पुणे, पिंपरीच्या पालिकांवर प्रशासक; कारभारीपदाची सुत्रे महाविकास आघाडीच्या ताब्यात

March 04, 2022 Marathi 0 Comments

म. टा. प्रतिनिधी, पुणेः पुणे आणि पिंपरी-चिंचवड या दोन्ही महापालिकांवरील भारतीय जनता पक्षाचा लोकनियुक्त कारभार पुढील १० दिवसांत संपुष्टात येणार असून, त्यानंतर प्रशासकाच्या माध्यमातून राज्यातील महाविकास आघाडी सरकारच निवडणुका होईपर्यंत पुण्याच्या कारभारीपदाची सूत्रे हाती घेणार आहे. पुणे आणि पिंपरी-चिंचवड या दोन्ही महापालिकांच्या आयुक्तांनाच प्रशासक म्हणून जबाबदारी देण्यात आली आहे. लोकप्रतिनिधींचा कोणताही वचक नसल्याने प्रशासनाच्या कारभारावर वचक कसा राहणार, असा प्रश्न उपस्थित केला जात आहे. दर पाच वर्षांनी पालिकेच्या निवडणुका नियोजित वेळेत होत असल्याने अलीकडच्या काळात महापालिकेवर प्रशासक नेमण्याची घटना अत्यंत दुर्मीळ आहे. या वर्षी करोनाची साथ, ओबीसी आरक्षणाचा घोळ यामुळे निवडणुकीसाठीची प्रभागरचनेची प्रक्रियाच वेळेत सुरू होऊ शकली नाही. त्यामुळे निवडणुका विलंबाने होणार असल्याने प्रथमच महापालिकांचा कारभार प्रशासकाच्या हाती जाणार आहे. नगरविकास विभागाच्या प्रधान सचिवांनी गुरुवारी त्याबाबतचे आदेश महापालिकांना पाठवले आहेत. या दोन्ही महापालिकांमध्ये प्रथमच भाजपची सत्ता आली होती. पुन्हा सत्ता मिळविण्यासाठी भाजपची जोरदार तयारी सुरू असली, तरी प्रारूप प्रभागरचनेद्वारे अनेक प्रभागांची मोडतोड करून महाविकास आघाडीने त्यात रंगत आणली आहे. आता प्रशासकाच्या माध्यमातून महापालिकांवर थेट राज्य सरकारचे नियंत्रण येणार आहे. त्यामुळे आता निवडणूक आयोगाकडून सार्वत्रिक निवडणुका केव्हा जाहीर होणार, महापालिकांवर प्रशासकाचा कारभार किती काळ चालणार, याबाबत विविध तर्क लढविले जात आहेत. या महिन्यात निवडणुका जाहीर झाल्यास प्रशासक कदाचित काही मोजक्या दिवसांपुरताच ठरण्याची शक्यता आहे.