मेट्रोच्या श्रेयवादावरून सर्वांमध्येच स्पर्धा; राजकीय मंडळींच्या विरोधामुळेच मेट्रोला विलंब

March 06, 2022 Marathi 0 Comments

म. टा. प्रतिनिधी, पुणेः पुणे मेट्रोचे भूमिपूजन असो, उद्घाटन असो किंवा जागा मिळविण्यासाठी प्रयत्न असो, अशा प्रत्येक ठिकाणी सर्वच राजकीय पक्षांनी कधी ना कधी विरोध केल्याने मेट्रोच्या वाटेत अनेक अडथळे निर्माण झाले. त्यामुळे भूमिपूजनापासून किमान पहिल्या टप्प्याची सेवा प्रवाशांसाठी खुली होण्यासाठी इतर मेट्रो सेवांच्या तुलनेत पुणे मेट्रोलाच सर्वाधिक कालावधी लागला आहे. मेट्रोच्या श्रेयवादावरून आता सर्वांमध्येच स्पर्धा सुरू असली, तरी अनेक राजकीय मंडळींच्या प्रखर विरोधामुळेच मेट्रोला विलंब झाल्याचे पुणेकरांनी अनुभवले आहे. शहराच्या मेट्रो प्रवासाची सुरुवात खरेतर २१ व्या शतकाच्या सुरुवातीलाच झाली. त्यावेळी मेट्रोच्या एका समितीचे अध्यक्ष असलेल्या शरद पवार यांनी पुणे मेट्रोचा कोणताच अहवाल प्राप्त झालेला नाही, अशी खंत व्यक्त केली होती. त्यानंतर पुण्याचे तत्कालीन खासदार सुरेश कलमाडी यांनी काँग्रेसच्या महापालिकेतील सत्ताकाळात त्याचा सविस्तर प्रकल्प अहवाल (डीपीआर) तयार करून घेण्यासाठी पावले टाकली. हा अहवाल २००९ मध्ये राष्ट्रवादी काँग्रेसच्या सत्ताकाळात महापालिकेला सादर झाला असला, तरी त्यावर अपेक्षित वेगाने कार्यवाही झाली नाही. राष्ट्रवादी काँग्रेसनेच २०१२ च्या महापालिका निवडणुकीच्या जाहीरनाम्यात या 'डीपीआर'ला विरोध करीत पुण्यात भुयारी मेट्रोच हवी अशी जाहीर भूमिका घेतली. त्यानंतर केंद्र सरकारने पुणे मेट्रोच्या अहवालाला तत्त्वतः मान्यता दिली असली, तरी त्यावरील पुढील कार्यवाही पूर्ण करणे गरजेचे होते. लोकसभेच्या २०१४ च्या निवडणुकीत केंद्रात आणि त्यानंतर राज्यात भाजपचे सरकार आल्यानंतर मेट्रोला गती मिळेल, ही अपेक्षा सुरुवातीच्या काही महिन्यांत फोल ठरली. भाजपच्या खासदारांनी मेट्रोला विरोध केला. मुख्यमंत्री देवेंद्र फडणवीस यांनी त्यातून मार्ग शोधण्यासाठी समिती नेमली आणि त्यानंतर दळणवळण मंत्री नितीन गडकरी यांच्या उपस्थितीत झालेल्या बैठकीत अखेर व्यवहार्य तोडगा काढत मेट्रोला गती देण्याचे मान्य केले गेले. या बैठकीला सर्वपक्षीय नेते हजर होते. त्यानंतर, महापालिका निवडणुकांपूर्वी २०१६ च्या डिसेंबरमध्ये पंतप्रधान नरेंद्र मोदी यांच्या हस्ते भूमिपूजन झाले आणि आता त्यांच्या हस्ते मेट्रोचे उद्घाटन केले जात आहे. सर्वच नेत्यांच्या कोलांटउड्या मेट्रोला पाठिंबा आणि विरोध करण्यामध्ये गल्लीपासून ते दिल्लीपर्यंतच्या बहुतेक सर्वच नेत्यांनी अनेक कोलांटउड्या मारल्या आहेत. अनेक मंत्री, खासदार, आमदारांना स्वयंसेवी संस्था किंवा काही इतर संघटनांच्या नेत्यांनी अनेक निवेदने देऊन मेट्रोबाबत शंका उपस्थित केल्या आणि दरवेळी या शंकाच योग्य मानून मेट्रोच्या प्रगतीत खोडा घालण्याचे काम राजकारण्यांनी केले आहे. नागपूर मेट्रोचे भूमिपूजन होते, मग पुण्याचे का नाही? असा जोरदार आवाज काँग्रेस, राष्ट्रवादी काँग्रेस यांनी उठविला. त्या वेळी माजी केंद्रीय नगरविकासमंत्री व्यंकय्या नायडू यांनी दोन दिवसांत मेट्रोला परवानगी देऊ असे जाहीर केले होते. मात्र, त्यासाठी दोन वर्षे वाट पाहावी लागली होती.