प्रौढ मुलीला इच्छेप्रमाणे जोडीदार निवडण्याचा हक्क: हायकोर्ट

February 10, 2021 Marathi 0 Comments

म. टा. विशेष प्रतिनिधी, 'आपल्या देशात तीन हजारहून अधिक जाती, धर्म, पंथ आहेत. विविध प्रकारचे लोक आहेत. तरीही १३० कोटींची जनता एकत्र नांदते, हेच आपल्या देशाचे खरे सौंदर्य आहे आणि एकप्रकारचे आश्चर्यही आहे', असे महत्त्वाचे निरीक्षण मुंबई उच्च न्यायालयाने मंगळवारी नोंदवले. हिंदू-मुस्लिम नवदाम्पत्याला दिलासा देताना उच्च न्यायालयाने हे निरीक्षण नोंदवले. कल्याणमधील एका गावातील मुस्लिम तरुणी व शेजारच्या गावातील हिंदू तरुण यांनी जवळपास दीड महिन्यापूर्वी विवाह केला होता. दोघेही प्रौढ आहेत. मुलीला भेटू दिले जात नाही आणि पोलिसही दखल घेत नाहीत, असा आरोप करत मुलीच्या वडिलांनी अॅड. ताहेरा कुरेशी यांच्यामार्फत उच्च न्यायालयात धाव घेतली होती. त्याची दखल घेत न्या. संभाजी शिंदे व न्या. मनीष पितळे यांच्या खंडपीठाने निर्देश दिल्यानंतर पोलिसांनी सरकारी वकील अरुणा पै यांच्यामार्फत सोमवारी नवदाम्पत्याला न्यायालयासमोर हजर केले. खंडपीठाने मुलीकडे विचारणा केली असता, तिने पतीसोबतच राहण्याची इच्छा व्यक्त केली. त्यावेळी आंतरधर्मीय व आंतरजातीय विवाहांच्या प्रश्नावर सर्वोच्च न्यायालयाने यापूर्वी अनेक निवाड्यांत नोंदवलेल्या निरीक्षणाच्या आधारे खंडपीठाने वरील निरीक्षण नोंदवले. 'देशाचा एकोपा, एकजिनसीपणा व राष्ट्रीयत्व याची जपणूक करण्याच्या दृष्टीने आंतरधर्मीय व आंतरजातीय विवाहांना प्रोत्साहन द्यायला हवे, असे सर्वोच्च न्यायालयानेही निवाड्यांत स्पष्ट केलेले आहे. मुळातच आपल्या देशात तीन हजारहून अधिक जाती, धर्म, पंथ आहेत. जवळपास दर २५ किमीच्या अंतरावर आपल्याला वेगवेगळ्या पद्धतीचे लोक आढळतात. देशातील ६५ ते ७० टक्के लोक हे ग्रामीण भागात राहतात आणि शेतीवर अवलंबून आहेत. प्रचंड प्रमाणात विविधता असूनही तब्बल १३० कोटींची जनता एकत्र नांदते, हेच आपल्या देशाचे खरे सौंदर्य आहे आणि एकप्रकारचे आश्चर्यही आहे', असे निरीक्षण खंडपीठाने नोंदवले. 'जीवनसाथी निवडण्याचा मूलभूत हक्क' 'मुलगी प्रौढ असल्याने तिला तिच्या इच्छेप्रमाणे जीवनसाथी निवडण्याचा आणि हवे तिथे राहण्याचा मूलभूत हक्क आहे. तिला तुमच्याशीही संबंध ठेवायचे आहेत. तिला तुम्ही प्रेमाने वाढवले आहे. शेवटी तिची इच्छा महत्त्वाची असल्याने तुम्ही समजून घ्या. याविषयी शांतपणे विचार करा', असा सल्ला खंडपीठाने मुलीच्या पालकांना दिला. तसेच मुलीचा ताबा आमच्याकडे द्यावा, ही वडिलांची विनंती फेटाळून लावत त्यांची याचिका निकाली काढली.