एसी लोकलचे दर कधी घटणार?; मुंबईकरांना प्रतीक्षा

March 14, 2022 Marathi 0 Comments

म. टा. प्रतिनिधी, मुंबईः 'वातानुकूलित (एसी) लोकलचे तिकीट दर कमी करण्यासाठी लवकरच जनहिताचा निर्णय घेणार', या रेल्वेमंत्री अश्विनी वैष्णव यांच्या आश्वासनाला जवळपास महिना उलटला आहे. मात्र अद्याप लोकल दर घटण्याची प्रतीक्षा कायम आहे. वाढत्या उन्हामुळे एसी लोकलचा वाढलेला प्रतिसाद आणि पुढे जाण्याची असलेली शक्यता, यामुळे वातानुकूलित लोकलच्या तिकिटाचे दर कमी होण्याची शक्यताही लांबणीवर पडण्याची चिन्हे आहेत. ठाणे-दिवा पाचव्या सहाव्या मार्गिकेचे लोकार्पण कार्यक्रमात रेल्वे मंत्री अश्विनी वैष्णव आणि रेल्वे राज्यमंत्री रावसाहेब दानवे यांनी लोकल प्रवास केला. यावेळी मुंबईकरांना प्रवास गारेगार व्हावा, यासाठी तिकीट दर कमी करण्याचा प्रस्ताव आला असून यावर लवकरच निर्णय घेण्यात येणार असल्याचे यावेळी सांगण्यात आले होते. सध्या मुंबईतील तापमानाचा पारा वाढला आहे. दुपारी साध्या लोकलमध्ये उन्हाच्या अतितीव्र झळा लागत असल्याने काही प्रवासी एसी लोकलकडे वळले आहेत. याचा मासिक-त्रैमासिक पास हा अॅप बेस्ड एसी टॅक्सीच्या मासिक खर्चाच्या तुलनेत कमी असल्याने एसी लोकलमध्ये पासधारकांची संख्या जास्त आहे. मात्र अनेक प्रवासी रेल्वेमंत्र्यांच्या आश्वासनानुसार तिकीट स्वस्त कधी होईल त्यानंतर एसी लोकलने प्रवास करण्याच्या तयारीत आहेत. महानगर प्रदेशातील सर्वच महापालिकेला जोडण्याचे काम एसी लोकल करते. नुकताच एसी लोकलचा विस्तार कसारा-कर्जत मार्गावर करण्यात आला आहे. निवडणुकांच्या काळात मतदारांना आकर्षित करण्यासाठी तिकीट दर कमी करणे, हा चांगला पर्याय ठरू शकेल, असे मत राज्यकर्त्यांकडून व्यक्त करण्यात आले आहे. राजकीय पेचामुळे महापालिका निवडणूका पुढे जाण्याची दाट शक्यता वर्तविण्यात येत आहे. निवडणुकीच्या धर्तीवर लवकरच तिकीट दर कमी होणार की तीही लांबणीवर जाणार? असा प्रश्न प्रवाशांमधून उपस्थित होत आहे. प्रस्तावही पाठवलेला नाही मध्य आणि पश्चिम रेल्वेवरील वातानुकूलित लोकलचे तिकीट दर प्रथम दर्जाच्या तिकीट दरापेक्षा अधिक आहेत. दर अधिक त्यातच मर्यादित लोकल फेऱ्या यांमुळे वातानुकूलित लोकलला हवा तसा प्रवासी प्रतिसाद मिळालेला नाही. ही बाब मध्य-पश्चिम रेल्वेच्या ही लक्षात आल्याने तिकीट दर कमी करण्याचा प्रस्ताव रेल्वे मंडळाकडे पाठवण्यात आला आहे