राज्यात करोना लशीचा तुटवडा; आरोग्यमंत्र्यांनी व्यक्त केली 'ही' भीती

April 07, 2021 Marathi 0 Comments

मुंबईः राज्यात करोनाबाधितांची संख्या वाढत असतानाच आणखी एक संकट राज्यावर चालून आले आहे. राज्यातील विविध लसीकरण केंद्रांवर करोनावरील लशीचा तुटवडा जाणवू लागला आहे. महाराष्ट्रात वेळेत लसीचा पुरवठा न झाल्यास तीन दिवसांत लसीकरण बंद पडण्याची भीती आरोग्यमंत्री यांनी व्यक्त केली आहे. मंगळवारी केंद्रीय आरोग्यमंत्री हर्षवर्धन यांची ११ राज्याच्या आरोग्यमंत्र्यांसोबत बैठक पार पडली. व्हिडिओ कॉन्फरन्सिंगच्या माध्यमातून बैठक पार पडली. या बैठकीत राजेश टोपे यांनी लसीकरणाचा तुटवडा यासंदर्भात केंद्राला महत्त्वाच्या सूचना केल्या आहेत. 'सध्या महाराष्ट्रात १४ लाख करोनावरील लसीचा पुरवठा आहे. हा पुरवठा ३ दिवसांपर्यंतच पुरेल. म्हणून केंद्राकडे आम्ही प्रत्येक आठवड्याला ४० लाख करोना लसीचे डोस पुरवण्याची मागणी केली आहे,' असंही राजेश टोपे यांनी म्हटलं आहे. 'लसीकरण केंद्रावर पुरेसे लसीचे डोस उपलब्ध नसल्यानं अनेकांना पुन्हा परत पाठवण्यात येत आहे. केंद्र सरकार लसीचा पुरवठा करत नाही असं मी म्हणणार नाही पण त्याचा आणखी वेग वाढवता येईल. तसंच, २० ते ४० वयोगटातील जनतेला प्रधान्यानं लसीकरणाची परवानगी द्यावी,' अशी मागणी आरोग्यमंत्र्यांनी केंद्राकडे केली आहे. 'ऑक्सिजनचा तुटवडा भासण्याची शक्यता असून आम्हाला जवळच्या राज्यातून ऑक्सिजन पुरवठा केला पाहिजे, अशी मागणीही केली. ही मागणीची केंद्रानं गांभीर्यानं नोंद केली आहे. तसंच, ऑक्सिजनचा तुटवडा भासल्यास ऑक्सिजनचा वापर करणाऱ्या कंपन्या बंद करण्यात येतील. पण रुग्णालयात ऑक्सिजनची कमतरता भासू देणार नाही,' असं आश्वासनही राजेश टोपे यांनी दिलं आहे.