गजा मारणे स्वत:ला रॉबीनहूड समजतो का?; हायकोर्टाचा सवाल

March 24, 2021 Marathi 0 Comments

म. टा. विशेष प्रतिनिधी, मुंबई 'करोना संकटाच्या पार्श्वभूमीवर तुरुंगांमधील गर्दी लक्षात घेऊन एकीकडे न्यायालयांकडून अनेक आरोपींना पॅरोल व फर्लोवर सोडले जात आहे. मात्र, या प्रकरणात खटल्यातून सुटका झालेल्या आरोपीने संकटाचा विचार न करताच गर्दी जमवून मिरवणूक काढली!', असे आश्चर्य मुंबई उच्च न्यायालयाने मंगळवारी व्यक्त केले. त्याचबरोबर, 'अर्जदार () स्वतःला रॉबिनहूड समजतो का?', असा सवालही न्यायालयाने उपस्थित केला. कुख्यात गुंड गजानन उर्फ गजा पंढरीनाथ मारणे उर्फ महाराज (४४) याच्या विरोधात अनेक गुन्हे दाखल आहेत. पुण्यातील प्रतिस्पर्धी घायवळ गँगमधील पप्पू उर्फ संतोष गावडे याची ४ नोव्हेंबर २०१४ रोजी झालेली हत्या आणि अमोल बढे याची २९ नोव्हेंबर २०१४ रोजी करण्यात आलेली हत्या या दोन्ही गुन्ह्यांच्या प्रकरणांतून मारणेला मागील महिन्यात विशेष न्यायालयाने सबळ पुराव्यांअभावी निर्दोष ठरवले. मारणे हा नवी मुंबईतील तळोजा तुरुंगात होता. त्यामुळे त्याच्या सुटकेच्या वेळी तुरुंगाबाहेर त्याच्या समर्थकांनी मोठी गर्दी केली होती. तसेच समर्थकांनी जवळपास तीनशे वाहनांच्या ताफ्यासह मुंबई-पुणे एक्स्प्रेस-वेवरून त्याची मिरवणूक काढली. त्यांनी उर्से टोलनाक्यावर फटाके फोडून गदारोळही केला. शिवाय या साऱ्याचे ड्रोन कॅमेऱ्याच्या साह्याने चित्रीकरण करून ते सोशल मीडियावर व्हायरलही केले. त्यामुळे पोलिसांनी गजा मारणेसह अनेकांविरोधात विविध पोलिस ठाण्यांत एफआयआर नोंदवले आहेत. ते सर्व रद्द करण्यासाठी मारणेने उच्च न्यायालयात याचिका केल्या आहेत. वाचा: याविषयी सोमवारी न्या. संभाजी शिंदे व न्या. मनीष पितळे यांच्या खंडपीठासमोर प्राथमिक सुनावणी झाली. त्यावेळी आरोपीला त्याचे समर्थक 'महाराज' संबोधतात आणि तुरुंगातुन सुटका झाल्यावर त्यांनी 'आला रे आला, माझा बाप आला', अशा घोषणाही दिल्या, असे सरकारी वकील अरुणा पै यांनी निदर्शनास आणले. तेव्हा, करोना संकटात सुरक्षित वावराच्या नियमाचे उल्लंघन करून गर्दी जमवल्याबद्दल पोलिसांनी तातडीने एफआयआर का नोंदवला नाही? तीन दिवस का घेतले? असा प्रश्न खंडपीठाने उपस्थित केला. त्याचवेळी न्यायालये एकीकडे तुरुंगांमधील गर्दी टाळण्यासाठी अनेक आरोपींना पॅरोल व फर्लोवर सोडत असताना या प्रकरणात तुरुंगातून सुटल्यानंतर अर्जदाराने गर्दीसोबत मिरवणूक काढल्याबद्दल खंडपीठाने आश्चर्य व्यक्त केले. तसेच अर्जदार स्वतःला रॉबिनहूड समजतो का?, असा सवालही न्यायालयाने त्याच्या वकिलांकडे उपस्थित केला. अखेरीस पुढील सुनावणी खंडपीठाने ५ एप्रिलला ठेवली आहे. वाचा: