कोट्यवधींची ब्राऊन शुगर घेऊन एक महिला मध्य प्रदेशातून आली आणि...

December 19, 2021 Marathi 0 Comments

:प्रविण चौधरी । मध्य प्रदेशातून कोट्यवधी रुपयांची ब्राऊन शुगर घेऊन जळगाव जिल्ह्यात टॅक्सीने आलेल्या बऱ्हाणपूर येथील महिलेस जळगाव पोलिसांनी येथे ताब्यात घेऊन तिच्याकडून ५०० ग्रॅम ब्राऊन शुगरची दोन पाकीटे हस्तगत करण्यात आली आहेत. स्थानिक गुन्हे शाखेच्या पथकाने गोपनीय माहीतीवरून ही कारवाई केल्याची माहिती पोलीस अधिक्षक डॉ. प्रवीण मुंढे यांनी दिली आहे. दरम्यान, जळगाव जिल्ह्यात अलीकडच्या काळात प्रथमच एवढ्या मोठ्या प्रमाणात अंमली पदार्थाचा साठा हस्तगत करण्यात आल्याने खळबळ उडाली आहे. मागील काही महिन्यांत देशासह राज्यात देखील अंमली पदार्थ नियंत्रण विभागाकडून छापेमारी करून अंमली पदार्थांचा साठा जप्त करण्यात येत आहे. नुकताच जळगावात येणारा मोठ्या प्रमाणात गांजा असलेला ट्रक देखील नांदेड जिल्ह्यात पकडण्यात आला होता. त्यामुळे अंमली पदार्थांच्या तस्करीत जळगाव जिल्ह्याचे नाव चर्चेत आले होते. आता जळगाव पोलीस दलाच्या स्थानिक गुन्हे शाखेच्या पथकाने केलेल्या कारवाईमुळे खळबळ उडाली आहे. अशी केली कारवाई जळगाव स्थानिक गुन्हे शाखेचे पोलीस निरिक्षक किरणकुमार बकाले यांना या संदर्भात शनिवारी गुप्त माहिती मिळाली होती. रावेर शहरातील डॉ. बाबासाहेब आंबेडकर पुतळा चौकात एक महिला पांढऱ्या रंगाच्या व त्यावर लाल हिरव्या रंगाचे पट्टे असलेल्या पिशवीत ब्राऊन शुगर घेऊन त्याची चोरटी विक्री करण्यासाठी येणार असल्याचे त्यांना कळले. ही माहिती मिळताच स्थानिक गुन्हे शाखेच्या पथकाने सापळा रचला व महिलेला ताब्यात घेतले. या महिलेचं नाव अख्तरी बानो पिता अब्दुल रऊफ (वय ४५ रा. मोमीनपुरा वडा कमेलापास जि. बऱ्हाणपूर) आहे. वाचा: महिलेस ताब्यात घेतल्यानतंर रावेर तालुक्याच्या तहसिलदार उषाराणी देवगुणे यांच्या समोर महिला पोलिस अधिकाऱ्यांनी तिची झडती घेतली. तिच्या जवळ ५०० ग्रॅम ब्राऊन शुगर दोन पाकिटात आढळून आले. या अंमली पदार्थाची अंदाजे किंमत १ कोटी ८ हजार रुपये असल्याची माहिती पोलिसांनी दिली आहे. ही ब्राऊन शुगर मध्य प्रदेशातील मन्दसौर येथील सलीम खान शेर बहादुर खान (रा. किटीयानी कॉलनी मनसौर मध्यप्रदेश) याचेकडून घेतल्याची माहिती तिने दिली आहे. महिलेविरुद्ध रावेर पोलीस ठाण्यात एनडीपीएस कायदयाखाली गुन्हा दाखल करण्यात आला आहे. पोलीस पथक मध्य प्रदेशात रवाना जळगाव पोलिसांचे एक पथक मन्दसौर येथील सलीम खान शेर बहादूर खान यांच्या शोधार्थ मध्यप्रदेशात रवाना झाल्याची माहिती देखील पोलीस अधीक्षक डॉ. प्रवीण मुंढे यांनी दिली आहे. ही महिला टॅक्सी घेऊन मध्यप्रदेशातून जळगाव जिल्ह्यात आल्याची माहिती देखील मिळाली आहे. मध्य प्रदेशातून येणारा हा अंमली पदार्थाचा साठा कोणत्या शहरांमध्ये विक्रीसाठी जाणार होता याचा तपास पोलिसांकडून सुरू आहे. वाचा: