करोना रुग्णांच्या नातेवाईकांसाठी महत्त्वाची बातमी, 'असं' केल्यास करोनाचा प्रसार होणार नाही

January 13, 2022 Marathi 0 Comments

औरंगाबाद : करोनाबाधित होणाऱ्यांना आपल्या देशात सात दिवसांचे विलगीकरण सांगितले आहे; परंतु अत्यंत वेगात पसरणाऱ्या विषाणूमुळे बाधिताच्या कुटुंबातील सदस्यही बाधित झाल्याचे गृहीत धरून कुटुंबियांनीही गृह विलगीकरणात राहणे सर्वांच्या हिताचे आहे. त्यामुळे आपले कर्तव्य समजून बाधिताच्या कुटुंबीयांनीही सात दिवस गृह विलगीकरणात राहावे, असे आवाहन तज्ज्ञांनी केले आहे. देशात पावणे दोन वर्षांपूर्वी आलेल्या करोनाच्या पहिल्या लाटेत; म्हणजेच मार्च २०२० मध्ये करोनाचा प्रादुर्भाव सुरू झाला आणि त्यावेळी सर्वप्रथम १४ दिवसांचे विलगीकरण जाहीर करण्यात आले होते. त्यानंतर हळूहळू विलगीकरणाचा कालावधी दहा दिवसांवर आला आणि दुसऱ्या लाटेत तर हाच कालावधी सात दिवसांवर आला. आता तिसऱ्या लाटेत भारताने सात दिवसांचे विलगीकरण यापूर्वीच जाहीर केले असले तरी लक्षणे दिसल्यानंतर पाच दिवसांनी ओमिक्रॉन विषाणू पसरत नाही, असेही समोर येत आहे. या संदर्भात शहरातील फिजिशियन डॉ. आनंद देशमुख म्हणाले, अमेरिकेच्या 'सेंटर्स फॉर डिसीज कंट्रोल अँड प्रीव्हेन्शन' या जबाबदार आरोग्य संस्थेने (सीडीसी) पाच दिवसांनंतर विषाणू परसण्याची शक्यता नसल्याचे स्पष्ट केले आहे. त्यामुळे पाच ते सात दिवसांचे गृह विलगीकरण पुरेसे आहे. मात्र ओमिक्रॉन विषाणू अत्यंत वेगाने पसरत असून, बाधिताचे कुटुंबीय हेसुद्धा बाधित होण्याची शक्यता नाकारता येत नाही. त्यामुळेच बाधिताच्या कुटुंबियांनीही विलगीकरणात राहणे अपेक्षित आहे.' विषाणू राहतोच घशातच ओमिक्रॉन विषाणू हा केवळ घशातच राहतो आणि घशाखाली उतरत नसल्यामुळे दम लागणे, श्वास घेण्यास त्रास होणे अशी लक्षणे या लाटेत नाहीत. याच कारणामुळे सध्या तरी करोनाचे गंभीर रुग्ण या लाटेत दिसत नसल्याचे निरीक्षण फिजिशियन डॉ. विकास रत्नपारखे म्हणाले. नव्याने बाधित झालेल्या; पण काही वैद्यकीय कारणामुळे सीटी स्कॅन केलेल्या किमान २० रुग्णांचे सिटी स्कोअर शून्य आढळून आले आहेत. त्यामुळे तिसऱ्या लाटेत फुफ्फुसांची इजा अत्यल्प दिसून येत आहे. मात्र विषाणू पसरण्याचा वेग खूप जास्त असल्याने खबरदारी घेणे व त्रिसूत्री पालन करणे गरजेचे आहे. - डॉ. समीध पटेल, अतीव दक्षता तज्ज्ञ आता करोनाबाधित होणाऱ्या व्यक्तीचे कुटुंबीय हेदेखील बाधित झाल्याचे गृहीत धरावे लागणार, इतक्या जास्त प्रमाणात त्या विषाणूचा पसरण्याचा वेग आहे. त्यामुळे बाधिताच्या कुटुंबीयांनी ७ दिवसांचे गृह विलगीकरण स्वत:हून काटेकोरपणे पाळावे. कर्तव्य पालन म्हणून विलगीकरण स्वीकारणे सर्वांच्या हिताचे आहे. - डॉ. आशिष कठाळे, अतीव दक्षता तज्ज्ञ