'किंगमेकर नव्हे, किंग व्हायचे आहे'; मुंबईसाठी मनसेचा नवा आराखडा

February 23, 2022 Marathi 0 Comments

म. टा. खास प्रतिनिधी, मुंबईः आगामी मुंबई महानगरपालिका निवडणुकीसाठी महाराष्ट्र नवनिर्माण सेनेने योजनाबद्ध आराखडा आखला आहे. निवडणुकीसाठी जास्तीत जास्त मतदार नोंदणी करणे, विभागवार मतदारांना आकर्षित करण्यासाठी वेगवेगळ्या समितींचे गठन करणे, त्याचबरोबर मतदारांबरोबर कशा प्रकारे संवाद साधायचा, यांसारख्या अनेक बाबींवर भर देण्याची सूचना कार्यकर्त्यांना मंगळवारी करण्यात आली. मुंबई महानगरपालिका निवडणुकींसाठी इच्छुक उमेदवारांना ऑनलाइन अर्ज करण्याचे आवाहनही मनसेकडून करण्यात आले. महाराष्ट्र नवनिर्माण सेनेने आगामी मुंबई महापालिका निवडणूक स्वबळावर लढण्याचे नुकतेच जाहीर केले. त्यानुसार नेतेमंडळींची विशेष बैठक नुकतीच पार पडली. त्यानंतर आता मनसेच्या पदाधिकाऱ्यांसाठी विशेष मार्गदर्शन शिबीर मंगळवारी वांद्रे येथील रंगशारदा सभागृहात झाले. यावेळी मनसेचे नेते बाळा नांदगावकर, नितीन सरदेसााई यांच्यासह अनेक मान्यवर उपस्थित होते. या मार्गदर्शन शिबिरात निवडणूक आयोगाच्या आजी-माजी सदस्यांसह इतर मान्यवरांनी मार्गदर्शन केले. मनसे अध्यक्ष यांच्या सभांना मोठ्या प्रमाणात गर्दी होते. पण अनेक वेळा त्यांचे मतांमध्ये रूपांतर होत नाही. त्यासाठी मनसेने विशेष लक्ष देण्याचे ठरविले आहे. यासाठी मतदार नोंदणीसह निवडणूक प्रक्रियेतील इतर बारकाव्यांची माहिती कार्यकर्त्यांना देण्यात आली. त्याचप्रमाणे प्रत्येक विभागात तेथील स्थानिक रहिवाशांची माहिती लक्षात घेऊन विशेष टीम स्थापन करण्यात येणार आहे. त्यांच्यावर स्थानिकांशी संवाद साधण्याची जबाबदारी सोपवण्यात आल्याची माहिती कार्यकर्त्यांकडून देण्यात आली. मुख्य म्हणजे, येत्या दोन दिवसांनंतर मुंबई महानगरपालिका निवडणुकीसाठी इच्छुक असणाऱ्या उमेदवारांसाठी एक ऑनलाइन व्यासपीठ उपलब्ध करून दिले जाणार आहे. 'किंगमेकर नव्हे, किंग व्हायचे आहे' आगामी मुंबई महापालिका निवडणुकीसाठी मनसे किंगमेकरच्या भूमिकेत असेल, असे भाकित अनेकांकडून वर्तवण्यात येत आहे. मात्र या निवडणुकीत मनसेला किंगमेकर नाही, तर किंगच्या भूमिकेत राहायचे आहे, अशी ठाम भूमिका मनसे नेते बाळा नांदगावकर यांनी मांडली.