...म्हणून दोन शिफ्टमध्ये होणार करोनाचे लसीकरण

March 05, 2021 Marathi 0 Comments

म. टा. विशेष प्रतिनिधी, मुंबई करोना संसर्गाला प्रतिबंध करण्यासाठी तिसऱ्या टप्प्यातील लसीकरण सुरू झाले असले, तरीही त्याचा वेग वाढवण्याचे निर्देश केंद्र सरकारने दिले आहेत. लशींच्या उपलब्धतेनुसार पालिका दोन पाळ्यांमध्ये लसीकरणाची प्रक्रिया सुरू करण्याचा विचार करत आहे, तर राज्य सरकराने जिल्हा पातळीवरील मोठ्या रुग्णालयांमध्ये दोन पाळ्यांमध्ये लसीकरणाची प्रक्रिया सुरू करण्याचा निर्णय घेतला आहे. मनुष्यबळाची उपलब्धता, लशींचा पुरवठा, शितसाखळ्यांची सक्षमता आणि त्या जिल्ह्यांमधील संसर्गाचे प्रमाण याचा अभ्यास केल्यानंतर दोन पाळ्यांमध्ये लसीकरणाच्या सुविधेला चालना देण्यात येणार आहे. मुंबईमध्ये आता २९ खासगी रुग्णालायंमध्ये लसीकरणासाठी मान्यता दिली आहे. हे लसीकरण सशुल्क असले, तरीही काही रुग्णालयांनी 'वॉक इन' पद्धतीने लसीकरण करण्यास संमती दर्शवलेली नाही. मुंबईत ज्येष्ठ नागरिकांची संख्या १२ लाख इतकी आहे. आरोग्य आणि पहिल्या फळीतील कर्मचाऱ्यांपैकी काही जणांचे लसीकरण अद्याप झालेले नाही. अधिकाधिक लोकसंख्येचा टप्पा वेगाने गाठण्यासाठी लसीकरण अधिक तप्तरेने व्हायला हवे, यासाठी हा निर्णय घेण्यात आला आहे. वाचा: पालिकेचे अतिरिक्त आयुक्त सुरेश काकाणी यांच्याकडे यासंदर्भात विचारणा केली असता, ज्या मोठ्या लसीकरण केंद्रामध्ये ही व्यवस्था उपलब्ध आहे, पुरेसे मनुष्यबळ आहे अशा ठिकाणी दोन पाळ्यांमध्ये लसीकरण सुरू करता येईल. मात्र, लशींची उपलब्धता किती आहे, याचाही विचार करण्यात येईल, असे त्यांनी स्पष्ट केले. राज्याचे प्रधान सचिव डॉ. प्रदीप व्यास यांनी मात्र, राज्यातील महत्त्वाच्या मोठ्या जिल्हा रुग्णालयांमध्ये ही सुविधा दोन पाळ्यांमध्ये करण्याचा निर्णय घेतल्याचे स्पष्ट केले. लशींचा तुटवडा पडणार नाही. मागणीप्रमाणे पुरवठा केला जाईल, असे केंद्र सरकारने सांगितले आहे. मुंबईमध्ये संध्याकाळी कामावरून परत आल्यानंतर लसीकरणासाठी येणारा वर्ग मोठा असेल, मात्र ग्रामीण भागांमध्ये ही परिस्थिती आहे का, असे विचारले असता डॉ. व्यास यांनी जिल्हास्तरावरीही लसीकरणासाठी संध्याकाळच्या वेळी प्रतिसाद मिळेल, असा विश्वास व्यक्त केला. ... तर त्यांना संधी मिळेल अनेक खासगी रुग्णालयांनी 'वॉक इन' पद्धतीच्या लसीकरणासाठी उत्सुकता दाखवलेली नाही त्यांना सारखी विनंती करण्यात येणार नाही. जे उत्सुक आहेत त्यांना प्राधान्य देण्यात येईल, असेही डॉ. व्यास यांनी स्पष्ट केले.