सिटीस्कॅन चाचण्यांमध्ये पुन्हा लूट

March 13, 2021 Marathi 0 Comments

म. टा. विशेष प्रतिनिधी, मुंबई करोना संसर्गाचे प्रमाण पुन्हा वाढायला लागल्यानंतर खबरदारीचा उपाय म्हणून चाचण्यांच्या माध्यमातून फुफ्फुसांमध्ये संसर्ग किती आहे, हे पाहण्यासाठी तपासण्या केल्या जातात. डॉक्टर करोना चाचणीच्या सोबत एचआरसीटी म्हणजे फुफ्फुसांचा सिटीस्कॅनही संशयित करोनारुग्णांना करायला सांगतात. या चाचण्यांच्या अनिर्बंध किमतींवर सरकारने चाप लावून, त्या कोविड आणि बिगर कोविड रुग्णांसाठी निश्चित केल्या होत्या. या चाचण्यांचे दर हे १२०० ते तीन हजार रुपयांपर्यंत नियंत्रित करण्यात आले होते. मात्र, या सरकारी निर्देशांना केराची टोपली दाखवत पुन्हा या चाचण्यांचे दर सात हजार ते १२ हजार रुपयांपर्यंत गेले आहे. अनेक ठिकाणी कोविड आणि कोविड नसलेल्या रुग्णांच्या चाचण्यांमध्येही भेद केला जात नाही. 'मटा'ने या चाचण्यांचे दर निश्चित व्हावेत यासाठी सातत्याने पाठपुरावा केला होता. त्यानंतर सरकारने समिती स्थापन करून या चाचण्यांचे दर निश्चित केले होते. मात्र, आता या नियमांचे उल्लंघन होताना दिसते. स्कॅन करायला गेल्यानंतर करोनाची लक्षणे असलेल्या व नसलेले रुग्णही एकत्रित असतात. अनेक केंद्रामध्ये त्यांच्या सुरक्षित वावराचा निकषही पाळला जात नाही. आता करोनाची साथ कमी झाली आहे, त्यामुळे हे निर्देश आम्ही पाळत नाही, असेही स्पष्टीकरण दिले जाते. मात्र, ते खरे नाही. मुंबईच्या काही प्रभागामध्ये करोना संसर्गाचा प्रादुर्भाव पुन्हा तितक्याच वेगाने वाढत आहे. त्यामुळे रुग्णांना संसर्ग होण्याचे प्रमाणही अधिक आहे. कोणत्याही परिस्थितीमध्ये संसर्गाचे त्वरित निदान करून चाचण्या करण्यासाठी भर दिला जातो. फुफ्फुसांमध्ये संसर्गाचे प्रमाण किती आहे हे पाहण्यासाठी हे निदान योग्य वेळी व्हायला हवे. त्यासाठी रुग्णांकडून अतिरिक्त दरआकारणी का केली जाते. नियमांची विचारणा केली, तर तपासण्यांसाठी वेळ दिली जात नसल्याचाही अनुभव काही रुग्णांना आला आहे. त्यामुळे नाईलाजाने मागतील तितके पैसे देऊन या चाचण्या केल्या जातात. यासंदर्भात इमेजिंग असोसिएशनचे प्रमुख डॉ. जिग्नेश ठक्कर यांच्याकडे विचारणा केली असता, त्यांनी संबधित सेंटर्सनी नियमांचे पालन करायलाच हवे व करोनाकाळामध्ये रुग्णहिताचा प्राधान्याने विचार करणे गरजेचे आहे, याकडे लक्ष वेधले. पळवाटा नको! लक्षणे दिसत असतील, तर आरटीपीसीआर चाचणी टाळून छातीचा एक्स रे, सिटीस्कॅन, इम्युनिटी मार्कर या चाचण्या करून संसर्गाची शक्यता तपासू नका. करून घेणे योग्य आहे, याकडेही संसर्गजन्य आजाराचे तज्ज्ञ डॉ. मोहन तिवारी यांनी लक्ष वेधले आहे. काही वेळा एचआरसीटी चाचण्या केल्यानंतर संसर्गाचा फैलाव हा ५० टक्क्यांपेक्षा अधिक असेल, तर सर्वसामान्य रुग्णालयामध्ये जाण्याची तयारी दर्शवतात अन्यथा ते घरी राहण्याचा मार्ग अवलंबिततात. त्यामुळे लक्षणे नसलेल्या रुग्णांकडून संसर्गाची शक्यता वाढते.