दक्षिण मुंबईतून ठाण्यापर्यंत सुसाट; इर्स्टन फ्रीवेचा ठाण्यापर्यंत विस्तार करण्याचे नियोजन

March 09, 2022 Marathi 0 Comments

पूर्व मुक्त मार्गाचा आनंदनगरपर्यंत विस्तार करण्याचे नियोजन म. टा. प्रतिनिधी मुंबई : दक्षिण मुंबईतून विनाअडथळा ठाण्यात पोहचण्याचा मार्ग मोकळा होणार आहे. पूर्व मुक्त मार्गाचा ठाण्यापर्यंत विस्तार करण्यात येणार आहे. त्यादृष्टीने मुंबई महानगर प्रदेश विकास प्राधिकरणाने (एमएमआरडीए) नियोजन केले असून या प्रकल्पाची सुसाध्यता तपासण्यासाठी सल्लागाराची नियुक्तीची प्रक्रिया सुरू केली आहे. दक्षिण मुंबईला पूर्व उपनगरांशी थेट जोडण्यासाठी पूर्व मुक्त मार्ग महत्त्वाचा आहे. हा रस्ता १६.८ किलोमीटर लांब असून दक्षिण मुंबईत पी डिमेलो रस्त्यावर सुरू होतो. या मार्गाचा शेवट पूर्व द्रुतगती मार्गावर छेडानगर जंक्शन जवळ होतो. हा मार्ग २०१३मध्ये सुरू झाला. या मार्गामुळे दक्षिण मुंबईतील डॉ. बाबासाहेब आंबेडकर मार्ग, रफी अहमद किडवई मार्ग, पोर्ट ट्रस्ट रोड, पी डिमेलो रोड आणि पूर्व द्रुतगती मार्गावर येणारा वाहतुकीचा ताण कमी करण्यास मदत झाली. दक्षिण मुंबईतून पूर्व उपनगरांत जाणाऱ्या वाहनांचा प्रवास या रस्त्यामुळे वेगवान झाला. या मार्गाचा शेवट चेंबूरजवळ छेडानगर जंक्शन येथे होतो. सद्यस्थितीत दक्षिण मुंबईतून ठाण्याकडे जाणाऱ्या वाहनांना छेडानगर जंक्शन येथून पूर्व द्रुतगती मार्गावरून प्रवास करावा लागतो. मात्र ठाण्याच्या वेशीवर मुलुंड चेक नाक्याजवळ वाहतूककोंडीत वाहनांना अडकून पडावे लागते. या कोंडीतून वाहनचालकांची मुक्तता होण्यासाठी आणि मुंबई-ठाणे प्रवास जलद व्हावा याकरिता पूर्व मुक्त मार्गाचा थेट ठाण्यापर्यंत विस्तार करण्याचा एमएमआरडीएकडून विचार सुरू आहे. पूर्व द्रुतगती मार्गावर उन्नत मार्गिका उभारून ठाण्यातील आनंदनगरपर्यंत पूर्व मुक्त मार्गाचा विस्तार केला जाणार आहे. ३,१४८ कोटी रुपयांचा खर्च अपेक्षित छेडानगर जंक्शन ते आनंदनगर असा ११.९ किलोमीटर लांबी हा मार्ग असणार आहे. या प्रकल्पाला एमएमआरडीए प्राधिकरणाच्या नोव्हेंबर २०२१मध्ये पार पडलेल्या बैठकीत मान्यता देण्यात आली होती. या प्रकल्पासाठी सुमारे ३,१४८ कोटी रुपयांचा खर्च अपेक्षित आहे. या प्रकल्पाला गती देण्यासाठी नुकत्याच सादर झालेल्या एमएमआरडीएच्या अर्थसंकल्पात १५० कोटी रुपयांची तरतूद करण्यात आली आहे. सल्लागाराची नियुक्ती प्रकल्पाची व्यवहार्यता तपासण्यासाठी एमएमआरडीएकडून सल्लागाराची नियुक्ती करण्यासाठी निविदा मागविण्यात आली आहे. सल्लागाराकडून प्रकल्पाची व्यवहार्यता तपासण्यासह निविदा पूर्व प्रक्रीया पूर्ण केली जाणार आहे. त्यानंतर प्रत्यक्ष निविदा प्रक्रीया राबवून येत्या वर्षभरात या प्रकल्पाच्या प्रत्यक्षातील कामाला सुरुवात केली जाणार आहे. ... असा असेल मार्ग छेडानगर जंक्शन ते आनंदनगर (ठाणे) लांबी - ११.९ किलोमीटर संपूर्ण उन्नत मार्ग प्रकल्पाचा अंदाजित खर्च - ३,१४८ कोटी रुपये. एमएमआरडीएच्या यंदाच्या अर्थसंकल्पात तरतूद - १५० कोटी रुपये