापालिका, नगरपालिका, पंचायत समिती तसेच विधानपरिषद निवडणुकीसाठी युवा सेनेच्या पदाधिकाऱ्यांची बैठक घेण्यात येत आहेत. शनिवारी युवासेनेचे राज्य विस्तारक विपुल पिंगळे यांच्या प्रमुख उपस्थितीत विश्रामगृह येथे दुपारी पदाधिकारी बैठक होणार होती. त्यासाठी जिल्हाप्रमुख मनीष काळजे व शहर युवा अधिकारी यांचे समर्थक पदाधिकारी व कार्यकर्ते विश्रामगृह येथे जमले होते. बैठकीला सुरुवात होणार इतक्यात युवासेनेचे पदाधिकारी बालाजी चौगुले आपल्या कार्यकर्त्यांसह विश्रामगृहाच्या पोर्चमध्ये हातात काळजे यांच्या निषेधाचे फलक घेऊन घोषणाबाजी करत आले. बराचवेळ घोषणा सुरु होत्या. याची माहिती समजताच मनीष काळजे व त्यांचे समर्थकसुद्धा आतून बाहेर येऊन वानकर यांच्याविरोधात घोषणा देऊ लागले. पदाधिकारी आणि कार्यकर्ते आमने-सामने येऊन गोंधळ अधिक वाढत गेला. वातावरण तापल्याने युवासेनेचे शहर युवा अधिकारी विठ्ठल वानकर यांनी समोर येऊन कार्यकर्त्यांना घोषणाबाजी थांबवण्याची विनंती केली. दुसकीकडे काळजे यांच्या समर्थकांनी थेट वानकर यांच्याविरोधात घोषणाबाजी करुन लक्ष वेधून घेतले. दरम्यान, गोंधळ सुरू झाल्यामुळे आणि पोलिस आल्यामुळे सर्वत्र पांगापांग झाली. बैठक रद्द करण्यात आल्यानंतर दोन्ही गटाचे कार्यकर्ते निघून गेले.