चंद्रकांत पाटलांनी शहराध्यक्षांना झापले, नवीन कार्यकारिणीवरून भाजपमध्ये गटबाजी?

December 28, 2021 Marathi 0 Comments

औरंगाबाद : आगामी महानगरपालिका निवडणूक डोळ्यासमोर ठेवून भाजपचे शहर जिल्हाध्यक्ष संजय केणेकर यांनी सोमवारी पक्षाच्या कार्यकारिणी विस्ताराची घोषणा केली. मात्र, या नवीन कार्यकारिणीचा विस्तार करण्याचा निर्णय भाजप प्रदेशाध्यक्ष चंद्रकांत पाटील यांना पचनी पडला नसून, त्यांनी केणेकर यांना यावरून चांगलेच झापले असल्याचं भाजपच्या गटात चर्चा आहे. सोमवारी केणेकर यांनी १० शहरउपाध्यक्ष, ०९ शहरजिल्हा सचिव आणि ०१ अध्यात्मिक आघाडी शहर संयोजक पदासाठी एकूण २० लोकांच्या नावाची घोषणा केली. मात्र यावरून आता पक्षातील अंतर्गत गटबाजी चव्हाट्यावर आल्याची चर्चा असून, शहरातील अनेक भाजपचे जेष्ठ नेते या नवीन कार्यकारिणीवरून नाराज असल्याचे बोलले जात आहे. त्यामुळे प्रकरण थेट प्रदेशाध्यक्ष पाटील यांच्याकडे पोहोचले. केंद्रीय अर्थ राज्यमंत्री डॉ. भागवत कराड, पक्षाचे प्रदेश सरचिटणीस तथा भाजप आमदार अतुल सावे शहरात नसताना केणेकर यांनी कार्यकारिणीचा केलेला विस्तार चंद्रकांत पाटलांनाही पटलेला नाही. त्यामुळे यावरून चंद्रकांत पाटील यांनी केणेकर यांची खरडपट्टी केली असल्याचं बोलले जात आहे. तर केणेकर यांनी आपल्याच गटातील लोकांना संधी दिल्याचा सुरू शहरातील भाजप नेत्यांमध्ये पाहायला मिळत आहे. निवडणूकपूर्वी नाराजीनाट्य.... महानगरपालिका निवडणुका काही महिन्यांवर आल्यास असतानाच भाजपमधील गटबाजी पक्षाला परवडणारे नाही. आधीच शिवसेनेला राष्ट्रवादी-काँग्रेसचे बळ मिळाले असताना, एकट्या भाजपला या तिन्ही पक्षाविरोधात मैदानात उतरण्यासाठी संघटनेच बळ हवं आहे. मात्र, अशापद्धतीने गटबाजी सुरू राहिली तर भाजपच्या अडचणी वाढू शकतात.