कोल्हापूरशी असलेले नाते लतादीदींनी अखेरपर्यंत 'असे' जपले!

February 07, 2022 Marathi 0 Comments

सतीश घाटगे । महान गायिका बॉलिवूडमध्ये गाणी म्हणण्यासाठी बिझी असल्या तरी उन्हाळा आणि दिवाळीच्या सुट्टीत त्यांचा चार ते पाच दिवस पन्हाळ्याच्या बंगल्यात मुक्काम असायचा. हे माझे आवडते हिल स्टेशन आहे, असे त्या अभिमानाने सांगायच्या. प्रयाग चिखलीत गुऱ्हाळघरात जाऊन उसाचा रस, गूळ खाण्यासाठी वेळ काढायच्या. चुलीवरची भाकरी, मटण अशा झणझणीत पदार्थावर ताव मारत मुंबईत परत जाताना हटकून कोल्हापूरची चटणी (तिखट) घेऊन जायच्या. लतादीदींच्या चित्रपटसृष्टीतील पदार्पण काळात त्यांचे कोल्हापूरशी जडलेले नाते त्यांनी अखेरपर्यंत टिकवले होते. चित्रतपस्वी भालजी पेंढारकरांशी त्यांचे पित्यासमान नाते होते. भालजींच्या अनेक चित्रपटात गाणी गाताना 'साधी माणसं' या चित्रपटाला लतादीदींनी आनंदघन या टोपण नावाने संगीतही दिले होते. भालजींच्या कडक शिस्तीत लता मंगेशकरांनी चित्रपटात कामेही केली होती. युद्धाच्या मॉबसीनमध्ये मंगेशकर भगिनी भाग घ्यायच्या. भालजी पेंढारकर यांच्या आर्थिक अडचणीत त्यांनी जयप्रभा स्टुडिओ आणि पन्हाळ्याचा बंगला विकत घेतला होता. पन्हाळ्याच्या बंगल्यात दरवर्षी दिवाळी आणि उन्हाळ्याच्या सुट्टीत रहायला यायच्या. पन्हाळ्यात एमएसईबी रेस्ट हाऊसजवळ त्यांचा बंगला आहे. सुट्टीत पन्हाळ्याच्या आठवडी बाजारात लता मंगेशकर, उषा मंगेशकर, आशा भोसले खरेदीला यायच्या, अशी माहिती पन्हाळ्याचे माजी नगराध्यक्ष विजय पाटील यांनी दिली. वाचा: गायक सुरेश वाडकर यांना बॉलिवूडमध्ये लाँच करण्यात लतादीदींचा मोठा वाटा होता. सुरेश वाडकर यांचे मित्र चिखलीचे पांडबा यादव यांच्या घरी लतादीदी दरवर्षी यायच्या. आजही यादव कुटुंबाचे मंगेशकर कुटुंबाशी ऋणानुबंद कायम आहेत. चिखलीत आल्यावर यादवांच्या गुऱ्हाळघराला हटकून भेट द्यायच्या. लिंबू, आले घातलेल्या उसाचा रस प्यायच्या. गूळ, चिक्की गूळ खायच्या, गुऱ्हाळघरात काम करणाऱ्या मजूरांच्या झोपडीत बसायच्या. बैलगाडीतून हमखास फेरी मारायच्या, अशी माहिती जनार्दन यादव यांनी दिली. पांडबा यादव यांच्या आई सुशीला यादव यांच्याबरोबर गप्पा मारताना यादवांच्या एकत्रित कुटुंबाचे कौतुक करत कोल्हापुरातील वास्त्यव्यातील जुन्या आठवणीचा फड रंगवून गप्पा मारायच्या. चुलीवरची भाकरी, पालेभाज्यासह कोल्हापुरी झणझणीत मटण त्यांना आवडायचे. मुंबईला जाताना हटकून कोल्हापूरची चटणी न्यायच्या. यादवांच्या सर्व लेकी सुनाशी आपुलकीने बोलायच्या. वाचा: गेली दहा-बारा वर्षे प्रकृतीमुळे त्यांचे कोल्हापूरला येणेजाणे थांबले होते. पण दरवर्षी पांडबा यादव हे मंगेशकर कुटुंबाच्या घरातील गणपतीच्या दर्शनाला जायचे. त्यावेळी जाताना करवीरनिवासिनी अंबाबाईचा प्रसाद म्हणजेच दगडू बाळा भोसले याच्या दुकानातील पेंढे, फुटाणे, साखर घेऊन जायचे. तसेच गूळ, काकवी, कोल्हापूरची चटणी आणली का अशी विचारणाही करायच्या, अशी माहिती यादव यांनी दिली.