तुरुंगातून सुटल्यानंतर पहिल्यांदाच आर्यन खान आज एनसीबीसमोर हजर होणार

November 05, 2021 Marathi 0 Comments

मुंबईः क्रूझ ड्रग्ज पार्टी प्रकरणात अभिनेता शाहरुख खान याचा मुलगा आर्यन खानला अटक करण्यात आली होती. आर्यन खानची २६ दिवसांनंतर जामिनावर तुरुंगातून सुटका करण्यात झाली. ३० ऑक्टोबरला आर्यनला तुरुंगातून सुटका झाल्यानंतर पहिल्यांदाच आर्यन खान मुंबई एनसीबी कार्यालयात हजेरी लावणार आहे. ३ ऑक्टोबरला एनसीबीने कोर्डेलिया क्रुझवर छापेमारी केली होती. त्यावेळी काही जणांकडे ड्रग्ज आढळले होते. या प्रकरणात आर्यनसह आठ जणांना अटक करण्यात आली होती. त्यानंतर २६ दिवसांनंतर आर्यनला जामीन मंजूर झाला होता. आर्यन खान याच्यासह अरबाज मर्चंट आणि मुनमुन धमेचा यांना मुंबई हायकोर्टाकडून सशर्त जामीन मंजूर करण्यात आला होता. त्यानंतर जामीन प्रक्रिया पूर्ण झाल्यानंतर आर्यन खानला तुरुंगातून सोडण्यात आलं होतं. मात्र, जामीन मंजूर करताना कोर्टानं आर्यन खानला काही अटी घालण्यात आला होता. त्यानुसार, एनसीबी कार्यालयात प्रत्येक शुक्रवारी ११ ते २ या वेळात हजर रहावे लागणार आहे. आर्यन खानसह तिघांना जामीन मंजूर करताना मुंबई हायकोर्टाचे न्यायमूर्ती नितीन सांब्रे यांनी आपल्या मुख्य आदेशात अटींबाबत अनेत मुद्दे स्पष्ट केले आहेत.

• आर्यन खान, अरबाझ मर्चंट आणि मुनमून धमेचा यांना प्रत्येकी एक लाख रुपयांची वैयक्तिक हमी आणि तेवढ्याच रकमेचे एक किंवा अधिक हमीदार देण्याच्या अटीवर जामीन मंजूर करण्यात आला आहे.

• आर्यनसह तिन्ही आरोपींना तात्काळ विशेष एनडीपीएस कोर्टात पासपोर्ट जमा करण्याचा आदेश देण्यात आले आहे.

• कोर्टाच्या परवानगीविना देशाबाहेर जाण्यास तिघांना मनाई केली आहे.

• तिघांना कधीही मुंबईबाहेर जायचे असल्यास त्यांना एनसीबीच्या तपास अधिकाऱ्याला त्याची माहिती देऊन प्रवास व निवासाचा तपशील द्यावा लागणार आहे.

• पास अधिकारी बोलावतील तेव्हा तिघांना चौकशीला हजर राहावे लागणार आहे.

• या प्रकरणातील साक्षीदारांवर स्वतः किंवा कोणाच्याही माध्यमातून दबाव आणू नये आणि पुराव्यांशी छेडछाड करू नये

• या प्रकरणाशी संबंधित खटल्याबद्दल प्रिंट, इलेक्ट्रॉनिक मीडिया किंवा सोशल मीडियावर काहीही बोलू नये.

• या सर्व घातलेल्या अटींपैकी कोणतीही अट आरोपींपैकी कोणी मोडली, तर एनसीबीला त्यांचा जामीन रद्द होण्यासाठी थेट विशेष एनडीपीएस कोर्टात अर्ज करता येईल.