धक्कादायक : देवीचे पुजारी कुटुंब करोनाबाधित, दर्शन घेतलेल्या भाविकांची धाकधूक वाढली

October 08, 2021 Marathi 0 Comments

: नगर शहराजवळील बुऱ्हाणनगर येथील तुळजाभवानी माता मंदिरातील पुजारी कुटुंब करोनाबाधित असल्याचं आढळून आलं आहे. त्यांचा मंदिरामध्ये वावर असल्याचा आरोप बुऱ्हाणनगर ग्रामस्थांनी केला आहे. त्यामुळे गुरुवारी दर्शन घेतलेल्या शेकडो भाविकांची धाकधूक वाढली आहे. कुटुंबियांतील काहींना करोनाचं निदान झाल्याचं पुजारी अ‍ॅड. अभिषेक भगत यांनी मान्य केलं. मात्र आम्ही योग्य ती खरबदारी घेत असल्याचं ते म्हणाले. गावकऱ्यांनी यासंबंधी जिल्हा प्रशासनाकडे लेखी तक्रार केली आहे. भाविकांसाठी मंदिर गुरुवारी खुलं झालं आहे. त्यातच हा प्रकार उघडकीस आला आहे. बुऱ्हाणनगर गावचे सरपंच रावसाहेब कर्डिले, अक्षय कर्डिले, उपसरपंच जालिंदर जाधव यांच्या नेतृत्वाखाली ग्रामस्थांच्या शिष्टमंडळाने जिल्हा प्रशासनाकडे तक्रार केली. ग्रामपंचायत सदस्य निखिल भगत, रंगनाथ कर्डिले, रवींद्र कर्डिले, दत्ता तापकिरे, रबाजी कर्डिले, गोवर्धन मोरे, श्रीधर पानसरे, महेश कर्डिले, आनंदा कर्डिले, अमोल घाडगे यावेळी उपस्थित होते. त्यांनी म्हटलं आहे की, संसर्ग झाल्यानंतरही पुजारी कुटुंब विलगीकरण कक्षामध्ये न जाता मंदिरामध्ये फिरत आहे. मंदिरात राज्यभरातून भाविक येतात. त्यामुळे त्यांना करोना संसर्गाचा धोका संभावतो. करोना रुग्ण वाढल्यास याची जबाबदार जिल्हा प्रशासनाची असेल, असे निवेदनात म्हटलं आहे. वकील भगत यांनी हे आरोप फेटाळून लावले आहेत. ते म्हणाले, 'आमच्या कुटुंबातील चौघांना करोना संसर्गाचं निदान झालं आहे. वडिलांवर रुग्णालयात उपचार सुरू आहेत. मी, पत्नी आणि दोन वर्षांच्या मुलाला कारोना संसर्ग झाला आहे. मात्र आम्ही विलगीकरण कक्षात आहोत. भाविकांना आमच्यापासून संसर्ग होणार नाही, याची पूर्ण खबरदारी घेत आहोत. आमच्याबाबत चुकीची माहिती पसरवली जात आहे,' असंही त्यांनी सांगितलं. दरम्यान, जिल्हा प्रशासनाने यात लक्ष घालून पाहणी करावी. योग्य ती खबरदारी घ्यावी, अशी मागणी गावकऱ्यांनी केली आहे.