धक्कादायक! सांगलीत पुन्हा मानवी वस्तीत आढळली महाकाय मगर

July 29, 2021 Marathi 0 Comments

: सांगलीवाडी येथे पुरातून आलेली महाकाय मगर मानवी वस्तीत शिरण्याच्या प्रयत्नात होती. परिसरातील तरुणांना मगर आढळताच त्यांनी तिला हुसकावून लावण्याचा प्रयत्न केला. त्यानंतर प्राणीप्रेमी तरुण आणि वन विभागाच्या कर्मचाऱ्यांनी तब्बल तीन तास प्रयत्न करून मगरीला पकडलं आहे. महापुरामुळे नदीच्या पात्राबाहेर पडलेल्या मगरींचा नागरी वस्तीत वावर वाढला आहे. मंगळवारी कसबे डिग्रज येथे मगर आढळल्यानंतर दुसऱ्याच दिवशी सांगलीवाडी येथे महाकाय मगर आढळली. मानवी वस्तीत शिरणाऱ्या मगरींना पकडण्यासाठी वनविभागाकडे कोणतेही नियोजन नसल्याने नागरिकांमध्ये मगरींची भीती वाढली आहे. सांगली जिल्ह्यातील कृष्णा आणि वारणा नदी पात्रात मगरींचा मोठ्या प्रमाणात वावर आहे. महापुरामुळे या मगरी पात्राबाहेर पडल्या आहेत. गेल्या चार दिवसांपासून अनेक गावांमध्ये मानवी वस्तीत मगरी आढळत असल्याने नागरिक धास्तावले आहेत. मंगळवारी कसबे डिग्रज गावात पुराच्या पाण्यात मुक्तसंचार करणारी मगर आढळली होती. काही तरुणांनी मोबाइलवर केलेले मगरीचे चित्रीकरण सोशल मीडियात व्हायरल झाले होते. यानंतर दुसऱ्याच दिवशी म्हणजे बुधवारी सकाळी सांगलीवाडी येथील वीर मराठा चौकात आठ फूट लांबीची मगर दिसली. ही मगर मानवी वस्तीत प्रवेश करण्याच्या प्रयत्नात होती. याचवेळी परिसरातील तरुणांनी तिला हुसकावून लावले. प्राणीप्रेमी तरुणांसह वन विभागाच्या कर्मचाऱ्यांनी तीन तास प्रयत्न केल्यानंतर मगरीला पकडण्यात यश आले. अखेर मगरीला जेरबंद करून वनविभागाच्या अधिकाऱ्यांकडे सोपविण्यात आले. या मगरीला सुरक्षित स्थळी सोडण्यात येईल, अशी माहिती वन विभागाच्या अधिकाऱ्यांनी दिली. दरम्यान, पूर ओसरू लागताच घराकडे परतणार्‍या पूरग्रस्तांमध्ये मगरींची भीती वाढली आहे. या मगरींना जेरबंद करण्यासाठी वनविभागाकडे सध्यातरी कोणतीही योजना नाही. मगर आढळल्यास नागरिकांनी वन विभागाला कळवावे, एवढेच आवाहन वन अधिकाऱ्यांनी केले आहे. यामुळे मगरींचे हल्ले झाल्यास जीवितहानी होऊ शकते, अशी भीती वर्तवली जात आहे. भीतीच्या सावटाखाली स्वच्छतेचे काम सुरू महापूर ओसरू लागल्याने पूरग्रस्त आपल्या घरांकडे परतत आहेत. पुरामुळे घरांसह जनावरांचे गोठे, दुकानांमध्ये मोठ्या प्रमाणात गाळ, चिखल, कचरा साचला आहे. स्वच्छतेचे काम महत्त्वाचे असल्याने पूरग्रस्त घराकडे परतत आहेत. मात्र याचवेळी त्यांना मगरींचा सामना करावा लागत असल्याने भीतीच्या सावटाखाली त्यांचे काम सुरू आहे.