रस्त्यावरचा संघर्ष विधिमंडळात; अर्थसंकल्पीय अधिवेशनात कुरघोडीचा नवा अंक

March 02, 2022 Marathi 0 Comments

मुंबई : केंद्रातील तपास यंत्रणांच्या कारवाईमुळे महाविकास आघाडीविरोधात भाजप असा नवा संघर्षच पेटला असून, उद्या, गुरुवापासून सुरू होणाऱ्या अर्थसंकल्पीय अधिवेशनाच्या निमित्ताने या संघर्षाच्या जोरदार ठिणग्या उडणार आहेत. त्यातच राज्यपाल भगतसिंह कोश्यारी यांनी छत्रपती शिवाजी महाराज यांच्याविषयी केलेले वादग्रस्त विधान, मलिक यांच्या राजीनाम्याची विरोधकांची मागणी यांसारख्या मुद्द्यांमुळे या संघर्षाला अधिकच धार चढणार आहे. प्रकृती अस्वास्थ्यामुळे उपचार घेणारे मुख्यमंत्री उद्धव ठाकरे अधिवशनाच्या निमित्ताने थेट समोर येणार असल्याने ठाकरे विरुद्ध भाजप असा जोरदार सामनाही या निमित्ताने रंगल्याचे पहायला मिळणार आहे. राज्यात सत्ताधारी विरुद्ध विरोधक असा संघर्ष टोकाला गेला आहे. गेल्या काही महिन्यांपासून राज्यात केंद्रीय तपास यंत्रणांच्या कारवायांमध्ये वाढ झाली आहे. मुंबई बॉम्बस्फोटातील हस्तकांकडून जमीन खरेदी केल्याच्या आरोपावरून 'ईडी'ने अल्पसंख्याकमंत्री नवाब मलिक यांना अटक केली. यामुळे आघाडी सरकारला धक्का बसला. आघाडीचे घटक पक्ष मलिक यांच्या पाठीशी ठामपणे उभे राहून 'ईडी'च्या विरोधात थेट रस्त्यावर उतरले. त्यावर भाजपनेही रस्त्यावर उतरून 'ईडी'च्या कारवाईचे समर्थन करून मलिक यांच्या राजीनाम्याची मागणी केली. मलिक यांचा राजीनामा घेतल्याशिवाय अधिवेशन चालू देणार नाही, असा इशारा भाजप प्रदेशाध्यक्ष चंद्रकांत पाटील यांनी दिला असून, आघाडी सरकार मलिक यांच्या पाठीशी खंबीरपणे उभे राहणार असल्याने अधिवेशनाची सुरुवातच या गदारोळाने होण्याची दाट शक्यता आहे. फोन टॅपिंग प्रकरणात पुण्याच्या माजी पोलिस आयुक्त रश्मी शुक्ला यांच्याविरोधात दाखल झालेला गुन्हा, राज्यपाल भगतसिंह कोश्यारी यांनी छत्रपती शिवाजी महाराज यांच्याबद्दल केलेले वादग्रस्त विधान यामुळे अधिवेशनाच्या पहिल्या दिवशी राज्यपालांच्या अभिभाषणावेळी आघाडीच्या आमदारांकडून घोषणाबाजी होण्याची शक्यता आहे. नितेश राणे यांना झालेली अटक, लवासा प्रकरणातील न्यायालयाचे ताशेरे यासारख्या मुद्द्यांवरूनही अधिवेशनातील तापमान चढणार आहे. अर्थसंकल्पात शहरांसाठी घोषणा? राज्याचा २०२२-२३ या वर्षाचा अर्थसंकल्प ११ मार्चला सादर होणार आहे. करोनाची परिस्थिती निवळत असल्याने येत्या एप्रिल-मे महिन्यात मुंबई महापालिकेसह अन्य महत्त्वाच्या महापालिका; तसेच स्थानिक स्वराज्य संस्थांच्या निवडणुका होणार आहेत. या निवडणुका डोळ्यासमोर ठेवून अर्थसंकल्पात सरकारकडून शहरी भागासाठी महत्त्वाच्या घोषणा अपेक्षित आहेत. विधानसभाध्यक्ष निवडणुकीची तयारी? विधानसभेचे अध्यक्षपद वर्षभर रिक्त असून मागच्या अधिवेशनात संधी न मिळाल्याने आता अर्थसंकल्पीय अधिवेशनात विधानसभा अध्यक्षपदाची निवडणूक घेण्याची तयारी आघाडीने केली आहे. मात्र, सरकार आणि राज्यपाल यांच्यातील संबंध तणावाचे असल्याने या निवडणुकीवर प्रश्नचिन्ह कायम आहे. विधानसभा अध्यक्ष निवडणूक नऊ मार्चला व्हावी, असा प्रस्ताव सरकारने राजभवनला पाठवला आहे.