'तुमचे अशील खूपच हुशार'; माहिती दडवल्याबद्दल सचिन वाझेंना उच्च न्यायालयाने फटकारले

March 02, 2022 Marathi 0 Comments

म. टा. विशेष प्रतिनिधी, मुंबईः 'काही विशिष्ट माहिती न्यायालयापर्यंत येऊ द्यायची नाही, असा तुमच्या अशिलाचा () हेतू आहे. तुमचा अशील खूप हुशार असून तो एक पाऊल पुढे आहे', असे उद्गार काढत याचिकेत संबंधित प्रतिज्ञापत्रच नसल्याबद्दल मुंबई उच्च न्यायालयाने मंगळवारी वाझेंना फटकारले. त्याचबरोबर याचिका ताशेऱ्यांसह फेटाळण्याचे संकेतही न्या. गौतम पटेल व न्या. माधव जामदार यांच्या खंडपीठाने दिले. अखेर वाझे यांच्याशी सल्लामसलत करून म्हणणे मांडू, असे त्यांच्या वकिलांनी सांगितल्याने खंडपीठाने बुधवारी पुन्हा सुनावणी ठेवली. माजी मुंबई पोलिस आयुक्त परमबीर सिंह यांनी माजी गृहमंत्री अनिल देशमुख यांच्यावर केलेल्या भ्रष्टाचाराच्या आरोपांची सत्यता तपासण्यासाठी राज्य सरकारने निवृत्त न्यायमूर्ती के. यु. चांदिवाल यांचा चौकशी आयोग नेमला आहे. या आयोगासमोर साक्ष व उलटतपासणीत माहिती देताना 'देशमुख किंवा त्यांच्या सहायकांनी माझ्याकडे पैशांसाठी मागणी केली नव्हती. मी त्यांना पैसे दिले नाहीत. तसेच मुंबईतील बार अँड रेस्टॉरंट मालकांकडून मी पैसे गोळा केले नाहीत', असे वाझे यांनी म्हटले होते. मात्र, नंतर ते म्हणणे मागे घेण्याची परवानगी मागणाऱ्या अर्जासह अन्य काही अर्ज वाझे यांनी केले होते. परंतु, 'सत्य हे वाझे यांच्या लहरीपणावर हेलकावे घेत असल्याचे दिसत आहे. त्यांनी साक्ष व उलटतपासणीत विचारपूर्वक उत्तरे दिली होती. शिवाय त्या नोंदींची तपासणीही नियमाप्रमाणे स्वत:च करून घेतली होती. त्यांच्यावर आयोगाला कधीही कोणताही दबाव असल्याचे दिसले नाही आणि त्यांनीही कधीच दबाव असल्याचे म्हटले नव्हते. आता अचानक इतक्या दिवसांनी म्हणणे मागे घेण्यासाठी अर्ज केला आहे. यावरून कोणाला तरी वाचवण्याच्या प्रयत्नातूनच त्यांनी हे पाऊल टाकल्याचे दिसते', असे निरीक्षण नोंदवत न्या. चांदिवाल यांनी वाझे यांची विनंती फेटाळली होती. त्याला वाझे यांनी रिट याचिकेद्वारे उच्च न्यायालयात आव्हान दिले आहे. त्याविषयी मंगळवारी सुनावणी झाली. तेव्हा, याचिकेत आयोगाला प्रतिवादीच करण्यात आले नसल्याचे सरकारी वकील अभय पत्की यांनी निदर्शनास आणले असता खंडपीठाने त्याची नोंद घेतली. तर 'आयोगाने अत्यंत चुकीची निरीक्षणे नोंदवत वाझेंचे अर्ज फेटाळले. आयोगाने सत्य बाहेर येण्याच्या दृष्टीने सुनावणी घेणे आवश्यक आहे', असा युक्तिवाद वाझेंच्या वकिलांनी मांडला. मात्र, त्याचवेळी वाझे यांच्या याचिकेत काही विशिष्ट प्रतिज्ञापत्रांचा संदर्भ असला तरी ते याचिकेसोबत जोडलेलेच नाहीत, असे निदर्शनास आणत वाझेंच्या हेतूविषयी शंका उपस्थित केली. तसेच याचिका मागे घेणार नसल्यास ती ताशेऱ्यांसह फेटाळण्याचे संकेत दिले. अखेरीस 'सध्या तुरुंगात असलेल्या वाझे यांना बुधवारी (आज) आयोगासमोर कार्यवाहीसाठी हजर केले जाणार आहे. त्यावेळी त्यांच्याशी सल्लामसलत करून भूमिका स्पष्ट करू', असे वकिलांनी सांगितले. त्यामुळे खंडपीठाने याचिकेवर आज दुपारी १२ वाजता पुन्हा सुनावणी ठेवली.