नाशिकसाठी आयटी पार्क मंजूर करणारच; केंद्रीय मंत्री नारायण राणेंचं आश्वासन

March 02, 2022 Marathi 0 Comments

म. टा. खास प्रतिनिधी, नाशिकः आयटी पार्कमुळे नाशिकचा सर्वांगीण विकास होणार आहे. त्याबाबतची कागदपत्रे सादर करा. नाशिकसाठी आयटी पार्क मंजूर करणारच. भले त्यासाठी पंतप्रधान नरेंद्र मोदी यांना विनंती करू, पण नाशिकला आयटी पार्क देऊच, असे आश्वासन केंद्रीय सूक्ष्म, लघु आणि मध्यम उद्योगमंत्री यांनी दिले. महापालिकेचा महत्त्वाकांक्षी प्रकल्प आयटी पार्कसाठी मंगळवारी हॉटेल गेटव येथे भाजपच्या वतीने 'आयटी कॉन्क्लेव्ह-२०२२'चे आयोजन करण्यात आले होते. या परिषदेला प्रमुख पाहुणे म्हणून राणे उपस्थित होते. यावेळी भाजपचे सहप्रभारी जयकुमार रावल, आमदार प्रा. देवयानी फरांदे, सीमा हिरे, राहुल ढिकले, महापौर सतीश कुलकर्णी, उपमहापौर भिकूबाई बागूल, स्थायी समिती सभापती गणेश गिते, भाजपचे शहराध्यक्ष गिरीश पालवे, लक्ष्मण सावजी, प्रदीप पेशकार, राष्ट्रवादी काँग्रेसचे गटनेते गजानन शेलार, क्रेडाईचे अध्यक्ष रवी महाजन आदींसह विविध संघटनांचे पदाधिकारी उपस्थित होते. महापौर कुलकर्णी यांनी प्रास्ताविकातून आयटी पार्कबाबतची भूमिका स्पष्ट केली. शेतकऱ्यांनी ३३५ एकर जमीन आयटी पार्कसाठी देण्याचे मान्य केले आहे. महापालिकेच्या १५ एकर जागेत त्यासाठीच्या पूरक सुविधा देण्यात येणार आहेत. आयटी हब, लॉजिस्टिक पार्क, पालिकेच्या मोकळ्या जागा यांतून वर्षाला दीड हजार कोटींचे उत्पन्न मिळणार असल्याचे त्यांनी सांगितले. विवेक जायखेडकर, हितेन शहा, प्रदीप पेशकार, निटाचे संस्थापक अध्यक्ष अरविंद महापात्रा, क्रेडाईचे अध्यक्ष रवी महाजन, आमदार देवयानी फरांदे, आयटी उद्योजक चेतन सोनार, पीयूष सोमाणी यांनी मनोगत व्यक्त केले. यावेळी राणे म्हणाले की, आयटीमधून उद्योजक कसे तयार होतील, दरडोई उत्पन्न, जीडीपी कसा वाढेल आणि आत्मनिर्भर भारत कसा बनेल यासाठी आपण प्रयत्न करणार आहोत. सगळ्या कागदपत्रांसह प्रस्ताव सादर करा. नाशिकला आयटी पार्क मंजूर करू. त्यासाठी प्रसंगी पंतप्रधानांना विनंती करू, असे ते म्हणाले. मुख्यमंत्र्यांवर टीका जात, धर्म, पक्ष बाजूला ठेवून विकासाचा विचार करण्याची गरज आहे. परंतु, शिवसेनेकडून सध्या सगळ्यांना त्रास दिला जात आहे. आधी प्रकल्पांना विरोध करायचा आणि नंतर तेथील जागा बळकावून जास्त दराने विकायच्या, हे शिवसेनेच्या लोकांचे काम आहे. विकासाला विरोध करणारा पक्ष आहे. नितेश राणे यांच्यावर ३०६ ची केस टाकली. त्यात २० वर्षांची शिक्षेची तरतूद आहे. आम्ही खंबीर आहोत. आधी तुमची मंत्रालयातील खुर्ची हलते आहे, ती सांभाळा. मोदींवर टीका करण्याची मुख्यमंत्र्यांची पात्रता नाही. महाराष्ट्राचा मुख्यमंत्री मंत्रालयात जात नाही. युक्रेनमधून आलेल्या विद्यार्थ्यांच्या स्वागतासाठी मी गेलो. तेथे मुख्यमंत्र्यांनी जायला हवे होते. परंतु, जे मंत्रालयात जात नाहीत, ते स्वागताला काय जातील? महाराष्ट्रच आजारी पडलाय, अशी टीका त्यांनी केली. पालकमंत्री, अधिकारी अनुपस्थित हा कार्यक्रम महापालिकेचा असला, तरी त्याला भाजपच्या राजकीय इव्हेंटचे स्वरूप प्राप्त झाले होते. कार्यकर्त्यांची प्रचंड गर्दी झाली होती. पालकमंत्री छगन भुजबळ यांनीही या कार्यक्रमाकडे पाठ फिरविली. महापालिका आयुक्त कैलास जाधव यांच्यासह जिल्हाधिकारी सूरज मांढरे, पोलिस आयुक्त दीपक पांडे यांनीही या कार्यक्रमापासून अंतर राखले. पालिका आयुक्तांच्या अनुपस्थितीबाबत राणे यांनी नाराजी व्यक्त केली. शिवसेनेच्या लोकांनी त्यांना धमकावले असू शकते, असे ते म्हणाले.