Pune : महिला हळदी-कुंकूला गेली होती; परतल्यानंतर घरातील दृश्य बघून बसला धक्का
पुणे: हळदी-कुंकूच्या कार्यक्रमाला गेलेली महिला परतल्यानंतर घरातील दृश्य बघून तिला चांगलाच धक्का बसला. तिच्या घरातून सोन्याचे दागिने आणि रोकड चोरीला गेली होती. पिंपरी-चिंचवड हद्दीतील चिंचवडेनगरमध्ये मंगळवारी रात्री ही धक्कादायक घटना घडली. मिळालेल्या माहितीनुसार, चिंचवडेनगरमध्ये राहणारी महिला आपल्या घर मालकिणीकडे हळदी-कुंकूच्या कार्यक्रमाला गेली होती. ती साडेसातच्या सुमारास घरी परतली. घरातून ८२ हजार रुपये किंमतीचे दागिने आणि रोकड चोरीला गेल्याचे तिच्या लक्षात आले. या प्रकरणी चिंचवडेनगरमधील बापूराव यादव यांनी पोलीस ठाण्यात तक्रार दाखल केली आहे. या तक्रारीनुसार, पोलिसांनी चोरट्याविरोधात गुन्हा नोंदवला आहे. बापूराव यादव हे कामानिमित्त बाहेर गेले होते. त्यांची पत्नी सुनीता या घरात होत्या. यादव कुटुंब भाडेकरू आहेत. संध्याकाळी साडेसातच्या सुमारास सुनीतादेखील आपल्या घरमालकिणीकडे हळदी-कुंकूच्या कार्यक्रमासाठी गेल्या. घरात कुणीही नसल्याची संधी साधून अज्ञात चोरट्याने घरात प्रवेश केला. घरातील सोन्याचे दागिने आणि रोकड लांबवली. रात्री त्या घरी परतल्या असता, घरातील दागिने आणि रोकड चोरीला गेल्याचे त्यांच्या लक्षात आले. त्यांचे पती बापूराव यांनी पोलिसांत तक्रार दाखल केली. या प्रकरणाचा पुढील तपास पोलीस करत आहेत.
from Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
0 Comments: