खेळण्यासाठी घराबाहेर पडलेला निशांत अद्याप बेपत्ता; काय घडले नेमके?

February 11, 2022 Marathi 0 Comments

म. टा. प्रतिनिधी, नाशिकः सोमवारी सायंकाळी घरातून जवळच्या मैदानात क्रिकेट खेळण्यासाठी गेलेल्या अकरावर्षीय निशांत शर्माचा अद्याप शोध लागलेला नाही. मंगळवारी सकाळपासून पोलिस त्याचा शोध घेत आहेत. मात्र, तो सापडला नसून, त्याचे आईवडिलांशी किरकोळ भांडण झाल्याचे समजते. त्यामुळे पुन्हा त्यांची चौकशी सातपूर पोलिस करणार आहेत. सातपूर परिसरातील राधाकृष्णनगर येथील श्री दर्शन रो-हाउसमध्ये शर्मा कुटुंबीय राहतात. त्यांचा अकरावर्षीय मुलगा निशांत ऊर्फ राजाबाबू शंभूशरण शर्मा सायंकाळी क्रिकेट खेळण्यासाठी घराबाहेर गेला. त्यापूर्वी त्याने आईवडिलांकडे पैसे मागितले होते. त्यावरून त्यांचा ओरडाही त्याला बसला होता. सायंकाळी सात वाजता बाहेर गेलेला निशांत घरी न परतल्याने शोधाशोध सुरू झाली. परिसरात निशांत न सापडल्याने घरच्यांनी सातपूर पोलिसांत धाव घेतली. सोमवारी हरविलेल्या निशांतबाबत मंगळवारी सायंकाळी आईवडिलांनी तक्रार दाखल केली. तोपर्यंत त्याचा परिसरासह इतरत्र शोध घेतला गेला. मंगळवारी सायंकाळपासून पोलिसांनी त्याचा शोध घेण्यास सुरुवात केली. परंतु, त्याच्याबाबत अद्याप कोणतीही माहिती न मिळाल्याचे गुरुवारी सायंकाळी सातपूर पोलिसांनी सांगितले. निशांत बेपत्ता असल्याची माहिती सर्व पोलिस ठाण्यांसह पथकांना कळविण्यात आलेली आहे. त्याचा सर्वत्र शोध घेतला जात असून, लवकरच शोध लागेल, अशी आशा पोलिसांनी व्यक्त केली.