'एनसीबीचे आरोपपत्र म्हणजे अपेक्षाभंग'

March 07, 2021 Marathi 0 Comments

म. टा. विशेष प्रतिनिधी, मुंबई 'अमली पदार्थ प्रकरणात नार्कोटिक्स कंट्रोल ब्युरोने () १२ हजार पानी आरोपपत्र दाखल करणे अपेक्षित होते. मात्र, त्यात न्यायालयात मान्य होऊ न शकणारे पुरावे आणि एनडीपीएस कायद्याच्या कलम ६७ अन्वये नोंदवलेल्या जबाबांचा आधार सर्वोच्च न्यायालयाने दिलेल्या तूफान सिंग निवाड्यानंतरही घेण्यात आला आहे. ते पाहता, हे आरोपपत्र म्हणजे अपेक्षाभंग आहे', असा दावा या प्रकरणात आरोपी असलेली अभिनेत्री यांचे वकील अॅड. सतीश मानेशिंदे यांनी शनिवारी केला. 'एनसीबीच्या वरिष्ठ ते कनिष्ठ अधिकाऱ्यांपर्यंत सर्वांनी अमलीपदार्थांचे बॉलीवूड कनेक्शन उजेडात आणण्याचे प्रयत्न केले. तपासादरम्यान अनेक बड्या व्यक्तींची चौकशीसाठी एकप्रकारे परेडही झाली. मात्र, आरोपपत्रात त्यापैकी कोणाहीविरुद्ध काहीच नाही, हे आश्चर्यच आहे. म्हणजे त्यांच्याविरुद्धचे आरोप खोटे होते की काय, हे देवालाच ठाऊक. या प्रकरणात कसेही करून रिया चक्रवर्तीला अडकवायचे, यावरच एनसीबीने आपल्या प्रयत्नांवर जोर दिला. परंतु, आरोपपत्रात नावे असलेल्या ३३ आरोपींकडून एकूण जितके अमली पदार्थ जप्त केल्याचे दाखवण्यात आले आहे; ते पाहता मुंबई पोलिसांचा एखादा कॉन्स्टेबल किंवा अमलीपदार्थ प्रतिबंधक कक्ष किंवा विमानतळावर सीमाशुल्क विभाग किंवा अन्य तपास संस्थेकडून एकाच छाप्यात अमली पदार्थांचा जेवढा साठा जप्त होतो, त्यासमोर ते काहीच नाही. मात्र, रिया चक्रवर्तीला आरोपी दाखवले नसते तर या खटल्यात काहीच उरले नसते. रियाला जामीन मंजूर करताना, तिने अमली पदार्थांविषयी कथित वित्तपुरवठा केल्याच्या आरोपांविषयी प्रथमदर्शनी पुरावे नसल्याचे उच्च न्यायालयाने नमूद केले होते. त्यामुळे अखेरीस सत्याचाच विजय होणार आहे', असेही मानेशिंदे यांनी प्रसार माध्यमांना पाठवलेल्या प्रतिक्रियेत नमूद केले.