राज्यात थंडीचा जोर ओसरला; मुंबईत पुन्हा उकाडा वाढला

February 21, 2022 Marathi 0 Comments

म. टा. विशेष प्रतिनिधी, मुंबईः मुंबईतच नव्हे, तर राज्यातही काही ठिकाणी कमाल तापमानामध्ये वाढ झाली आहे. त्यामुळे मुंबईत हळुहळू पुन्हा एकदा उकाड्याची जाणीव होऊ लागली आहे. मुंबईमध्ये सांताक्रूझ येथे ३१.९, तर कुलाबा येथे ३० अंश सेल्सिअस तापमानाची नोंद झाली. त्याचवेळी राज्यात सोलापूर येथे कमाल तापमानाचा पारा ३५ अंशांच्या पलीकडे पोहोचला; तर सांगली येथे ३४.९ अंश सेल्सिअस कमाल तापमानाची नोंद झाली. पुणे, बारामती, परभणी, जळगाव, कोल्हापूर येथेही कमाल तापमान ३३ अंशांपलीकडे पोहोचले आहे. गेल्या दोन-तीन दिवसांपासून मुंबईमध्ये जानेवारीमध्ये जाणवलेला गारठा हळुहळू कमी होत असल्याचे मुंबईकरांना जाणवत आहे. पहाटेच्या वेळी तापमान १८ ते २० अंशांदरम्यान असल्याने गारवा जाणवत आहे. त्यामुळे सकाळच्या वेळी दिलासा मिळत असून, इतर वेळी मात्र पंख्याची गरज भासू लागली आहे. तसेच रात्रीच्या वेळी लोकल ट्रेनमधील पंखेही पुन्हा एकदा सुरू झाले आहेत. मुंबईच्या सरासरी किमान-कमाल तापमानाच्या श्रेणीमध्ये शनिवारी १९ फेब्रुवारीला सांताक्रूझ येथे कमाल तापमानाचा पारा ३२.२ अंश नोंदला गेला होता. कुलाबा येथेही किमान तापमान २० अंश सेल्सिअस होते. फेब्रुवारीच्या पहिल्या आठवड्यातही वाऱ्याचा प्रभाव जाणवत होता. मात्र, आता संध्याकाळीही काही प्रमाणात वातावरणात उष्मा जाणवत असल्याचे मुंबईकरांचे निरीक्षण आहे. कुलाबा येथे रविवारी ७२ टक्के आर्द्रतेची नोंद झाली. त्यामुळे मुंबई शहरामध्ये उकाड्याचे प्रमाण अधिक जाणवले. त्या मानाने सांताक्रूझ येथे आर्द्रतेमध्ये फार वाढ नोंदली गेली नाही. तरीही काही प्रमाणात उकाड्यामध्ये वाढ झाल्याची जाणीव मुंबईकरांना झाली. सांताक्रूझ येथे ४४ टक्के आर्द्रता नोंदली गेली. येत्या आठवड्यामध्ये कमाल तापमानाचा पारा ३२ ते ३३ अंशांदरम्यान असेल, तर किमान तापमान १९ ते २० अंशांदरम्यान असेल. राज्यातही अनेक ठिकाणी उष्ण आणि कोरडेपणा जाणवू लागल्याचे हवामान विभागातर्फे सांगण्यात आले आहे. राज्यात काही ठिकाणी ३३ ते ३४ अंशांपर्यंत पोहोचलेले तापमान आणि कोरडेपणा यामुळे उन्हाचे चटके अधिक जाणवायला सुरुवात झाली आहे. राज्यात येत्या आठवड्यात सर्वदूर कोरडे वातावरण असण्याचा अंदाज आहे. गुरुवारी विदर्भामध्ये एखाद-दुसऱ्या ठिकाणी पावसाचा अंदाज आहे.