मुंबईकरांचा लोकल प्रवास आता होणार 'स्मार्ट'

March 14, 2022 Marathi 0 Comments

म. टा. प्रतिनिधी, मुंबईकरांच्या प्रवासी गरजा ओळखून त्यानुसार स्वयंचलित पद्धतीने काम करणाऱ्या २३८ स्मार्ट वातानुकूलित लोकलची बांधणी प्रक्रिया मुंबई रेल्वे विकास महामंडळाकडून (एमआरव्हीसी) सुरू करण्यात आली आहे. सध्या धावणाऱ्या वातानुकूलित लोकलमधील सुविधा वाढवण्यात येणार असून यासाठी स्वदेशी-विदेशी अशा एकूण नऊ कंपन्यांनी तयारी दर्शवली आहे. सध्या धावत असलेल्या वातानुकूलित लोकलमधील तापमान कमी आहे. यामुळे आसनेदेखील थंडगार होतात. या अडचणी दूर करण्यासाठी डब्यातील प्रवासीसंख्येनुसार सेंसरच्या मदतीने तापमान नियंत्रित करणारी यंत्रणा बसविण्यात येणार आहे. वीज बचतीच्या स्मार्ट यंत्रणेचादेखील समावेश यात असणार आहे. सध्याच्या वातानुकूलित लोकलमधील स्टील-अॅल्युमिनियमच्या आसनांना पर्याय म्हणून लाकडी-फायबर यांच्या मिश्रणाच्या आसनांचा पर्याय ठेवण्यात आला आहे. निविदा प्रक्रियेअंती यावर अंतिम निर्णय घेण्यात येईल, असे वरिष्ठ रेल्वे अधिकाऱ्यांनी सांगितले. मुंबई उपनगरीय लोकलच्या इतिहासात या आत्तापर्यंतच्या सगळ्यात मोठ्या निविदा असणार आहेत. मेधा-भेलसह बंबार्डीअर, ऑलस्टॉम, हिताची, सीमेन्स आणि अन्य अशा एकूण नऊ कंपन्यांनी लोकल बांधणीची तयारी दर्शवली आहे. येत्या तीन महिन्यांत वातानुकूलित लोकलसाठी निविदा मागविण्यात येणार आहेत, असे एमआरव्हीसीचे अध्यक्ष आणि व्यवस्थापकीय संचालक रवी अग्रवाल यांनी सांगितले. निधी उपलब्ध मुंबई नागरी परिवहन प्रकल्प (एमयूटीपी) ३मधील ४७ आणि ३ अमधील १९१ अशा एकूण २३८ लोकलची बांधणी करण्यात येणार आहे. केंद्रीय अर्थसंकल्पात आर्थिक तरतूद करण्यात आली आहे. त्याचबरोबर एशियन इन्फ्रास्ट्रक्चर इनव्हेस्टमेंट बँकेकडूनही (एआयआयबी) निधी उपलब्ध झालेला आहे. निविदा प्रक्रिया पूर्ण झाल्यानंतर संबंधित कंपनी नियुक्त करण्यात येईल. साधारणपणे वर्षभरात या लोकल दाखल होण्यास सुरुवात होणार आहे.