...तर महाराष्ट्रात करोना मृत्यू घटले असते!

February 17, 2021 Marathi 0 Comments

मुंबई: वर्षभरात संसर्गामुळे मुंबई तसेच राज्यामध्ये झालेल्या मृत्यूचे प्रमाण नियंत्रित करण्यासाठी आरोग्य व्यवस्थेतील सर्व रुग्णालयांमध्ये एका समान पद्धतीच्या निकषांचे पालन करणे गरजेचे होते. व्हेंन्टिलेटरचा प्रभावी वापर तसेच उपचार पद्धतीचे समान वैद्यकीय निकष योग्य प्रकारे पाळले असते तर राज्यात अधिक रुग्णांना वाचवण्यामध्ये यश मिळाले असते, असा महत्त्वाचा निष्कर्ष मृत्यू विश्लेषण समितीने सादर केलेल्या अहवालामध्ये मांडला आहे. एप्रिल महिन्यामध्ये मुंबईमध्ये मृत्यूदर अधिक दिसत होता. त्यावेळी मुंबई वगळता राज्याच्या इतर भागांमध्ये हे प्रमाण कमी होते. फेब्रुवारी महिन्यात मुंबईत हे प्रमाण नियंत्रित असून राज्याच्या अन्य भागांमध्ये रुग्णसंख्या व मृत्यूदर चिंतेचा ठरत आहे. ७ ते १३ फेबुवारी या कालावधीमध्ये राज्यात २० हजार ४१८ नव्या केसेस आढळून आल्या असून त्यात १९६ मृत्यू नोंदवण्यात आले. मुंबईमध्ये याच कालावधीमध्ये ३ हजार १५८ नवीन रुग्ण आढळून आले व मृत्यूचे प्रमाण हे २५ होते. ठाण्यामध्ये २ हजार १२३ नवे रुग्ण व १२ मृत्यू तर पालघरमध्ये २२१ नवे रुग्णांसह एका मृत्यूची नोंद झाली. एप्रिल, सप्टेंबर आणि फेब्रुवारी या महिन्यांमध्ये मुंबईतील प्रत्येक आठवड्याची रुग्णसंख्या व येथे झालेल्या मृत्यूचे प्रमाण पाहिले तर एप्रिल महिन्यामध्ये मुंबईमध्ये राज्याच्या तुलनेत अधिक मृत्यूंची नोंद झाली होती. त्या तुलनेमध्ये फेब्रुवारी महिन्यात मुंबईमध्ये मृत्यूचे प्रमाण कमी असून मुंबई वगळता राज्यातील इतर भागामध्ये आठवड्याला होणाऱ्या मृत्यूंचे प्रमाण वाढले आहे. एप्रिल महिन्यात १३१ मृत्यूंची आठवड्याला नोंद मुंबईत झाली होती. त्यावेळी राज्यातील अन्य भागात हे प्रमाण ६७ इतके होते. सप्टेंबर महिन्यात आठवड्याला मुंबईत ३१० जणांनी प्राण गमावले तर राज्यातील इतर भागात हे प्रमाण २२५७ इतके नोंदवण्यात आले होते. अतिदक्षता विभागाचे सुनियोजन आणि व्हेन्टिलेटर्सच्या योग्यवेळी करण्यात येणाऱ्या प्रभावी वापरावर अधिक लक्ष केंद्रित करायला हवे. तसेच जिल्हा व ग्रामीण पातळीवरील वैद्यकीय तज्ज्ञांना व्हेंन्टिलेटर व अतिदक्षता व्यवस्थापनाचे प्रशिक्षण मिळायला हवे, असे मत राज्याच्या मृत्यूदर समितीचे प्रमुख व हा विश्लेषण अभ्यास सादर करणाऱ्या डॉ. अविनाश सुपे यांनी व्यक्त केले. वैद्यकीय उपचार सुरू होऊन मृत्यू होईपर्यंतच्या कालावधीमध्ये दहा दिवसांहून अधिक काळ रुग्णालयामध्ये वैद्यकीय उपचारांवर असलेल्यांचे प्रमाण २९.८८ टक्के होते. तर एका दिवसांमध्ये संसर्गामुळे जीव गमावलेल्यांचे प्रमाण १९.८७ टक्के दिसून आले आहे. ६ ते ९ दिवस वैद्यकीय उपचार घेऊनही प्राण गेलेल्यांचे प्रमाण १९.४६ टक्के इतके आहे. तौलनिक अभ्यास मुंबई आणि दिल्लीचा तौलनिक अभ्यास करता फेबुवारी २०२१ मध्ये दिल्लीमध्ये शंभर ते दीडशे संसर्गित रुग्ण आढळून आली आहे. डिसेंबरमध्ये हे प्रमाण दीड ते दोन हजार इतके होते ते खाली आले आहे. मात्र, मुंबईमध्ये रुग्णसंख्या अद्यापही ३५० ते ५५० इतके नोंदवण्यात येत आहे. दिल्लीमध्ये शून्य ते दोन मृत्यू होत होते तर मुंबईत ४ ते ५ जणांना संसर्गामुळे जीव गमवावा लागला आहे. नवीन रुग्ण - महाराष्ट्र - १८९८७ केरळ - ३८६६५ ठाणे - ३३४३ नवीन मृत्यू केरळ - १२४ महाराष्ट्र - २२१ पुणे -४८ भाग - नवीन रुग्णसंख्या - मृत्यू - आठवड्याचा मृत्यूदर मुंबई आणि ठाणे - ५८८१ ( २९टक्के) - ५३ ( २७टक्के) - ०.९० उर्वरित महाराष्ट्र - १४५३७ ( ७१ टक्के ) - १४३ ( ७३ टक्के ) -०.९८