आक्रमक झालेले शिवसैनिक थेट तहसील कार्यालयात घुसले; खासगी एजंटांना हाकलले!

August 10, 2021 Marathi 0 Comments

: वर्षभरापूर्वीच सेवानिवृत्त झालेल्या लिपिकाने तासगाव तहसीलदार कार्यालयात लाच घेतल्याचा प्रकार उघडकीस आल्यानंतर आक्रमक झाली आहे. लाचखोरीचे प्रकार पुन्हा घडू नयेत यासाठी शिवसेनेने सोमवारी तहसीलदार कार्यालयात घुसून खासगी एजंटांची शोध मोहीम राबवली. ओळखपत्र नसलेल्या कर्मचाऱ्यांना कार्यालयाबाहेर काढून, याबाबत अधिकाऱ्यांना जाब विचारला. यापुढे खासगी एजंट तहसीलदार कार्यालयात आढळल्यास अधिकाऱ्यांच्या विरोधात उग्र आंदोलन करण्याचा इशाराही शिवसेनेने दिला आहे. वाळू तस्करीच्या कारवाईत जप्त केलेला ट्रक सोडण्यासाठी तासगाव तहसीलदार कार्यालयातील कर्मचाऱ्याने लाच घेतल्याचा प्रकार गेल्या आठवड्यात घडला होता. विशेष म्हणजे पोलिस चौकशीत लाचखोर कर्मचारी हा खासगी एजंट असल्याचे उघड झाले होते. तो कर्मचारी वर्षभरापूर्वी याच कार्यालयातून सेवानिवृत्त झाला होता. या प्रकाराने तासगाव तहसीलदार कार्यालयात खासगी एजंटांचा सुळसुळाट असल्याचे स्पष्ट झाले होते. लाचखोरीचे प्रकार टाळण्यासाठी तहसीलदार कार्यालयातील खासगी एजंटांना थारा मिळू नये, असा आग्रह शिवसेनेने धरला आहे. यासाठी शिवसैनिकांनी सोमवारी तहसीलदार कार्यालयात घुसून खासगी एजंटची शोध मोहीम राबवली. ओळखपत्र नसलेल्या कर्मचाऱ्यांना कार्यालयाबाहेर हाकलले. सोबत ओळखपत्र नसलेल्या कर्मचाऱ्यांबाबत अधिकार्‍यांकडे जाब विचारला. दरम्यान, कर्मचाऱ्यांकडून नागरिकांच्या कामांची वेळेत निर्गत होत नाही, वारंवार हेलपाटे घालावे लागतात, लाचेची मागणी केली जाते, अशा तक्रारी वाढल्या आहेत. खासगी एजंटकरवी लाच घेण्याचे प्रकार घडत राहिल्यास अधिकाऱ्यांच्या विरोधात तीव्र आंदोलन करू, असा इशारा शिवसेना तासगाव तालुका प्रमुख प्रदीप माने यांनी दिला आहे. यावेळी संदीप गिड्डे, अरुण खरमाटे, शहर प्रमुख विशाल शिंदे, युवा सेना तालुका प्रमुख नितीन राजमाने, राजू मुल्ला, तुषार धाबुगडे, अजय पाटील, आदी उपस्थित होते.