गोव्याहून मुंबईत येणाऱ्या विमानात माथेफिरू प्रवाशाचा गोंधळ; विमानाच्या आकाशात घिरट्या

February 22, 2022 Marathi 0 Comments

म. टा. खास प्रतिनिधी, मुंबईः एका माथेफिरू प्रवाशाने घातलेल्या गोंधळामुळे इंडिगो एअरलाइन्सच्या विमानाला मुंबईच्या आकाशात घिरट्या घालाव्या लागल्याची घटना समोर आली आहे. गोव्याहून मुंबईत येणाऱ्या विमानातील या प्रवाशाला बॅग घेऊन बाथरूममध्ये जाण्यापासून रोखल्याने त्याने चिडून गोंधळ घातला. विमान उतरण्याची वेळ आली, तरी हा प्रवासी जागेवर बसेना. एकदा तर विमान खाली आणून पुन्हा उड्डाण घ्यावे लागले. अखेर इतर प्रवाशांच्या मदतीने या प्रवाशाला जबरदस्तीने सीटवर बसवून पट्ट्याने बांधण्यात आले. त्यानंतरच या विमानाचे लँडिंग झाले. इंडिगो एअरलाइन्सच्या विमानाने २० फेब्रुवारी रोजी सकाळी ६.५५ मिनिटांनी गोव्याच्या दाबोलिम विमानतळावरून मुंबईसाठी उड्डाण केले. काही वेळाने सलमान खान हा प्रवासी जागेवरून उठला आणि पाठीवरील बॅगसह बाथरूममध्ये जाऊ लागला. बॅग घेऊन बाथरूमला जाण्याची परवानगी नसल्याने विमानातील कर्मचाऱ्यांनी त्याला रोखले व बॅग सीटवर ठेवण्यास सांगितले. सलमान कर्मचाऱ्यांशी हुज्जत घालू लागला व वैमानिकांच्या केबिनमध्ये जाण्याची मागणी करू लागला. त्यावरूनही त्याने भांडण सुरू केले. विमानाच्या गॅलीमध्ये उभे न राहण्याचा नियमही त्याने धुडकावला. आपले आसन बदलावे, अशीही मागणी त्याने सुरू केली. सर्व आसने आरक्षित असल्याने कर्मचाऱ्यांनी त्यास नकार दिला. तोपर्यंत विमान मुंबईच्या आकाशात दाखल झाले. विमान उतरण्याची वेळ झाल्याने कर्मचाऱ्यांनी सर्वांना जागेवर बसून पट्टा बांधण्यास सांगितले. मात्र सलमान गॅलीमध्येच उभा असल्याने वैमानिकाने उतरण्यासाठी खाली आणलेले विमान पुन्हा आकाशात झेपावले. पोलिसांच्या ताब्यात सलमानला वारंवार सांगूनही तो ऐकत नसल्याने या विमानाला मुंबईच्या आकाशातच काही वेळ घिरट्या घालाव्या लागल्या. सलमानच्या या कृत्यामुळे प्रवाशांच्या जीवाला धोका असल्याने कॅप्टनने इतर प्रवाशांच्या मदतीने त्याला सीटवर जबरदस्तीने बसविले आणि पट्टा लावला. त्यानंतर त्याला विमानतळ पोलिसांच्या ताब्यात देण्यात आले. त्याच्याविरुद्ध विमानतळ पोलिस ठाण्यात गुन्हा दाखल करण्यात आला आहे.