राम मंदिर निधी: 'भाजपकडून गोळा केल्या जाणाऱ्या पैशाचा हिशेब घ्या'
मुंबई: 'अयोध्येतील राम मंदिराच्या नावानं भाजप व आरएसएस घरोघरी जाऊन रोख पैसे गोळा करत असून त्यांच्याकडून जनतेला लुबाडले जाण्याची शक्यता आहे. हा पैसा भाजपाच्या कार्यकर्त्यांच्या घरी किंवा पक्षासाठी वापरला जाण्याची शक्यता आहे. त्यामुळं जनतेनं आपला निधी थेट राम मंदिर तीर्थक्षेत्र ट्रस्टमध्ये जाईल याची खबरदारी घ्यावी. तसंच, भाजपा-आरएसएसनं गोळा केलेला निधी ट्रस्टला पोहोचला की नाही याची चौकशी राज्य सरकारने करावी, अशी मागणी काँग्रेसनं केली आहे. () वाचा: राम मंदिराच्या उभारणीसाठी देशपातळीवर राम मंदिर तीर्थक्षेत्र ट्रस्टच्या माध्यमातून निधी गोळा केला जात आहे. सोबतच संघ परिवारातील संघटनांकडूनही निधी गोळा केला जात आहे. या पार्श्वभूमीवर महाराष्ट्र काँग्रेसचे प्रवक्ते सचिन सावंत यांनी पत्रकार परिषद घेऊन भूमिका मांडली. 'भाजप व संघ परिवाराने राम मंदिरासाठी यापूर्वीही निधी गोळा केला होता. त्याचे काय झाले याची माहिती त्यांनी दिलेली नाही. राम मंदिरासाठी गेली अनेक वर्षे लढणाऱ्या निर्मोही आखाड्याने विश्व हिंदू परिषदेवर १४०० कोटी रुपये लुबाडल्याचा आरोप केला होता. अखिल भारतीय हिंदू महासभेने २०१५ साली विहिंपने १४०० कोटी रुपये आणि अनेक क्विंटल सोने लुबाडले गेल्याचा आरोपही केला होता. तशी तक्रारही पंतप्रधान कार्यालयाकडे करण्यात आली होती. मात्र, याची चौकशी करण्याची तयारी भाजपच्या सरकारने दाखवलेली नाही, असं सावंत म्हणाले. वाचा: राम मंदिरासाठी भाजपकडून निधी गोळा करण्याच्या कार्यक्रमाला अखिल भारतीय हिंदू महासभेनं विरोध केला आहे. भाजपला अयोध्येत राम मंदिर कधीच नको होते आणि भाजपसाठी हा केवळ राजकीय आणि पैसे कमावण्याचा कार्यक्रम आहे. गेल्या तीन दशकामध्ये भाजपनं जमा केलेल्या पैशाचा अजूनही हिशोब दिलेला नाही, असं हिंदू महासभेचे प्रवक्ते प्रमोद पंडित जोशी यांनी सांगितलेलं आहे. निधीचा हिशेब सार्वजनिक न केल्यास कोर्टात जाण्याचा इशाराही जोशी यांनी दिला आहे, याकडं सावंत यांनी लक्ष वेधलं. सावंत यांनी दिली निधी संकलनातील गैरव्यवहाराची उदाहरणे >> १० सप्टेंबर २०२० रोजी राम जन्मभूमी तीर्थक्षेत्र ट्रस्टमधून ६ लाख रुपये क्लोन चेकच्या माध्यमातून काढले गेले होते. >> १२ एप्रिल २०२० रोजी दिल्लीच्या एका युवकावर अयोध्येतील राम मंदिर पोलिस ठाण्यात खोट्या ट्रस्टच्या नावाने खोटी वेबसाइट काढून पैसे लुबाडल्याची देखील तक्रार दाखल करण्यात आली आहे. >> खोट्या पावत्या दाखवून राम मंदिरासाठी निधी गोळा करणाऱ्या ४ लोकांवर श्रीराम मंदिर निर्माण समर्पण निधी समितीच्या मुरादाबाद येथील अध्यक्षांनी गुन्हा दाखल केलेला आहे. >> उत्तर प्रदेशातील पिलीभित येथे ५ लोकांनी खोट्या संघटनेच्या माध्यमातून पैसे गोळा केल्याचं उघड झालं आहे. >> दिल्ली येथे राम मंदिर ट्रस्टच्या नावाने खोटे ट्विटर, वेबसाइट बनवल्याची तक्रार राम मंदिर ट्रस्टचे महासचिव चंपतराय यांनी केली आहे. >> राम जन्मभूमी तीर्थक्षेत्रच्या नावाने घोटाळा केला जात असून अपहार करणाऱ्या १३ UPI ( United payment Interface) ची यादीच आरएसएसशी संबंधित ऑप-इंडिया या न्यूज पोर्टलनं दिली आहे. >> सूरत पोलिसांनी १६ जानेवारीला कारवाई करून एका युवकाला पैसे गोळा करताना पकडले आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
0 Comments: