पारा वाढणार! राज्यातील 'या' जिल्ह्यात उन्हाच्या झळा तीव्र होणार

March 02, 2022 Marathi 0 Comments

'आयएमडी'चा अंदाज; कोकण, पश्चिम, उत्तर महाराष्ट्रात किमान, कमाल तापमान सरासरीच्यावर राहण्याची शक्यता म. टा. प्रतिनिधी, पुणे: मार्च ते मे या उन्हाळाच्या कालावधीत कोकण, पश्चिम आणि उत्तर महाराष्ट्रात कमाल आणि किमान तापमान सरासरी किंवा त्यापेक्षा जास्त राहणार असल्याचा अंदाज भारतीय हवामानशास्त्र विभागाने (आयएमडी) वर्तवला आहे. देशभरात मार्च महिन्यात पावसाचे प्रमाण सर्वसाधारण राहणार असून, राज्याचा दक्षिण भाग वगळता इतरत्र पाऊस सरासरीखाली राहील, असेही आयएमडीच्या अंदाजात म्हटले आहे. आयएमडीचे महासंचालक डॉ. मृत्युंजय महापात्रा यांनी मंगळवारी पत्रकार परिषदेत उन्हाळा; तसेच मार्च महिन्यातील तापमान आणि पावसाचा अंदाज जाहीर केला. पृथ्वीविज्ञान मंत्रालयाने विकसित केलेल्या 'मान्सून मिशन कपल्ड फोरकास्टिंग सिस्टीम'च्या साह्याने 'आयएमडी'तर्फे २०१६ पासून हिवाळा आणि उन्हाळ्याचा विभागवार हंगामी अंदाज देण्यात येतो. यंदाच्या उन्हाळाच्या अंदाजांनुसार जम्मू काश्मीर, लडाख, हिमाचल प्रदेश, राजस्थान, गुजरात, मध्य प्रदेशचा नैऋत्य भाग आणि महाराष्ट्रातील कोकण, पश्चिम आणि उत्तर महाराष्ट्रात कमाल तापमान सरासरीपेक्षा जास्त राहण्याची शक्यता अधिक आहे. देशाच्या उत्तर, वायव्य, मध्य, पूर्व भागांतील बहुतांश राज्यांसह महाराष्ट्रात किनारपट्टी, पश्चिम आणि उत्तर महाराष्ट्र; तसेच विदर्भाच्या काही जिल्ह्यांमध्ये किमान तापमान सरासरीपेक्षा जास्त राहू शकते, असे 'आयएमडी'च्या अंदाजात म्हटले आहे. मार्च महिन्यात महाराष्ट्रात बहुतेक सर्व ठिकाणी कमाल तापमान सरासरीपेक्षा जास्त राहण्याची शक्यता असून, कोकण आणि पश्चिम महाराष्ट्र सोडून इतर जिल्ह्यांमध्ये किमान तापमान सरासरी किंवा त्यापेक्षा कमी राहण्याची शक्यता आहे. या महिन्यात कोल्हापूर, सांगली, सिंधुदुर्ग या जिल्ह्यांमध्ये महिन्याच्या सरासरीइतका किंवा त्यापेक्षा जास्त पाऊस होऊ शकतो. मात्र, राज्यातील इतर जिल्ह्यांमध्ये मार्चमधील पावसाचे प्रमाण सरासरीपेक्षा कमी असेल, असे 'आयएमडी'च्या महिन्याच्या अंदाजात दर्शवले आहे. 'एल निनोची शक्यता नाही' प्रशांत महासागराचे तापमान सध्या सरासरीखाली नोंदले जात असून, पुढील काही महिन्यांत त्यात वाढ होण्याची शक्यता असल्याचे डॉ. महापात्रा यांनी सांगितले. ते म्हणाले, 'सध्या प्रशांत महासागरात ला निना स्थिती असून, तेथील तापमान वाढून उन्हाळ्यात न्यूट्रल स्थिती होण्याची शक्यता आहे. मात्र, यंदा मान्सून काळात 'एल निनो' तयार होण्याची शक्यता नाही. दुसरीकडे, इंडियन ओशन डायपोल (आयओडी) हा घटक सध्या न्यूट्रल स्थितीत असून, तो निगेटिव्ह होण्याची शक्यता काही मॉडेल दर्शवत आहेत. आगामी मान्सून अंदाजाच्या पार्श्वभूमीवर या दोन्ही घटकांच्या नोंदींवर आम्ही लक्ष ठेवून आहोत.'