मुंबई काँग्रेसमध्ये आत्तापासूनच बदलांचे वारे, विविध सेलच्या पुनर्रचनेसह अध्यक्षांची होणार बदली

October 03, 2021 Marathi 0 Comments

मुंबई : आगामी मुंबई महानगरपालिका निवडणूक लक्षात घेता मुंबई काँग्रेसमध्ये आत्तापासूनच बदलांचे वारे वाहू लागले आहेत. पक्षाला अधिक बळकटी देण्यासाठी पक्षाच्या विविध सेलच्या पुनर्रचनेसह अध्यक्षांची बदली करण्याचा निर्णय मुंबई काँग्रेसतर्फे घेण्यात आल्याची माहिती सूत्रांकडून देण्यात आली आहे. यासाठी इच्छुकांची मोर्चेबांधणी होत असून पक्षांतंर्गत बैठकांची सत्रंदेखील सुरू झाल्याचे समजते. विशेष म्हणजे, येत्या दोन महिन्यांत हे सर्व बदल केले जाणार असल्याची माहिती सूत्रांनी दिली. आगामी वर्षात मुंबईसह राज्यातील विविध महानगरपालिकांच्या निवडणुकांचे बिगूल वाजणार आहे. या निवडणुकीत काँग्रेसला मोठ्या प्रमाणात यश मिळावे याकरिता पक्षातर्फे हे प्रयत्न होत आहेत. मुंबई काँग्रेसमध्ये त्याबाबत हालचाली सुरू झाल्या आहेत. काही दिवसांपूर्वीच मुंबईच्या युवक काँग्रेसच्या अध्यक्षपदाची धुरा आमदार झीशान सिद्दीकी यांच्यावर सोपविण्यात आली. त्यानंतर आता मुंबई काँग्रेसने आपला मोर्चा पक्षातील विविध सेलकडे वळविला आहे. सध्याच्या घडीला मुंबई काँग्रेसमध्ये एकूण २२ सेल कार्यरत आहेत. ज्यात आयटी सेलसह लीगल सेल आणि इतर सेलचा समावेश आहे. गेल्या अनेक वर्षांपासून या सेलचे अध्यक्षपद आणि इतर कार्यकारणीत कोणत्याही प्रकारचा बदल करण्यात आलेला नाही. अनेक वर्षे या सेलचे अध्यक्षपद एकाच व्यक्तीकडे होते. त्यामुळे नव्या कार्यकर्त्यांना संधी मिळत नसल्याने अनेकांनी याबाबत मुंबई काँग्रेसचे अध्यक्ष भाई जगताप यांच्याकडे तक्रार केली होती. याची गंभीर दखल घेत मुंबई काँग्रेसचे अध्यक्ष भाई जगताप यांनी हे बदल करण्यासाठी विशेष मोहीम हाती घेतल्याचे कळते. या बदलांसाठी गेल्या महिनाभरापासून पक्षांतर्गत बैठका घेण्यात येत असल्याची माहिती सूत्रांनी दिली. काही दिवसांपूर्वीच अनेक सेलचे अध्यक्ष बदलले आहेत. आता लवकरच २२ पैकी इतर काही सेलचे अध्यक्ष बदलण्यात येणार आहेत. ही सर्व प्रक्रिया येत्या दोन महिन्यांत पूर्ण करण्याचा नेतृत्वाचा मानस असल्याची माहिती सूत्रांकडून देण्यात आली आहे. या संदर्भात मुंबई काँग्रेसचे अध्यक्ष भाई जगताप यांच्याकडे विचारणा केली असता त्यांनी या वृत्तास दुजोरा दिला आहे. आगामी निवडणुकीत पक्षाला बळकटी देण्यासाठी हा निर्णय घेण्यात आला आहे. त्याशिवाय अनेक कार्यकर्त्यांना वरच्या फळीत संधी मिळणे गरजेचे आहे. यामुळे या बदल केला जाणार असून लवकरच ही सर्व प्रक्रिया पूर्ण केली जाणार आहे. नवीन कार्यालय मिळणार मुंबई काँग्रेसच्या विविध सेलना आता नवीन अध्यक्ष मिळण्याची शक्यता असताना या सेलना नवे कार्यालयदेखील मिळणार असल्याचे बोलले जात आहे. मुंबई काँग्रेसच्या कार्यालयाशेजारी असणाऱ्या या कार्यालयाच्या नूतनीकरणाचे काम सध्या जोरात सुरू असून लवकरच हे काम पूर्ण होणार असल्याचे कळते.