पत्नीच्या चारित्र्यावर घेत होता संशय; भांडण झाल्यानंतर पतीने...
पुणे: पुण्यातील परिसरात एक धक्कादायक घटना उघडकीस आली आहे. पत्नीच्या चारित्र्यावर संशय घेत पतीने तिच्याशी वाद घातला. त्याचदरम्यान पत्नीचे डोके भिंतीवर आपटले. यात तिचा मृत्यू झाला. पत्नीचा रुग्णालयात मृत्यू झाला. या प्रकरणी हडपसर पोलिसांनी पतीविरोधात हत्येचा गुन्हा दाखल केला आहे. संगिता राजेश सोनी असे २२ वर्षीय मृत महिलेचे नाव आहे. या प्रकरणी राजेश सोनी याच्याविरोधात हत्येचा गुन्हा दाखल करण्यात आला आहे. संगिताचा भाऊ नबीन जलाना याने या प्रकरणी हडपसर पोलिसांत तक्रार दाखल केली होती. मिळालेल्या माहितीनुसार, राजेश आणि संगिता सोनी हे पुण्यातील फुरसुंगी परिसरात राहत होते. काही वर्षांपूर्वी त्यांचे लग्न झाले होते. पती संगिताच्या चारित्र्यावर संशय घेत होता. यावरून त्यांच्यात नेहमी भांडणे होत होती. १७ जानेवारीला त्यांच्यात पुन्हा वाद झाला. कोणत्या मुलासोबत बोलतेस अशी विचारणा करून मारहाण केली. त्यानंतर तिचे डोके भिंतीवर आपटले. यात ती गंभीर जखमी झाली. भानावर आलेल्या राजेशने संगिताला रुग्णालयात दाखल केले. दुचाकी घसरून पडल्याने पत्नीच्या डोक्याला दुखापत झाल्याचा बनाव त्याने रचला. रुग्णालयात उपचार सुरू असताना संगिताचा मृत्यू झाला. यानंतर महिलेच्या भावाने हडपसर पोलिसांत तक्रार दाखल केली. महिलेचा मृत्यू मारहाणीत झाल्याचे स्पष्ट झाल्यानंतर पोलिसांनी आरोपीविरोधात गुन्हा दाखल केला आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
0 Comments: