Amravati: सुनेवर सासऱ्याची वाईट नजर, सासूने दिली धमकी; अखेर कंटाळून तिने...
अमरावती: अमरावतीमधील तालुक्यात धक्कादायक घटना उघडकीस आली आहे. सासऱ्याची आपल्यावर वाईट नजर असल्याचे महिलेने पती आणि सासूला सांगितले. आपल्याला होणारा त्रास कमी होईल या आशेने तिने ही बाब सांगितली. पण त्यांनी विरोध न करता, घरातली गोष्ट घरातच ठेव, अन्यथा जीव घेऊ, अशी धमकी दिली. अखेर महिलेने हा प्रकार माहेरच्यांना सांगितला. त्यानंतर महिला सेलकडे तक्रार केली. त्यानंतर पोलिसांनी सासरच्यांविरोधात गुन्हा दाखल केला आहे. अमरावतीमधील चांदूरबाजार तालुक्यातील शिरजगाव येथे हा प्रकार घडला. गाडगेनगर पोलिसांनी सासरच्या मंडळींविरोधात गुन्हा नोंदवला आहे. पोलिसांच्या सूत्रांनुसार, या महिलेचा पती निर्भयसिंग केदारसिंग रघुवंशी (वय ३३), सासरा केदारसिंह राजारामसिंह रघुवंशी (५५) दोन महिला, अतुलसिंग राजारामसिंह रघुवंशी (वय ४२, सर्व राहणा. लोहान महाजनवाडी राजापेठ) चंद्रकांत रतेशसिंग रघुवंशी (४३, रा. येवदा ता. दर्यापूर) अशी गुन्हा दाखल झालेल्या आरोपींची नावे आहेत. यातील २४ वर्षीय तक्रारदार महिलेचे निर्भयसिंगसोबत ४ फेब्रुवारी २०२० रोजी लग्न झाले. १५ दिवस या महिलेला चांगले नांदवले. मात्र, हुंडा दिला नाही म्हणून सासरच्या मंडळींनी महिलेचा शारीरिक व मानसिक छळ सुरू केला. माहेरहून दोन लाख रुपये आणण्याचा तगादा लावून महिलेला मारहाण करण्यात आली. यातील आरोपी सासरा हा वाईट नजरेने बघत असल्याची तक्रार तिने पती व सासूकडे केली. मात्र, याकडे दुर्लक्ष करीत घरातील गोष्ट घरातच ठेव, अन्यथा जीवाने मारून टाकेन, अशी धमकी दोघांनीही विवाहितेला दिल्यानंतर ती घाबरली. अखेर तिने हा प्रकार माहेरच्या लोकांना सांगितला. नंतर सदर प्रकरण महिला सेलकडे गेले. तेथे समेट घडून न आल्याने अखेर पोलिसांनी गुन्हा नोंदवला. पुढील तपास पीएसआय मनीषा सामटकर करीत आहेत.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
0 Comments: