फटाकेबाजी रंगणार! फडणवीस व नवाब मलिक आज पुन्हा आमनेसामने

November 09, 2021 Marathi 0 Comments

मुंबई: आर्यन खान ड्रग्ज प्रकरणानंतर सुरू झालेल्या आरोप-प्रत्यारोप नाट्याचा दुसरा अंक आज खऱ्या अर्थानं सुरू होण्याची शक्यता आहे. राष्ट्रवादी काँग्रेसचे प्रवक्ते नवाब मलिक व विरोधी पक्षनेते देवेंद्र फडणवीस हे दोघेही आज स्वतंत्र पत्रकार परिषदा घेणार आहेत. त्यातून काय नवी माहिती बाहेर येते, याकडं सर्वांचं लक्ष लागलं आहे. ड्रग्ज प्रकरणात एनसीबीकडून केल्या जाणाऱ्या अनेक कारवाया बोगस आहेत. समीर वानखेडे हे खंडणी वसुलीसाठी खोटी प्रकरणे तयार करतात व मोठ्या घरातील लोकांना अडकवतात. त्यांना भारतीय जनता पक्षाचे काही लोक सामील आहेत, असा आरोप नवाब मलिक यांनी केला होता. गेल्या महिनाभरात त्यांनी अनेक पुरावेही सादर केले होते. त्यामुळं एनसीबीला समीर वानखेडे यांना सहा प्रकरणांच्या तपासापासून दूर करावं लागलं. इतकंच नव्हे, नवाब मलिक यांनी देवेंद्र फडणवीस व त्यांच्या पत्नी अमृता फडणवीस यांचेही ड्रग पेडलरशी संबंध असल्याचा आरोप केला होता. हे आरोप फडणवीस यांनी आधीच फेटाळले होते. उलट नवाब मलिक यांचेच अंडरवर्ल्डशी संबंध असल्याचा आरोप केला होता. दिवाळीनंतर बॉम्ब फोडणार, असं सांगत त्यांनी मलिक यांच्या विरोधात पुरावे जाहीर करणार असल्याचं म्हटलं होतं. तर, नवाब मलिक यांनीही फडणवीसांचं आव्हान स्वीकारलं होतं. त्यानुसार आज दुपारी दोघांच्याही पत्रकार परिषदा होत आहेत. फडणवीस हे भाजप कार्यालयात दुपारी १२ वाजता पत्रकार परिषद घेणार आहेत. मलिक यांनी ज्या यांचं नाव घेऊन फडणवीस यांच्यावर मायाजालाचे आरोप केले होते, त्या गुंडे यांनीही फडणवीसांच्या पत्रकार परिषदेचं ट्वीट केलं आहे. 'आज बरीच गुपितं बाहेर येतील. फडणवीसांच्या डेटा बँकेत काय प्रकारची माहिती आहे याची चुणूकही आज दिसेल,' असं त्यांनी म्हटलं आहे. तर, नवाब मलिक हे कुर्ला येथील घरी १ वाजता पत्रकारांना संबोधित करणार आहेत. राष्ट्रवादी काँग्रेसनं ही माहिती दिली आहे.