कौतुकास्पद! औरंगाबाद ग्रामीण पोलिसांनी एकाच गावातील तीन बालविवाह रोखले

February 08, 2022 Marathi 0 Comments

औरंगाबाद : दलाच्या बिडकीन पोलीस ठाणे हद्दीतील फारोळा या गावात होणारे तीन रोखण्यास पोलिसांना यश आले आहे. चाईल्ड हेल्प लाईन आणि पोलिसांनी सयुक्त कामगिरी करत हे बालविवाह रोखले असून, पालकांचे समुपदेशन करत त्यांना समज दिली आहे. पोलिसांनी दिलेल्या माहितीनुसार, फारोळा गावात दोन अल्पवयीन मुलींचे लग्न होणार असल्याची माहिती चाईल्ड हेल्पलाईन (1098 MGVS) औरंगाबाद कार्यालयाला मिळाली होती. त्यानुसार शनिवारी (०५ जानेवारी) रोजी चाईल्ड हेल्पलाईनचे प्रकल्प व्यवस्थापक अन्नपूर्णा ढोरे, शिला पवार यांच्यासह बिडकीन पोलीस ठाण्याचे सहायक पोलीस निरीक्षक संतोष माने आपल्या टीमसोबत गावात पोहचले. त्यानुसार पोलिसांनी माहिती मिळालेल्या व्यक्तींच्या घरी जाऊन चौकशी केली असता, एक १३ वर्षीय मुलीचे तिचे मामा राहत असलेल्या फारोळा येथील घरात लग्नाची तयारी सुरु होती. त्यामुळे पोलिसांनी पालकांचे समुपदेशन करत त्यांना समज देत बालविवाह करण्यापासून रोखले. विशेष म्हणजे गावात पोलीस आणि चाईल्ड हेल्पलाईन सदर प्रकरण हाताळत असतानाच गावात आणखी दोन अल्पवयीन मुलींच्या लग्नाची तयारी सुरु असल्याची माहिती पथकाला मिळाली. त्यामुळे पोलिसांनी खात्री करण्यासाठी माहिती मिळालेल्या व्यक्तींच्या घरी गेले असता, त्या घरासमोर मंडप टाकलेले होते. तर एका अल्पवयीन मुलीला हळद लागली होती, जिचे वय १४ वर्षे होते. त्यामुळे अल्पवयीन मुलीच्या पालकांना पोलिसांनी बालविवाह करणे कायद्याने गुन्हा असल्याचे सांगत, त्यांचे समुपदेशन केले. तर अशाचप्रकारे गावातील आणखी एका अल्पवयीन मुलीचा बालविवाह रोखण्यास पोलीस आणि चाईल्ड हेल्पलाईन यश आले.