एसटी कर्मचाऱ्यानेच बसवर केली दगडफेक; पोलिसांनी पाठलाग करून घेतलं ताब्यात!

November 28, 2021 Marathi 0 Comments

: राज्य सरकारने वेतनवाढीची घोषणा केल्यानंतरही एसटी कर्मचारी विलीनीकरणाच्या मागणीवर ठाम आहेत. त्यामुळे गेल्या काही दिवसांपासून एसटी कर्मचाऱ्यांचा सुरू असलेला संपही () कायम आहे. मात्र या संपाला काही ठिकाणी हिंसेचं गालबोट लागत असून जळगाव जिल्ह्यात एसटी बसवर दगडफेक झाल्याची घटना समोर आली आहे. जामनेरहून जळगावला परतणाऱ्या बसवर दगडफेक करणाऱ्या जामनेर आगाराच्या वाहकाला बस कर्मचाऱ्यांसह पोलिसांनी पाठलाग करून ताब्यात घेतलं आहे. नेरीजवळील गाडेगाव घाटात शनिवारी दुपारी हा प्रकार घडला. उमेश आवटी असं ताब्यात घेतलेल्या बस वाहकाचं नाव आहे. सोशल मीडियावरील पोस्ट वाचून भावनेच्या भरात हे कृत्य घडल्याचं वाहक उमेश आवटी याने सांगितलं आहे. परिवहन मंत्री अनिल परब यांनी केलेल्या आवाहनानुसार जळगाव आगाराची पहिली बस आज जामनेर येथे रवाना झालेली होती. जामनेर येथून दुपारी २ वाजता परतीचा प्रवास करत असताना नेरीजवळील गाडेगाव घाटात एका आयशर ट्रकच्या मागे उमेश आवटी नावाचा जामनेर आगाराचा वाहक लपून बसला होता. बस समोर येताच त्याने बसच्या काचेवर दगड भिरकावला. दगडफेकीनंतर एसटी बसचालक सोपान सपकाळे यांनी प्रसंगावधान राखून जागीच वळण घेतल्यानं मोठा अनर्थ टळला. याप्रसंगी बसमध्ये साध्या वेशात बसलेल्या पोलीस तसंच जळगाव आगारातील वाहक गोपाळ पाटील यांनी संबंधित व्यक्तीचा पाठलाग केला असता तो एका शेतात आढळून आला. यासंदर्भात जामनेर पोलीस स्टेशनला तक्रार देण्यात आली आहे. याप्रसंगी पोलीस ठाण्यात जामनेर आगार व्यवस्थापक कमलेश धनराळे, वाहतूक नियंत्रक संभाजी पाटील उपस्थित होते.