Nashik Crime: लहान मुलांच्या भांडणांवरून तुंबळ हाणामारी; तरुणाची भोसकून हत्या

February 09, 2021 Marathi 0 Comments

म. टा. प्रतिनिधी, : द्वारका भागातील परिसरात असलेल्या महालक्ष्मी चाळीत लहान मुलांचे भांडणावरून दोन गटांत तुंबळ हाणामारी झाली. भांडण सोडवण्यासाठी गेलेल्या तरुणाची चाकूने भोसकून हत्या करण्यात आली. काल, सोमवारी रात्री उशिरा ही घटना घडली. आकाश संतोष रंजवे असे हत्या झालेल्या तरुणाचे नाव आहे. रात्री अकरा वाजताच्या सुमारास दोन गटांत तुफान हाणामारी झाली. आकाश याची चाकूने भोसकून हत्या करण्यात आली. तर करण लोट हा युवक गंभीर जखमी झाला आहे. भद्रकाली पोलिसांनी पाच संशयितांना ताब्यात घेतले आहे. मिळालेल्या माहितीनुसार, सोमवारी रात्री अकरा वाजेच्या सुमारास लहान मुलांचे भांडण सोडवण्याच्या प्रयत्नात दोन गटांतच हाणामारी झाली. यावेळी संशयित विशाल बेनवाल आणि त्याच्या साथीदारांनी इतर युवकांना बोलावून घेतले. करण राजू लोट आणि आकाश संतोष रंजवे यांना ‘तू मेरी पुलीस को टीप क्यूँ देता हैं’, अशी विचारणा करत, शिवीगाळ सुरू केली. हा वाद आणखीन वाढत गेला आणि हातात चाकू, चॉपर आदी हत्यारे घेऊन संशयित तरूण एकमेकांवर धावले. यावेळी संशयित विशाल बेनवालसह सतीश टाक, पवन टाक, आकाश टाक, निखिल टाक, अभय बेनवाल, हरिष पवार, मनीष दुलगज आणि शिवम पवार यांच्यात हाणामारी सुरू झाली. आकाश रंजवे याची हत्या करण्यात आली. संशयितांनी जखमी करण लोट याच्या आईला व भावाला जीवे मारण्याची धमकी दिली. परिसरात तणाव निर्माण झाल्याने भद्रकाली पोलिसांनी त्वरित घटनास्थळी धाव घेतली. पोलिसांचा फौजफाटा आल्यावर संशयितांनी पळ काढला. दरम्यान, भद्रकाली पोलिसांनी खुनाचा व खुनाचा प्रयत्न केल्याप्रकरणी गुन्हा दाखल केला असून, नऊपैकी पाच संशयितांना ताब्यात घेतले. पुढील तपास सुरू करण्यात आला आहे.