१३० कोटींच्या ३६ मालमत्ता; राजकीय व्यक्तीने पालिकेतील कंत्राटदाराच्या मदतीने गोळा केल्याचा संशय

March 04, 2022 Marathi 0 Comments

- प्राप्तिकर खात्याच्या छाप्यात माहिती उघड म. टा. खास प्रतिनिधी, मुंबईः एका राजकीय व्यक्तीने महापालिकेतील कंत्राटदारांच्या संगनमताने तब्बल १३० कोटी रुपयांच्या ३६ मालमत्ता गोळा केल्या. यातील बहुतांश मालमत्ता बेनामी असल्याचे छाप्यात समोर आले आहे. खात्याने मागील आठवड्यात भायखळा-माझगाव भागात टाकलेल्या छाप्याची ही माहिती खात्यानेच घोषित केली आहे. हा छापा महापालिकेतील स्थायी समिती अध्यक्ष यांच्याकडे टाकला होता, असे सांगितले जात आहे. प्राप्तिकर विभागाने या कारवाईत ३५ हून अधिक ठिकाणी छापे टाकले होते. त्या शोध मोहिमेदरम्यान अनेक संशयित कागदपत्रे आणि डिजिटल पुरावे सापडले असून ते जप्त करण्यात आले आहेत. हे जप्त केलेले पुरावे कंत्राटदार आणि त्या व्यक्तीमध्ये जवळचे संबंध असल्याचे स्पष्ट करतात. ज्या १३० कोटी रुपयांच्या मालमत्तांचे पुरावे सापडले आहेत, त्या मालमत्ता या प्रसिद्ध राजकीय व्यक्तीच्या स्वत:च्या नावावर किंवा त्यांचे सहकारी किंवा बेनामीदारांच्या नावावर घेतलेल्या आहेत. तर आंतरराष्ट्रीय हवाला व्यवहारात त्यांचा सहभाग असल्याचे आणि अवैधरित्या कमावलेले पैसे काही परदेशी अधिकारक्षेत्रात पाठवल्याचे पुरावेही प्राप्तिकर पथकाच्या हाती आले आहेत. त्यादरम्यान कोट्यवधी रुपयांच्या बेहिशेबी रोख पावत्या आणि देयके यांचा तपशील असलेली कागदपत्रे आणि काही डिजिटल पुरावे आहेत. पण त्यांची नोंद खात्याच्या नियमित पुस्तकांमध्ये नाही, असे प्राप्तिकर विभागातील सूत्रांचे म्हणणे आहे. कंत्राटदारांकडून जप्त केलेल्या कागदपत्रांनुसार, खर्च वाढवून करपात्र उत्पन्न दडपण्यासाठी त्यांनी काही विशिष्ट कार्यपद्धतीचा अवलंब केल्याचे समोर आले आहे. उप-कंत्राट खर्चासाठी जास्त कंपन्या दाखवून पावत्या तयार करण्यासह खोट्या खर्चाचा दावा करण्यात आला आहे. काही व्यवहारांनुसार, या कंपन्यांकडून रोख रक्कम काढण्यात आली आहे व त्याचा वापर मालमत्ता खरेदीपोटी बेहिशेबी पैसे देण्यासाठी केल्याचे छाप्यात दिसून आले आहे. या गैरप्रकारांद्वारे कंत्राटदारांनी तब्बल २०० कोटी रुपयांचे उत्पन्न दडवल्याचा प्राथमिक अंदाज प्राप्तिकर विभागाने वर्तवला आहे. दरम्यान, या प्रकरणात आंतरराष्ट्रीय हवाला रॅकेटचा सहभाग असल्याचे समोर आले आहे. त्यामुळेच कंपनी व्यवहार मंत्रालयाकडूनही तपास सुरू करण्यात आला आहे. गंभीर गुन्हे तपास कार्यालयाकडून (स्फिओ) तपास होण्याची शक्यता आहे. २ कोटी रुपयांची रोख प्राप्तिकर विभागाने ३५ ठिकाणी टाकलेल्या या छाप्यादरम्यान तब्बल २ कोटी रुपयांची अघोषित रोख रक्कम विभागाच्या हाती लागली. तसेच दीड कोटी रुपये किमतीचे दागिने जप्त करण्यात आले आहेत. ही मालमत्ता भायखळा परिसरातूनच जप्त झाल्याचे सूत्रांचे म्हणणे आहे.