बुलेट ट्रेन सुस्साट! ठाणे जिल्ह्यातील संपादन पूर्ण, लवकरच काम सुरू होणार

February 17, 2022 Marathi 0 Comments

म. टा. प्रतिनिधी, मुंबई: पंतप्रधान नरेंद्र मोदी यांचा महत्त्वाकांक्षी प्रकल्प असलेल्या मुंबई-अहमदाबाद प्रकल्पासंबंधी राज्यातील रखडलेल्या भूसंपादनाला आता वेग आला आहे. राज्यात ११ फेब्रुवारीपर्यंत ६१ टक्के जमीन संपादन पूर्ण झाले आहे. यामुळे गुजरातप्रमाणे राज्यातदेखील बुलेट ट्रेन प्रकल्पाचे काम वेगाने सुरू होण्याची शक्यता रेल्वे अधिकाऱ्यांनी व्यक्त केली आहे. बुलेट ट्रेनचा फायदा केवळ गुजरातला होईल, असे म्हणून ठाणे जिल्ह्यासह राज्यातील अनेक प्रकल्पबधितांनी या प्रकल्पास कडाडून विरोध दर्शविला होता. प्रकल्पबाधितांच्या मागणीला शिवसेना, काँग्रेस आणि राष्ट्रवादी या पक्षांनी पाठिंबा देऊन या प्रकल्पास तीव्र विरोध केला होता. अखेर रेल्वे अधिकाऱ्यांनी प्रकल्पबधितांची भेट घेऊन त्यांची समजूत काढल्यानंतर भूसंपादन प्रक्रियेला वेग आला आहे. ठाणे, भिवंडी, कल्याण येथील जवळपास सर्व जागेचे संपादन पूर्ण झाले आहे. सध्या केवळ इलेक्ट्रोड स्टेशनच्या सरकारी जागेचे संपादन बाकी आहे. प्रकल्पांतर्गत येणारी खासगी जागा ताब्यात घेण्यात आलेली आहे. यामुळे इलेक्ट्रोड स्टेशनची जागा वगळता ठाणे जिल्ह्यातील १०० टक्के खासगी भूसंपादन पूर्ण झाले आहे, असे ठाणे जिल्हाधिकारी कार्यालयातून सांगण्यात आले. राज्यातील ४३३.४२ हेक्टर जमिनीपैकी ६१.४७ टक्के अर्थात, २६६.६९ हेक्टर जागेचे संपादन पूर्ण झाले आहे. गुजरातमधील ९८.६३ टक्के जमिनीचे संपादन पूर्ण झाले आहे. राज्यातील संपादनाचा टक्का वाढल्याने एकूण बुलेट प्रकल्पाचे सरासरी संपादन ८७ टक्क्यांवर पोहोचले आहे. महाराष्ट्र, गुजरात आणि दादरा नगर हवेली या राज्यातील एकूण १२१५.८३ हेक्टर जमिनीचा ताबा नॅशनल हायस्पीड रेल कॉर्पोरेशनकडे (एनएचआरसीएल) आलेला आहे. उर्वरित १८१ हेक्टर जमिनीचे संपादन करण्याची प्रक्रिया सुरू आहे, अशी माहिती एनएचआरसीएलच्या अधिकाऱ्यांनी दिली. मुंबई आणि अहमदाबाददरम्यान बुलेट ट्रेन प्रकल्पाची पायाभरणी सप्टेंबर २०१७ मध्ये झाली होते. या प्रकल्पाचे काम २०२३ पर्यंत पूर्ण करण्याचे उद्दिष्ट सुरुवातीला ठेवण्यात आले होते. परंतु करोनामुळे भूसंपादनातील समस्या आणि बांधकाम विलंबामुळे प्रकल्पाच्या कामावर परिणाम झाला. त्यात राज्यातील संपादन रखडल्याने गुजरातमधील सुरत ते बिलीमोरा या मार्गावर २०२६पर्यंत या प्रकल्पाचा पहिला टप्पा चालवण्याचा निर्णय घेण्यात आला आहे. डीपीआर फेब्रुवारीअखेर ७६६ किलोमीटर लांबीच्या मुंबई-नागपूर बुलेट ट्रेनचा तपशीलवार प्रकल्प अहवाल (डीपीआर) फेब्रुवारीअखेर पूर्ण करण्यात येईल. ही बुलेट ट्रेन समृद्धी महामार्गालगत धावण्याचे प्रस्तावित आहे. यासाठी आवश्यक ७० टक्के जमीन रेल्वेच्या ताब्यात असून केवळ ३० टक्के जागेची आवश्यकता आहे, असे रेल्वे अधिकाऱ्यांनी सांगितले.