मुलाच्या अपघाती मृत्यूची बातमी आईला काळाली अन्…

December 30, 2021 Marathi 0 Comments

विजयसिंह होलम । एलआयसी एजंट असलेल्या मुलाचा अपघातात मृत्यू झाला. याची माहिती त्याच्या आईला कळाली. याचा धक्का सहन न झाल्याने आईला हृदयविकाराचा झटका आला. यातच तिचाही मृत्यू झाला. शेवटी दोघांचाही अंत्यविधी एकत्रच करण्याची वेळ आली. या घटनेमुळे नगर जिल्ह्यातील परिसरात हळहळ व्यक्त होत आहे. राजेंद्र दत्तात्रेय गागरे आणि त्यांची आई सेवानिवृत्त मुख्याध्यापिका नलिनी दत्तात्रेय गागरे (आहेर वस्ती लोणी खुर्द) या दोघांचा काही तासांच्या अंतराने मृत्यू झाला. राजेंद्र गागरे एलआयसी एजंट म्हणून काम करीत. लोणीहून दुचाकीवरून घरी परतत असताना राहाता तालुक्यातील लोणी-कोल्हार रस्त्यावर त्यांना अपघात झाला. यामध्ये त्यांचा मृत्यू झाला. पोलिसांनी पंचनामा करून मृतदेह रुग्णालयात पाठविला. तेथे शवविच्छेदनानंतर दुसऱ्या दिवशी त्यांच्यावर अंत्यसंस्कार होणार होते. वाचा: दरम्यान, आपल्या मुलाच्या अपघाती मृत्यूची माहिती आईला कळली. यामुळे तिला धक्का बसला. हृदयविकाराचा झटका आल्याने त्यांनाही ताबडतोब रुग्णालयात नेण्यात आले. मात्र, त्यांना वाचविण्यात यश आले नाही. त्यांचाही काही वेळातच मृत्यू झाला. इकडे मुलावरील अंत्यसंस्कारही करायचे राहिले होते. आता आईचाही मृत्यू झाल्याने दोघांवर एकत्रच अंत्यसंस्कार करण्याचा निर्णय घेण्यात आला. त्यानुसार प्रवरानगर येथील स्मशानभूमित त्यांच्यावर अंत्यसंस्कार करण्यात आले. गागरे एलआयसी एजंट तर त्यांच्या आई प्रवरानगरच्या प्राथमिक शाळेत मुख्याध्यापिका होत्या. दोघांचाही परिसरात मोठा जनसंपर्क होता. त्यामुळे अंत्यविधीला मोठी गर्दी झाली होती. वाचा: