करोनाची लस न घेणाऱ्यांना रेशनही मिळणार नाही; 'या' जिल्ह्यात मोठा निर्णय

December 19, 2021 Marathi 0 Comments

विजयसिंह होलम । करोना प्रतिबंधक लसीकरण वाढावे यासाठी अनेक जिल्ह्यांत लस न घेतलेल्यांच्या विविध सुविधा बंद करण्यात येत आहेत. असाच निर्णय आता अहमदनगर जिल्ह्यातही झाला आहे. लस न घेतलेल्यांना पेट्रोल, रेशन व अन्य सुविधा देणे तात्काळ रद्द करा, अशा सूचना पालकमंत्री यांनी प्रशासनाला दिल्या आहेत. ज्यांनी एकही डोस घेतलेला नाही, त्या ग्रामस्थांची गावे त्यांच्या गावात जाहीर केली जाणार आहेत. करोनाच्या दुसऱ्या लाटेत राज्याची डोकेदुखी वाढविलेल्या नगर जिल्ह्यात लसीकरणाचा वेग अत्यंत कमी आहे. ओमिक्रॉमचे संकट डोक्यावर असतानाही लसीकरणाचा वेग वाढत नाही. त्यामुळे आता प्रशासनाने कडक पावले उचलण्यास सुरवात केली आहे. पालकमंत्री मुश्रीफ यांच्या अध्यक्षतेखाली करोना उपाययोजना आढावा बैठक घेण्यात आला. यावेळी जिल्हाधिकारी डॉ. राजेंद्र भोसले, महानगरपालिकेचे आयुक्त शंकर गोरे आदींसह पदाधिकारी यावेळी उपस्थित होते. त्यानंतर मुश्रीफ यांनी पत्रकारांना यासंबंधी माहिती दिली. वाचा: मुश्रीफ म्हणाले की नगर जिल्ह्यामध्ये आतापर्यंत नऊ लाख लोकांनी एकही डोस घेतला नाही. पाच लाख लोकांनी पहिला डोस घेतला, पण अजून दुसरा डोस घेतला नाही. ज्यांनी एकही डोस घेतलेला नाही त्यांच्या काही नागरी सुविधा बंद करण्यात येणार आहेत. यामध्ये पेट्रोल असो अथवा रेशन व अन्य सुविधा तात्काळ बंद कराव्यात अशा प्रकारचे निर्देश येथील प्रशासनाला दिले आहेत. एकही डोस न घेणाऱ्या व्यक्तींची नावे त्याच्या गावांमध्येही जाहीर करावीत अशाही सूचना देण्यात आलेल्या आहेत. गावा गावातून त्यांचा शोध घेऊन त्यांच्याशी डोस घेण्याबाबत संवाद साधावा तसेच त्यांच्या नावांचे फलक गावातून लावण्यात येणार आहेत. अनेक तज्ञांच्या मते तिसरी लाट जानेवारीमध्ये येण्याची शक्यता आहे. त्यामुळे प्रशासनाने दुर्लक्ष न करता गांभीर्याने या गोष्टींकडे लक्ष देण्याची गरज आहे. नगर जिल्ह्यामध्ये लहान मुलांना करोनाची लागण झाल्याचे पुढे आले आहे, आम्ही काळजी घेत आहोत, पालकांनीही काळजी घ्यावी. मुलांचे बाधित होण्याचे प्रमाण वाढले, तर शाळांसंबंधी योग्य तो निर्णय घेण्यात येईल, असेही ते म्हणाले. सिव्हिलचा अहवाल आला जिल्हा रुग्णालयात लागलेल्या आगीच्या संदर्भातला अहवाल राज्य शासनाला प्राप्त झालेला आहे, त्या अहवालाबाबत लवकरच आरोग्य मंत्र्यांशी बोलून तो अहवाल जाहीर करण्यात येणार आहे. जो कोणी दोषी असेल त्याच्यावर निश्चितपणे कारवाई केली जाईल. यामध्ये आम्ही मागे-पुढे पाहणार नाही. आगीत नुकसान झालेल्या अतिदक्षता विभागाची दुरूस्ती करण्याचे कामही लवकरच सुरू होणार आहे, असेही त्यांनी सांगितले.