मोदींच्या फोटोखाली मांडणार चूल; नेमका प्रकार काय?

February 28, 2021 Marathi 0 Comments

म. टा. प्रतिनिधी, नगर: स्वयंपाकाचा गॅस आणि इंधन दरवाढीचा निषेध नोंदविण्यासाठी राज्यभरात पेट्रोलपंपांसमोर चूल मांडण्याचा आंदोलन राष्ट्रवादी काँग्रेसच्या महिला आघाडीने पुकारले आहे. ज्या पंपावर पंतप्रधान नरेंद्र मोदी यांच्या फोटोसह जाहिरात आहे, तेथे हे आंदोलन करण्यात येणार आहे. कालच भाजपच्या महिला आघाडीतर्फे वनमंत्री संजय राठोड यांच्या राजीनाम्याच्या मागणीसाठी आंदोलन झाले. आज राष्ट्रवादी काँग्रेसच्या महिला दुसऱ्या आंदोलनासाठी रस्त्यावर उतरत आहेत. एकीकडे करोनाचे आकडे वाढत असता दुसरीकडे अशी आंदोलनेही सुरू आहेत. राष्ट्रवादी काँग्रेसच्या महिला आघाडीच्या प्रदेशाध्यक्षा रुपाली चाकणकर यांच्या आदेशावरून हे आंदोलन होत आहे. इंधनाच्या वाढत्या किमतीकडे लक्ष वेधण्यासाठी हे आंदोलन असल्याचे सांगण्यात आले. हे आंदोलन पेट्रोलपंपावर आणि मोदींच्या जाहिराती खालीच का, याबद्दलही चाकणकर यांनी आपली भूमिका स्पष्ट केली आहे. त्यांनी सांगितले की, दिवसेंदिवस गॅस आणि पेट्रोल-डिझेलच्या किंमतीचे दर गगनाला भिडत आहेत. असे असूनही पंतप्रधान नरेंद्र मोदींची प्रत्येक पेट्रोलपंपावरील जाहिरात ही सामान्यांना अच्छे दिनचा खोटा आशावाद देत आहे. यामुळेच राष्ट्रवादी महिला काँग्रेसच्या वतीने मोदींची जाहिरात असलेल्या महाराष्ट्रातील प्रत्येक पेट्रोलपंपावर रविवारी ‘चूल मांडा’ आंदोलन करण्यात येणार आहे. ज्या पेट्रोलपंपावर मोदींचा बॅनर किंवा जाहिरात आहे, त्या बॅनर किंवा फलकाखाली दगडाची किंवा विटांची चूल ठेवली जाईल. गॅस सिलेंडरच्या वाढत्या किंमतीच्या निषेधार्थ स्वयंपाकासाठी आता ही दगडाची आणि विटाची चूल पेटवण्याशिवाय पर्याय राहिला नाही, याचा प्रतिकात्मक निषेध यातून करण्यात येईल. वाचाः कालच भाजपच्या महिला आघाडीच्या प्रदेशाध्यक्षा चित्रा वाघ यांच्या नेतृत्वाखाली महिला आघाडीचे राज्यभर आंदोलन झाले होते. वनमंत्री राठोड यांच्यावर कारवाईच्या मागणीसाठी हे आंदोलन झाले होते. त्यानंतर आज राष्ट्रवादी काँग्रेसच्या महिला रस्त्यावर उतरत आहेत. ही आंदोलन करोनाच्या नियमांचे पालन करून केली जात असल्याचे सांगितले जाते. प्रत्यक्षात मात्र, अनेक ठिकाणी या नियमांचा भंग केला जातो. जनतेच्या हितासाठी आंदोलने होत असल्याचे सांगण्यात येत असले तरी करोनाचा फैलाव वाढत असताना अशी आंदोलने धोकादायक ठरण्याची शक्यता आहे. वाचाः