लॉकडाऊनचा निर्णय झाल्यास सहकार्य करा; मुख्यमंत्र्यांचा राज ठाकरेंना फोन
मुंबईः राज्यात लॉकडाऊनचा निर्णय होण्याची शक्यता असतानाच मुख्यमंत्री राज्यातील विरोधी पक्षातील नेत्यांसोबत चर्चा करत आहेत. दुसऱ्या लॉकडाऊनसाठी विरोधाची भूमिका पाहता मुख्यमंत्री उद्धव ठाकरे यांनी मनसे अध्यक्ष यांच्याशी फोनवरुन चर्चा केली आहे. राज्यातील वाढत्या रुग्णसंख्येमुळं लॉकडाऊनची शक्यता वर्तवली जात आहे. आज राज्य मंत्रिमंडळाची महत्त्वाची बैठकही आयोजित करण्यात आली आहे. त्याआधी मुख्यमंत्र्यांनी विरोधी पक्षाच्या नेत्यांसोबत फोनवरुन चर्चा केल्याची माहिती आहे. विरोधीपक्ष नेते देवेंद्र फडणवीस यांच्याशीही उद्धव ठाकरे यांनी फोनवरुन संवाद साधल्याची चर्चा आहे. त्यानंतर मुख्यमंत्र्यांनी राज ठाकरे यांना लॉकडाऊनचा निर्णय झाल्यास सहकार्य करण्याचं आवाहन केलं आहे. 'राज्यातील कोरोना रुग्णांच्या वाढत्या संख्येमुळे निर्माण झालेल्या परिस्थितीत लॉकडाऊनचा मार्ग स्वीकारावा लागू शकतो, त्यामुळे अशा परिस्थितीत महाराष्ट्र नवनिर्माण सेनेने सहकार्य करावं, असं आवाहन मुख्यमंत्री उद्धव ठाकरे ह्यांनी राज ठाकरेंना फोनवरील संवादात केलं आहे, असं महाराष्ट्र नवनिर्माण सेनेच्या अधिकृत ट्विटर अकाउंटवरुन ट्वीट करण्यात आलं आहे. मुख्यमंत्री उद्धव ठाकरे व राज ठाकरे यांच्यातील फोननंतर मनसेनं एक पत्रक ट्वीट केलं आहे. 'यात आपण सरकारी सूचनांचं पालन करावं, सरकारी यंत्रणांना संपूर्ण सहकार्य करावं,' असं आवाहन केलं आहे. राज्य मंत्रिमंडळाची बैठक राज्यातील नागरिकांवर लॉकडाउनची टांगती तलवार असतानाच आज तातडीने राज्य मंत्रिमंडळाची बैठक बोलवण्यात आली आहे. व्हिडिओ कॉन्फरसिंगद्वारे ही बैठक आयोजित करण्यात आली आहे. आज रविवार असूनही बैठक आयोजित केल्यानं आश्चर्य व्यक्त करण्यात येत आहे. तसंच, या बैठकीत करोनाच्या पार्श्वभूमीवर मोठा निर्णय घेण्यात येण्याची शक्यताही वर्तवण्यात येत आहे. तज्ज्ञांसोबत चर्चा करोनाचा संसर्ग कसा रोखण्यासाठी मुख्यमंत्र्यांनी यावेळी तज्ज्ञांकडून पर्याय जाणून घेतले. वृत्तपत्रांचे मालक, संपादक, वितरक दूरदृश्य प्रणालीद्वारे आयोजित बैठकीत संपर्क साधला. तसंच, व्यायामशाळातील मालक, संचालत, मनोरंजन क्षेत्रातील दिग्गज यांच्याशीही मुख्यमंत्र्यांनी चर्चा केली होती. तसंच, सर्वांनी सहकार्य करवं असं आवाहन त्यांनी केलं आहे.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
0 Comments: