'त्यादिवशी ओवेसींना राष्ट्रीय नेते म्हणून प्रतिष्ठा मिळेल, नाहीतर...; शिवसेनेनं फटकारले

September 27, 2021 Marathi 0 Comments

मुंबईः 'मुसलमानांचे राजकारण हा काही राष्ट्रवाद होऊ शकत नाही. राममंदिरापासून ते वंदे मातरमपर्यंत फक्त विरोधाचेच फूत्कार हे काही मुस्लिम समाजास दिशा देण्याचे धोरण असू शकत नाही. मुसलमान या देशाचे नागरिक आहेत व त्यांनी या देशाचे संविधान पाळूनच आपला मार्ग बनवला पाहिजे, असे सांगण्याची हिंमत ओवेसींमध्ये ज्या दिवशी येईल त्या दिवशी ओवेसी यांना राष्ट्रीय नेते म्हणून प्रतिष्ठा मिळेल, नाहीतर भाजपसारख्या राष्ट्रीय पक्षांचे अंगवस्त्र म्हणूनच त्यांच्याकडे पाहिले जाईल', अशा शब्दांत शिवसेनेनं एमआयएमचे असदुद्दीन ओवेसी यांना फटकारले आहे. उत्तर प्रदेश विधानसभा निवडणुकांच्या पार्श्वभूमीवर व इतर राजकीय पक्षांनी जोरदार तयारी सुरू केली आहे. त्या पार्श्वभूमीवर शिवसेनेनं सामनाच्या अग्रलेखातून भाजप ओवेसींनी फटकारले आहे. 'भाजपच्या यशस्वी वाटचालीचे पडद्यामागचे सूत्रधार मियाँ असदुद्दीन ओवेसी व त्यांचा पक्ष चांगलाच कामाला लागल्याचे दिसत आहे. उत्तर प्रदेशातील निवडणुकांच्या निमित्ताने जातीय, धार्मिक तेढ निर्माण करण्याची पूर्ण तयारी ओवेसी महाशयानी केलेली दिसते,' अशी जळजळीत टीका शिवसेनेनं केली आहे. वाचाः 'ओवेसी हे प्रयागराजवरुन लखनौला जात असताना वाटेत त्यांचे समर्थक जमले व त्यांनी पाकिस्तान झिंदाबादचे नारे लावले. इतके दिवस उत्तर प्रदेशात अशा प्रकारचे नारे लागल्याची नोंद नाही. पण उत्तर प्रदेश विधानसभा निवडणुकांच्या निमित्ताने ओवेसी येतात काय, ठिकठिकाणी भडकावू भाषणे करतात काय, त्यांच्या बेबंद समर्थकांची डोकी भडवतात काय आणि मग पाकिस्तान झिंदाबादची नारेबाजी सुरू होते काय, हा सर्व प्रकार पटकथालेखन ठरवल्याप्रमाणे सुरू असल्याच्या संशयास बळकटी येत आहे,' अशी शंका शिवसेनेनं व्यक्त केली आहे. 'पंतप्रधान मोदी यांनी अमेरिकेत जाऊन धर्मांधता, दहशतवाद, फुटीरतावाद वगैरेंवर जोरदार भाषण केले व त्याबद्दल त्यांचे कौतुक करावे ते थोडेच. पण त्यात वेळी आपल्या देशात पाकिस्तान झिंदाबाचे नारे दिले जातात यास काय म्हणायचे?, असा सवाल शिवसेनेनं उपस्थित केला आहे. मोदी, योगींसारखे प्रखर राष्ट्रभक्त हिंदुत्ववादी नेते राज्यात व देशात सत्तेवर आहेत याचा पाकिस्तान झिंदाबादवाल्यांना विसर पडला आहे. निदान निवडणुक काळात तरी अशा घोषणांची बांगबाजी वाढावी, त्यातून हिंदू- मुसलमान, हिंदुस्तान- पाकिस्तान अशा शिळ्या कढीस ऊत आणून धार्मिक तणाव वाढावा, असे कारस्थान रचले जात आहे,' असा आरोपही शिवसेनेनं केला आहे. वाचाः 'ओवेसी हे राष्ट्रभक्तच आहेत. बॅ जिना यांच्याप्रमाणे ते उच्च शिक्षित, कायदेपंडित आहेत. पण त्याच जिना यांनी राष्ट्रभक्तीचा बुरखा पांघरुन पाकिस्तान झिंदाबादचा नारा दिला. देशाची फाळणी हा कट होता व त्यामागे ब्रिटिशांची फोडा- झोडा व राज्य करा हीच नीती होती. आज ओवेसींच्या संभामधून पाकिस्तान झिंदाबादचे नारे उठत आहेत. त्यामागेही राजकीय सूत्र आहेत. फोडा, झोडा आणि विजय मिळवा. ओवेसी यांनाही त्याच विजयाचे सूत्रधार म्हणून वापरले जात आहे. पाकिस्तानचा वापर केल्याशिवाय बाजपचे राजकारण पुढे सरकणार नाही का?,' असा सवालही शिवसेनेनं केला आहे.