ठाकरे सरकारमध्ये बाळासाहेबांच्या नावाच्या योजनेला घरघर; आठ महिन्यांपासून पैसे थकले!

December 19, 2021 Marathi 0 Comments

औरंगाबाद : ज्या बाळासाहेब ठाकरेंनी (Balasaheb Thackeray) शिवसेनेला उभं केलं, शिवसेना टिकवली, सत्तेची फळं चाखायला दिली, त्याच बाळासाहेबांच्या नावाच्या योजनेला राज्यात ठाकरे सरकार सत्तेत असूनही थकलेले पैसे मिळत नसल्याचे पाहायला मिळत आहे. शिवसेनाप्रमुख बाळासाहेब ठाकरे मोफत अंत्यसंस्कार योजनेचे () औरंगाबाद महानगरपालिकेकडे आठ महिन्याचे वेतन थकले असून, वेतन मागणीसाठी स्मशानजोगिंनी आंदोलनाचा इशारा दिला आहे. शहरातील सर्व स्मशानजोगिंनी एकत्र येत मनपाला दिलेल्या निवेदनात म्हटले आहे की, कोरोना काळात केलेल्या अंत्यविधीचे एकूण १ कोटी ११ लाख तर बीपीएल अंतर्गत होणाऱ्या अंत्यविधीचे १४ लाख ५० हजार रुपये मनपाकडे थकले आहेत. मागील आठ महिन्यात शहरात ४ हजार ४५ कोविडचे अंत्यविधी करण्यात आले. दारिद्र्य रेषेखाली येणाऱ्या कुटुंबातील ५७९ अंत्यविधी करण्यात आली. या सर्वाचे एकूण १ कोटी २५ लाख रुपये मनपाकडे थकले असल्याचं निवेदनात म्हटलं आहे. कोरोना काळात जेव्हा नात्यातील लोकसुद्धा जवळ येत नव्हती, तेव्हा आपला जीव धोक्यात घालून कोरोना रुग्णांचा अंत्यविधी स्मशानजोगिंनी केला. मात्र आज त्यांच्यावरच थकलेल्या पैशांसाठी आंदोलन करण्याची वेळ आली आहे. पैसे थकल्याने कुटुंब चालवणे सुद्धा अवघड झाल्याची व्यथा स्मशानजोगींनी सांगितली. योजना बाळासाहेबांच्या नावाची तरी... गेल्या अनेक वर्षांपासून औरंगाबाद महानगरपालिका शिवसेनाप्रमुख बाळासाहेब ठाकरे यांच्या नावाने मोफत अंत्यविधी योजना राबवत आहे. मात्र अनेकदा या योजनेचे पैसे महापालिकेकडून थकवले जातात. विशेष म्हणजे राज्यात सध्या शिवसेनेची सत्ता आहे. तर खुद्द बाळासाहेब ठाकरे यांचे पुत्र उद्धव ठाकरे मुख्यमंत्री आहेत. मात्र असे असतानाही बाळासाहेबांच्या नावाचा योजनेला लागलेली घरघर पाहता किमान 'बाळासाहेबांच्या नावाचा तरी विचार करा हो' अशी आठवण शिवसेनेला करुन देण्याची वेळ आली आहे. लाकूड मिळेना.... अंत्यविधीसाठी लागणारा लाकूड स्वतः आणतात. त्यामुळे थकलेले पैसे सुद्धा स्मशानजोगी यांनाच द्यावे लागतात. पण गेल्या अनेक दिवसांपासून महानगरपालिकेकडून वेतन मिळत नसल्याने, लाकूड पुरवठादारांचे पैसे कुठून द्यायचे? असा प्रश्न स्मशानजोगी यांना पडला आहे. तर लाकूड पुरवठादार पैशांसाठी थेट घरी येऊन बसत असल्याचं सुद्धा स्मशानजोगी म्हणाले.