ठाण्यात फोडाफोडीचे राजकारण; शाखाप्रमुखासह ३०० शिवसैनिकांचा भाजपमध्ये प्रवेश

February 21, 2022 Marathi 0 Comments

म. टा. प्रतिनिधी, ठाणेः महापालिका निवडणुकीच्या अनुषंगाने राजकीय हालचालींना वेग आला असून ठाण्यात फोडाफोडीचे राजकारण सुरू झाले आहे. नुकताच दिव्यातील भाजपच्या पदाधिकाऱ्यांनी शिवसेनेमध्ये प्रवेश केला होता. शिवसेनेकडून भाजपला धक्के देण्याचे प्रयत्न सुरू असतानाच आता भाजपनेही शिवसेनेला जोरदार धक्का दिला असून शिवसेनेचा बालेकिल्ला असलेल्या वागळे इस्टेटमधील किसननगर येथील शाखाप्रमुखासह ३०० शिवसैनिकांनी रविवारी भाजपमध्ये प्रवेश केला. भाजपच्या या धक्कातंत्रानंतर शिवसेनेकडून काय पाऊले उचलली जातात, याकडे राजकीय नेत्यांसह कार्यकर्त्यांचे लक्ष लागले आहे. दिव्यातील भाजपचे दिवा-शिळ मंडळाचे अध्यक्ष आणि दिवा रेल्वे प्रवासी संघटनेचे अध्यक्ष अॅड. आदेश भगत, अॅड. सुप्रिया भगत आणि माजी परिवहन सभापती शैलेश भगत यांनी काही दिवसांपूर्वीच भाजपमध्ये प्रवेश केला होता. या पक्ष प्रवेशानंतर शिवसेनेने लगेचच भाजपला आणखी एक धक्का दिला. दिव्यातील भाजपचेच पदाधिकारी निलेश पाटील यांनीही नुकताच शिवसेनेमध्ये प्रवेश केला. पदाधिकारी सोडून जाऊ लागल्याने भाजपच्या गोटात खळबळ उडाली होती. शिवसेना भाजपला आणखी किती धक्के देणार, याकडे सर्वांच्या नजरा लागल्या असताना आता भाजपने पलटवार करण्यास सुरुवात केली आहे. शिवसेनेचा बालेकिल्ला असलेल्या वागळे इस्टेटमध्येच हे घडले असून रविवारी शिवसेनेच्या किसननगर नं. २ चे शाखाप्रमुख समीर नार्वेकर, कोपरी-पाचपाखाडी विधानसभा मतदारसंघातील युवा सेनेचे निरीक्षक निलेश लोहोटे, उपशाखाप्रमुख पंकज परब, भरत देसाई, आशीष चव्हाण, नितेश पवार यांच्यासह ३०० शिवसैनिकांनी आमदार निरंजन डावखरे, आमदार संजय केळकर यांच्या उपस्थितीमध्ये भाजपमध्ये प्रवेश केला, अशी माहिती भाजपकडून देण्यात आली. भाजपच्या खोपट येथील कार्यालयात हा पक्ष प्रवेशाचा कार्यक्रम पार पडला. प्रवेश केलेल्या कार्यकर्त्यांमध्ये किसननगर नंबर १, २, ३ सह पडवळनगरमधील शिवसैनिकांचा समावेश असल्याचे भाजपचे म्हणणे आहे. कोपरी-पाचपाखाडी विधानसभा मतदारसंघांत शिवसेनेचे प्राबल्य असून या भागात शिवसेनेचे संघटनात्मक जाळे मजबूत आहे. मात्र, भाजपने शिवसेनेच्या किसननगरमधील अभेद्य तटबंदीलाच खिंडार पाडले असल्याचे भाजपचे म्हणणे आहे. शिवसेनेच्या किसननगरमधील शाखाप्रमुखानेच भाजपमध्ये प्रवेश केल्याने शिवसेनेला हादरा बसला असून शिवसेनेत खळबळ उडाली आहे. पंतप्रधान नरेंद्र मोदी यांच्या नेतृत्वाखाली भाजपकडून देशाचा विकास सुरू आहे. तर, शिवसेनेकडून नागरिकांना दिलेली प्राथमिक आश्वासनेही पूर्ण झालेली नाहीत. त्यामुळे आपण भाजपचे कार्य करणार आहोत, असे समीर नार्वेकर यांनी सांगितले, अशी माहिती भाजपकडून देण्यात आली. महापालिका निवडणुकीमध्ये प्रत्येकाला नगरसेवक व्हावे, असे वाटते. त्यामुळे निवडणुका आल्यानंतर एका पक्षातून दुसऱ्या पक्षात पदाधिकारी, कार्यकर्ते जात असतात. ज्या कार्यकर्त्यांनी भाजपमध्ये प्रवेश केला आहे, ते काही शिवसेनेमधील मोठे पदाधिकारी नाहीत. भाजपने या कार्यकर्त्यांना पक्षात पाच महिने तरी टिकवून दाखवावे. नरेश म्हस्के, महापौर शिवसेनेचा बालेकिल्ला असलेल्या किसननगरमधील शिवसेनेच्या कार्यकर्त्यांनी भाजपमध्ये प्रवेश केला असला तरी आगामी काळात आम्ही आणखी धक्के देणार आहे. शिवसेनेबरोबर राष्ट्रवादी काँग्रेसचे पदाधिकारीही भाजपमध्ये प्रवेश करतील. आ. निरंजन डावखरे शहर अध्यक्ष, भाजप