गोरेगाव-मुलुंड अंतर कापणार अवघ्या २० मिनिटांत; असा असेल प्रकल्प

March 13, 2022 Marathi 0 Comments

प्रकल्पांतील उड्डाणपुलांचे यांच्या हस्ते भूमिपूजन म. टा. विशेष प्रतिनिधी, मुंबईः गोरेगाव-मुलुंड जोड रस्ता प्रकल्पांतील प्रस्तावित उड्डाणपुलांचे पर्यावरणमंत्री आदित्य ठाकरे यांच्या हस्ते शनिवारी भूमिपूजन करण्यात आले. पूर्व-पश्चिम उपनगरांना जोडणारा हा चौथा महत्त्वाचा जोडरस्ता ठरणार असून गोरेगाव ते मुलुंड अंतर २० मिनिटांत पार करता येणार आहे. सध्या या प्रवासासाठी एक तासाहून अधिक वेळ लागतो. या प्रकल्पासाठी सुमारे आठ हजार कोटी रुपये खर्च होणार आहेत. गोरेगाव-मुलुंड या जोडरस्त्याची लांबी १२.२ किमी असून पश्चिम द्रुतगती मार्ग, गोरेगांव पूर्व येथील ओबेरोय मॉल ते पूर्व द्रुतगती मार्ग, मुलुंड पूर्व येथील ऐरोली नाका चौकापर्यंत हा रस्ता जाणार आहे. ५ बाय ५ मार्गिकांचा हा रस्ता संजय गांधी राष्ट्रीय उद्यानाच्या खालून जाणार आहे. यामध्ये ४.७ किमी लांबीच्या व १३ मीटर व्यासाच्या जोडबोगद्याचा आणि दादासाहेब फाळके चित्रनगरी परिसरातून जाणाऱ्या १.६० किमी लांबीचा पेटी बोगदा आणि पोहोच रस्त्यांच्या बांधकामाचा समावेश आहे. हे बोगदे ३x३ मार्गिकेचे आहेत. या प्रकल्पातील गोरेगाव बाजूकडील ओबेराय मॉल ते फिल्म सिटी या २.८ किमी लांबीच्या रस्त्याच्या रुंदीकरणाचे काम सध्या प्रगतिपथावर आहे. मुलुंड बाजूकडील तानसा पाइपलाइन ते पूर्व द्रुतगती मार्ग जंक्शनपर्यंतच्या २.७ किमी रस्त्याचे रुंदीकरण आणि नाहूर रेल्वे उड्डाणपुलाचे रुंदीकरणाचे काम प्रगतिपथावर आहे. ही कामे २०२२-२३ मध्ये पूर्ण होणे अपेक्षित आहेत. जोडरस्त्यावर होणारी संभाव्य वाहतूक विचारात घेऊन गोरेगाव पूर्व येथील दिंडोशी न्यायालयाजवळून संतोषनगर येथील चौकापर्यंत जाणारा १.२९ किमी लांबीचा ३ x ३ मार्गिकेचा उड्डाणपूल बनविण्यात येणार आहे. या कामांमध्ये दिंडोशी न्यायालयाजवळ पादचाऱ्यांसाठी स्वयंचलित सरकत्या जिन्यासह पादचारी पूल प्रस्तावित आहे. मुलुंड पश्चिम खिंडीपाडा येथील गुरू गोविंद सिंग रस्ता, गोरेगाव-मुलुंड जोडरस्ता आणि खिंडीपाडा येथील भांडुप जलशुद्धीकरण संकुलाचा रस्ता यांच्या चौकातील स्थानिक वाहतुकीसाठी मार्ग प्रस्तावित आहे. तसेच या कामामध्ये खिंडीपाडाजवळील पादचाऱ्यांसाठी जीएमएलआर रस्ता ओलांडण्यासाठी पादचारी पूल हा स्वयंचलित सरकत्या जिन्यासह प्रस्तावित आहे. असा असेल प्रकल्प तानसा पाइपलाइन ते नाहूर रेल्वे पूल येथपर्यंतचा ३ x ३ मार्गिकेचा १.८९ किमी लांबीचा उड्डाणपूल बांधण्यात येणार आहे. डॉ. हेडगेवार चौक येथे १२० मीटर पूल 'केबल स्टे' स्वरूपाचा आहे. तर 'मुंबई मेट्रो-४'च्या खालच्या पातळीवर म्हणजे पहिल्या स्तरावर 'जीएमएलआर' उड्डाणपूल प्रस्तावित आहे. या दोन उड्डाणपुलांचा कंत्राट खर्च ६६६.०६ कोटी इतका असून कामाचा कालावधी ३६ महिने आहे. या दोन्ही पुलाचे बांधकाम, एकल स्तंभावर काँक्रिट सेगमेंटल बॉक्स गर्डर वापरून करण्यात येणार आहे. प्रकल्प चार टप्यांत पहिला टप्पा : नाहूर रेल्वे स्थानकाजवळ उड्डाणपुलाच्या रुंदीकरणाचे बांधकाम दुसरा टप्पा : जोडरस्त्याचे पूर्व आणि पश्चिम उपनगरामध्ये रुंदीकरण तिसरा टप्पा : विविध चौकांवर उड्डाणपूल तसेच संजय गांधी राष्ट्रीय उद्यानाच्या खाली दोन बोगदे प्रस्तावित चौथा टप्पा : पूर्व व पश्चिम द्रुतगती मार्गावरील चौकावर उड्डाणपूल आणि भुयारी मार्ग.